.jpg)
ក្រុមស្រ្តីគាំទ្រឧទ្ទាមហ៊ូធី ធ្វើការតវ៉ាដើម្បីគាំទ្រក្រុមយុទ្ធជនហ៊ូធីដែលប្រយុទ្ធជាមួយកងកម្លាំងរដ្ឋាភិបាលគាំទ្រដោយអារ៉ាប៊ី សាអ៊ូឌីត។ AFP
ក្រុងហូដេដាៈ ក្រុមគ្រូពេទ្យបាននិយាយកាលពីថ្ងៃចន្ទថាមនុស្សយ៉ាងតិច ១៥០ នាក់បានស្លាប់នៅក្នុងការប៉ះទង្គិចគ្នារយៈពេល ២៤ ម៉ោងនៅក្នុងក្រុងកំពង់ផែហូដេដា ខណៈអ្នកការទូតកំពូលអង់គ្លេសបានទៅបំពេញទស្សនកិច្ចឈូងសមុទ្រនេះ ដោយបានស្វះស្វែងអំពាវនាវសុំឲ្យមានបទឈប់បាញ់មួយ។
ក្រុមស្មោះត្រង់រដ្ឋាភិបាលដែលគាំទ្រដោយក្រុមចម្រុះ ដឹកនាំដោយអារ៉ាប៊ី សាអ៊ូឌីត កំពុងប្រយុទ្ធគ្នា ដើម្បីបណ្តេញក្រុមឧទ្ទាមហ៊ូធីគាំទ្រដោយអ៊ីរ៉ង់ចេញពីក្រុងសមុទ្រក្រហមដែលកំពង់ផែជាច្រើនរបស់ក្រុងនេះ ផ្តល់ជម្រកដល់ពលរដ្ឋយេម៉ែនជិត ១៤ លាននាក់ដែលកំពុងប្រឈមនឹងភាពអត់ឃ្លានយ៉ាងខ្លាំង។
ដោយត្រូវបានសួរអំពីលទ្ធភាពបទឈប់បាញ់មួយនោះអ្នកនាំពាក្យក្រុមចម្រុះនោះបានថ្លែងប្រាប់ក្រុមអ្នកកាសែតនៅក្រុងរីយ៉ាដថា កិច្ចប្រតិបត្តិការនោះកំពុងបន្ត ដោយបានបន្ថែមថា លទ្ធភាពបទឈប់បាញ់នោះមានន័យថា ត្រូវដាក់សម្ពាធទៅលើក្រុមឧទ្ទាមឲ្យវិលទៅរកតុចរចា។
កងកម្លាំងគាំទ្ររដ្ឋាភិបាលយេម៉ែនជួបជុំគ្នានៅជាយក្រុងហូដេដា។ AFP
អ្នកក្រុងហូដេដាម្នាក់បានរាយការណ៍ថា ការប្រយុទ្ធគ្នាថយចុះនៅជុំវិញក្រុងនេះ នៅល្ងាចថ្ងៃចន្ទ ប៉ុន្តែលោកអគ្គលេខាធិការអង្គការសហប្រជាជាតិ Antonio Guterres បានព្រមានអំពីលទ្ធភាពស្ថានភាពគ្រោះថ្នាក់យ៉ាងខ្លាំងក្លាប្រសិនបើកំពង់ផែនេះ ត្រូវបានបំផ្លាញទាំងស្រុងនោះ។
លោក Guterres បានថ្លែងថា៖ «ការប្រយុទ្ធគ្នាត្រូវតែឈប់ការចរចានយោបាយត្រូវតែចាប់ផ្តើម ហើយយើងត្រូវតែត្រៀមឆ្លើយតបតាមផ្លូវមនុស្សធម៌ទ្រង់ទ្រាយធំមួយ ដើម្បីបញ្ចៀសនូវស្ថានភាពអាក្រក់បំផុតនៅឆ្នាំក្រោយនេះ»។
ប្រភពយោធាមួយនៅក្នុងក្រុមចម្រុះគាំទ្ររដ្ឋាភិបាលបានឲ្យដឹងថា ក្រុមអ្នកបះបោរបានធ្វើការវាយបកទ្រង់ទ្រាយធំដែលបំណងរុលចូលទៅក្រុងកំពង់ផែនៅក្រោមការគ្រប់គ្រងរបស់ក្រុមឧទ្ទាម ចាប់តាំងពីឆ្នាំ ២០១៤ មក៕
