ក្រុងស្រ៊ីណាហ្គារៈ ប៉ូលិសបានថ្លែងកាលពីថ្ងៃអាទិត្យថា ក្រុមសកម្មប្រយុទ្ធ ៣ នាក់បានស្លាប់ នៅក្នុងការប្រយុទ្ធគ្នាមួយ ជាមួយកងកម្លាំងរដ្ឋាភិបាលឥណ្ឌា នៅកណ្តាលនៃទីក្រុងស្រ៊ីណាហ្គារសំខាន់នៅតំបន់កាស្មៀរ ២ ថ្ងៃ ក្រោយពីក្រុមឧទ្ទាម ៨ នាក់បានស្លាប់ នៅក្នុងសមរភូមិប្រយុទ្ធផ្សេងទៀត។
ក្រុងញូវដែលីបានកំពុងពង្រឹងកិច្ចខិតខំប្រឹងប្រែងប្រឆាំងក្រុមបះបោរនៅក្នុងជម្លោះទឹកដី ចាប់តាំងពីការបិទប្រទេស ដោយសារការឆ្លងរាលដាលវីរុសកូរ៉ូណា នៅទូទាំងប្រទេស ត្រូវបានធ្វើឡើងកាលពីចុងខែមីនាកន្លងទៅ។
មន្ត្រីប៉ូលិសម្នាក់ ដែលបានថ្លែងក្នុងលក្ខខណ្ឌអនាមិកប្រាប់កាសែត AFP ថា ក្រុមសកម្មប្រយុទ្ធទាំងនោះ បានស្លាប់នៅក្នុងការប្រយុទ្ធគ្នាមួយ នៅក្នុងតំបន់ហ្ស៊ូមនីម៉ារ ដែលមានមនុស្សរស់នៅយ៉ាងច្រើន នៅក្នុងទីក្រុងចំណាស់ស្រ៊ីណាហ្គារនេះ។
ផ្ទះមួយខ្នងត្រូវបានបំផ្លាញ នៅក្នុងការប៉ះទង្គិចគ្នានៅទីនោះ។
តំបន់កាស្មៀរដែលគ្រប់គ្រងដោយឥណ្ឌា បានធ្លាក់ក្នុងភាពចលាចល ចាប់តាំងពីខែសីហា ឆ្នាំ ២០១៩ កន្លងទៅ នៅពេលក្រុងញូវដែលីលុបចោលឋានៈស្វ័យគ្រប់គ្រងពាក់កណ្តាល ហើយបានបិទការទំនាក់ទំនងមួយ ដែលមិនបានដកចេញវិញទាំងស្រុងនោះទេ៕ AFP