នៅថ្ងៃដំបូងលោកចូលកាន់អំណាចប្រធានាធិបតីជាប់ឆ្នោត Joe Biden គ្រោងនឹងលុបចោលការអនុញ្ញាតរបស់លោកប្រធានាធិបតី Donald Trump ឱ្យសាងសង់បំពង់បង្ហូរប្រេង Keystone XL ដែលនឹងបញ្ជូនប្រេងពីខេត្ត Alberta របស់កាណាដាទៅកាន់ឈូងសមុទ្រម៉ិកស៊ិក នេះបើតាមឯកសារដែលត្រូវបានរាយការណ៍ដោយសារព័ត៌មានកាណាដា CBC News។
ឯកសារមួយចែកចាយដោយក្រុមរៀបចំការផ្ទេរអំណាចទៅកាន់ភាគីពាក់ព័ន្ធកាលពីចុងសប្ដាហ៍មុន បានបង្ហាញបញ្ជីបទបញ្ជាលោក Biden គ្រោងនឹងចុះហត្ថលេខា ដែលក្នុងនោះរួមមានពាក្យ «បដិសេធការអនុញ្ញាតសិទ្ធិសាងសង់ Keystone XL»។ បញ្ជីបទបញ្ជានេះដែលត្រូវបានបង្ហាញដល់ភាគីពាក់ព័ន្ធ គឺមានលក្ខណៈវែងជាងបញ្ជីដែលនាយខុទ្ទកាល័យលោក Ron Klainចេញផ្សាយជាសាធារណៈ។
កាលពីថ្ងៃចន្ទ ទី ១៨ អភិបាលខេត្ត Alberta លោក Jason Kenny បាននិយាយថា លោកនឹងទាមទារសំណងផ្លូវច្បាប់ ប្រសិនបើការរាយការណ៍នេះពិត។ លោក Kenny បាននិយាយថា៖ «យើងសង្ឃឹមថា ប្រធានាធិបតីជាប់ឆ្នោត Biden នឹងបង្ហាញការគោរពចំពោះប្រទេសកាណាដា ហើយយ៉ាងហោចណាស់អង្គុយនិយាយជាមួយយើង»។
កាលពីខែមីនា ឆ្នាំ ២០២០ ខេត្ត Alberta បានវិនិយោគប្រាក់ប្រមាណ ១,១ ពាន់លានដុល្លារកាណាដា (៧៨៥ លានដុល្លារអាមេរិក) លើគម្រោងនេះ ហើយលោក Kenny បាននិយាយថា លោកកំពុងពិចារណាថាគួរលក់បំពង់ និងសម្ភារសំណង់ដើម្បីកាត់បន្ថយការខាតបង់។ លោក Kenny និយាយថា៖ «ប្រសិនបើគម្រោងត្រូវបានបញ្ចប់នោះនឹងមានទ្រព្យច្រើនអាចលក់បានដូចជាបរិមាណបំពង់ដ៏ច្រើន»។
ខេត្តនេះ គឺជាកំណប់ប្រេងឆៅធំជាងគេទី៣ នៅលើពិភពលោក ហើយមានការលំបាកអស់ជាច្រើនឆ្នាំក្នុងការបញ្ជូនប្រេងរបស់ខ្លួនទៅកាន់ឈូងសមុទ្ររបស់អាមេរិក និងទីផ្សារផ្សេងទៀត ដោយសារកង្វះបរិមាណបំពង់បង្ហូរ។ ពួកគេសង្ឃឹមថា ការសាងសង់ Keystone XL នឹងជួយដោះស្រាយបញ្ហាទាំងនេះ។
នាយករដ្ឋមន្ត្រីកាណាដាលោក Justin Trudeau មិនទាន់បានអត្ថាធិប្បាយអំពីបញ្ហានេះនៅឡើយទេ តែរដ្ឋាភិបាលរបស់លោកធ្លាប់បានប្ដេជ្ញាការពារគម្រោងនេះ និងកាលពីខែវិច្ឆិកា លោកក៏បានពិភាក្សាជាមួយលោក Biden តាមទូរស័ព្ទផងដែរ។
រដ្ឋមន្ត្រីក្រសួងធនធានធម្មជាតិកាណាដាលោក Seamus-O''Regan បាននិយាយនៅក្នុងសេចក្ដីថ្លែងការណ៍មួយថា រដ្ឋាភិបាលរបស់លោកនៅតែបន្តគាំទ្រគម្រោងនេះ។ លោក O''Regan បាននិយាយថា៖ «ប្រេងកាណាដាត្រូវបានផលិតក្រោមក្របខ័ណ្ឌគោលនយោបាយបរិស្ថាន និងអាកាសធាតុយ៉ាងរឹងមាំ ហើយគម្រោងនេះនឹងមិនត្រឹមតែពង្រឹងទំនាក់ទំនងថាមពលកាណាដា-សហរដ្ឋអាមេរិកប៉ុណ្ណោះទេ ថែមទាំងបង្កើតការងាររាប់ពាន់សម្រាប់កម្មករនៅតាមតំបន់ព្រំដែនផងដែរ»។
កាលពីថ្ងៃចន្ទ អ្នកនាំពាក្យរបស់លោក Biden លោក Andrew Bates បាននិយាយថា ក្រុមរៀបចំការផ្ទេរអំណាចនឹងមិនធ្វើអត្ថាធិប្បាយអំពីបំពង់ប្រេងនេះទេ។
បំពង់ប្រេង Keystone XL បានរងការប្រឆាំងតាំងពីពេលចេញផែនការនៅឆ្នាំ ២០០៨ មកម្ល៉េះ។ ក្រុមសកម្មជនបរិស្ថាន និងសកម្មជនជនជាតិដើមភាគតិចបានចំណាយពេលជាង ១០ ឆ្នាំ ធ្វើការតវ៉ាថាបំពង់ប្រេងនេះរួមចំណែកដល់ការផ្លាស់ប្ដូរអាកាសធាតុ និងឈ្លានពានដល់ដែនដីបុរាណ។ អ្នកគាំទ្រការសាងសង់បាននិយាយថា គម្រោងនេះនឹងបង្កើតការងារថ្មីជាច្រើន។
កាលពីឆ្នាំ ២០១៥ ប្រធានាធិបតី Barrack Obama បានបានច្រានចោលការអនុញ្ញាតសិទ្ធសាងសង់សម្រាប់គម្រោងនេះ ដោយលើកឡើងថា ការសាងសង់បំពង់នេះនឹងប៉ះពាល់ដល់ការផ្លាស់ប្ដូរប្រភពថាមពលកកើតវិញ។ នៅឆ្នាំ ២០១៧ លោក Trump បានអនុញ្ញាតធ្វើគម្រោងនេះឡើងវិញ ដោយការសាងសង់បានចាប់ផ្ដើមនៅឆ្នាំ ២០១៩។
បើទោះបីជាមានការជំរុញពីលោក Trump ក៏ដោយគម្រោងនេះមានភាពយឺតយ៉ាវមិនទៅមុខ ដោយសារជួបឧបសគ្គផ្លូវច្បាប់មួយចំនួន។ កាលពីខែកក្កដា តុលាការកំពូលបានបដិសេធសំណើរបស់រដ្ឋបាល Trump ដើម្បីអនុញ្ញាតឱ្យសាងសង់ផ្នែកខ្លះនៃបំពង់នេះដែលត្រូវបានរារាំងដោយចៅក្រមរដ្ឋ Montana។
យ៉ាងណាមិញ បំពង់នេះមានប្រវែង ១ ៩០០ គីឡូម៉ែត្រដែលនឹងភ្ជាប់ជាមួយបំពង់ដែលមានស្រាប់នៅរដ្ឋ Nebraska សហរដ្ឋអាមេរិក ហើយ បើសិនការសាងសង់បានរួចរាល់អស់កាណាដាអាចនឹងបញ្ជូន ប្រេងចំនួន ៨៣០ ០០០ បារ៉ែល ក្នុង ១ ថ្ងៃ ទៅកាន់រោងចក្រចម្រាញ់នៅឯរដ្ឋ Texas និងរដ្ឋ Louisiana ដើម្បីធ្វើការកែច្នៃទៅជាផលិតផលផ្សេងសម្រាប់ការនាំចេញ៕