.jpg)
ការផ្ទុះ ត្រូវបានមើលនៅក្នុងតំបន់ហ្គាហ្សាភាគខាងជើង ក្រោយការវាយប្រហាររបស់កងកម្លាំងអ៊ីស្រាអែល។ AFP
ក្រុងហ្ស៊េរុយសាឡិមៈ កងទ័ព បាននិយាយថា យន្តហោះចម្បាំងរបស់អ៊ីស្រាអែល បានវាយប្រហារចំ ២៥គោលដៅ នៅក្នុងតំបន់ហ្គាហ្សានៅព្រឹកថ្ងៃពុធនេះ ជាការឆ្លើយតបទៅនឹងការបាញ់រ៉ុក្កែត ដែលបាញ់ចេញពីដែនដីប៉ាឡេស្ទីន។
នៅក្នុងសេចក្តីថ្លែងការណ៍មួយ កងទ័ពនោះ បាននិយាយថា រ៉ុក្កែតប្រហែល ៤៥គ្រាប់ ត្រូវបានបាញ់ចេញពីតំបន់ហ្គាហ្សានៅពេលយប់សំដៅទៅអ៊ីស្រាអែល។ រ៉ុក្កែត៧គ្រាប់ ត្រូវប្រព័ន្ធការពារមីស៊ីល ចាប់បាន។
កងទ័ពនោះ បានបន្ថែមថា ជាការឆ្លើយតបទៅនឹងរ៉ុក្កែតទាំងនោះ យន្តហោះអ៊ីស្រាអែលជាច្រើនគ្រឿង បានធ្វើការវាយប្រហារទៅលើបរិវេណយោធារបស់ក្រុមចលនាអ៊ិស្លាមហាម៉ាស។
ការវាយប្រហារថ្មីៗនេះ បានកើតឡើង ស្របពេលជាមួយភាពតានតឹងកើនឡើងខ្លាំងនៅក្នុងតំបន់ហ្គាហ្សា ក្រោយពីការតវ៉ាទ្រង់ទ្រាយធំ និងការប៉ះទង្គិច បានកើតឡើងនៅតាមបណ្តោយព្រំដែនកាលពីថ្ងៃទី៣០ ខែមីនា។ ពលរដ្ឋប៉ាឡេស្ទីនយ៉ាងតិច១៣២នាក់ បានស្លាប់។ មិនមានអ៊ីស្រាអែលណាម្នាក់ ស្លាប់ឡើយ។
ពលរដ្ឋប៉ាឡេស្ទីន កំពុងធ្វើការទាមទារសិទ្ធិវិលត្រឡប់ទៅផ្ទះសម្បែង ដែលក្រុមគ្រួសាររបស់ពួកគេ បានភៀសខ្លួនចេញ ឬ ត្រូវបានបណ្តេញចេញនៅក្នុងអំឡុងសង្រ្គាមជុំវិញការបង្កើតអ៊ីស្រាអែលនោះ៕ PSA
