.jpg)
មីស៊ីល Nasr របស់អុីរ៉ង់ ពេលកំពុងបាញ់ចេញពីនាវាចម្បាំង ១ គ្រឿង។ AFP
ក្រុងតេអេរ៉ង់៖ ប្រព័ន្ធផ្សព្វផ្សាយក្នុងតំបន់បានរាយការណ៍ថា កងកម្លាំងការពារបដិវត្តន៍អ៊ីរ៉ង់ កាលពីថ្ងៃអាទិត្យ បានបង្ហាញមីស៊ីលបាលីស្ទិកថ្មី ១ គ្រឿង របស់កងទ័ពជើងទឹក ដោយមានសក្តានុពលអាចបាញ់បានចម្ងាយជាង ៧០០ គីឡូម៉ែត្រ បន្ទាប់ពីមានភាពតានតឹងអស់ជាច្រើនខែ ជាមួយគូសត្រូវស្លាប់រស់អាមេរិកមកនោះ។
យោងតាមទីភ្នាក់ងារសារព័ត៌មាន Tasnim បានឲ្យដឹងថា មីស៊ីលនោះមានឈ្មោះថា «ហ្ស៊ូហ្វាហ្គារបាស័រ» (Zolfaghar Basir) គឺជាមីស៊ីលបាលីស្ទិកដែលបាញ់ពីផ្ទៃរាបទៅលើលំហអាកាស។
ចម្ងាយរបស់មីស៊ីលនេះ គឺអាចបាញ់បានឆ្ងាយជាងមីស៊ីលផ្សេងទៀតរបស់សាធារណរដ្ឋអ៊ិស្លាមដល់ទៅ ២ ដង ដែលក្នុងនោះរួមមាន មីស៊ីល «Hormuz-2» ដោយបាញ់បានចម្ងាយ ៣០០ គីឡូម៉ែត្រ ដែលក្រុងតេអេរ៉ង់បានថ្លែងថា ខ្លួនបានធ្វើតេស្តដោយជោគជ័យកាលពីខែមីនា ឆ្នាំ ២០១៧។
ទីភ្នាក់ងារសារព័ត៌មាន Tasnim មិនបានបញ្ជាក់ច្បាស់លាស់ថា តើប្រទេសអ៊ីរ៉ង់ បានធ្វើតេស្តបាញ់មីស៊ីលថ្មីនោះ ហើយ ឬនៅនោះទេ។
រូបភាពជាច្រើនបានចេញផ្សាយដោយទីភ្នាក់ងារសារព័ត៌មានតាស្នីម បានបង្ហាញមីស៊ីលហ្ស៊ូហ្វាហ្គារបាស័រ បានដាក់តាំងនៅពីលើជើងទម្ររថយន្ត ១ គ្រឿង នៅអំឡុងពេលការចាប់ផ្តើមបាញ់ នៅកន្លែងលំហអាកាសជាតិអ៊ីរ៉ង់ កាលពីថ្ងៃអាទិត្យ។
នាយឧត្តមសេនីយ៍មេបញ្ជាការលោក ហូសស៊ីន សាឡាមី បានថ្លែងថា៖ «ការតាំងពិព័រណ៍មីស៊ីល បានបង្ហាញអំពីផែនការទូលំទូលាយ»៕ AFP/SK
