កាលពីថ្ងៃសៅរ៍ ទី ២៧ មីនា កងទ័ពមីយ៉ាន់ម៉ាបានទម្លាក់គ្រាប់បែកនៅតំបន់ព្រំដែនថៃ។ សហភាពជាតិការ៉ែន (KNU) ដែលជាក្រុមប្រដាប់អាវុធជនជាតិភាគតិចមួយ គ្រប់គ្រងនៅតំបន់ភាគអាគ្នេយ៍បាននិយាយថា យន្ដហោះចម្បាំងបានវាយប្រហារតំបន់ចំនួន ៥ នៅស្រុក Mutraw ជិតព្រំដែនរួមទាំងជំរុំភៀសខ្លួន។
ការវាយប្រហារតាមអាកាសនោះ បានបង្កអោយមានអ្នកស្លាប់ចំនួន ២ នាក់ និងរងរបួស ២ នាក់។ KNU បាននិយាយថា KNU កំពុងផ្តល់ជម្រកដល់ប្រជាជន ដែលបានភៀសខ្លួនចេញពីប្រទេសមីយ៉ាន់ម៉ា កំឡុងពេលមានអំពើហិង្សាកើនឡើងនៅក្នុងប៉ុន្មានសប្តាហ៍ថ្មីៗនេះ។
KNU បានចុះហត្ថលេខាលើកិច្ចព្រមព្រៀងមិនធ្វើការវាយប្រហារគ្នាកាលពីឆ្នាំ ២០១៥ ប៉ុន្តែភាពតានតឹងបានកើនឡើង បន្ទាប់ពីយោធាបានផ្តួលរំលំរដ្ឋាភិបាលស៊ីវិលកាលពីថ្ងៃទី ១ ខែកុម្ភៈ៕