ថ្នាក់ដឹកនាំព្រឹទ្ធសភាសហរដ្ឋអាមេរិកបានសម្រេចថា ការជំនុំជម្រះក្ដីអតីតប្រធានាធិបតី លោក Donald Trump ជុំវិញការចោទប្រកាន់ពីបទញុះញង់ឱ្យមានកុបកម្មនៅអគារសភា នឹងចាប់ផ្ដើមនៅសប្ដាហ៍ថ្ងៃចន្ទ ទី ៨ ខែកុម្ភៈ ជាលើកទី១ ដែលអតីតប្រធានាធិបតីប្រឈមនឹងការជំនុំជម្រះក្ដីបន្ទាប់ពីចាកចេញពីតំណែង។
កាលពីថ្ងៃទី ១៣ មករា សភាតំណាងសហរដ្ឋអាមេរិកបានអនុម័តមាត្រានៃការចោទប្រកាន់លោក Trump ថា ញុះញង់ឱ្យក្រុមអ្នកគាំទ្ររបស់លោកធ្វើកុបកម្មវាយសម្រុកចូលអគារសភាកាលពីថ្ងៃទី ៦ មករា ខណៈសមាជិកសភាទាំង ២ កំពុងធ្វើការបញ្ជាក់លទ្ធផលបោះឆ្នោតប្រធានាធិបតី។
បើតាមកាលវិភាគរបស់មេដឹកនាំសំឡេងភាគច្រើនក្នុងព្រឹទ្ធសភាលោក Chuck Schumer សភាតំណាងនឹងបញ្ជូនមាត្រានៃការចោទប្រកាន់មកព្រឹទ្ធសភានៅល្ងាចថ្ងៃច័ន្ទ ទី ២៥ មករា។ នៅថ្ងៃអង្គារសមាជិកព្រឹទ្ធសភានឹងធ្វើពាក្យសម្បថជាសមាជិកអង្គជំនុំជម្រះក្ដី ហើយបន្ទាប់មកចេញដីកាកោះហៅលោក Trump។ អតីតប្រធានាធិបតីរូបនេះមានរយៈពេល ១ សប្ដាហ៍ត្រឹមថ្ងៃទី ២ ខែកុម្ភៈ ដើម្បីធ្វើការឆ្លើយតបនឹងមាត្រានៃការចោទប្រកាន់ នៅថ្ងៃដដែលសភាតំណាងត្រូវបញ្ជូនឯកសារអំណះអំណាងពួកគេទៅកាន់ព្រឹទ្ធសភា។
១ សប្ដាហ៍ក្រោយមកនៅថ្ងៃចន្ទ ទី ៨ កុម្ភៈ លោក Trump ត្រូវតែបញ្ជូនឯកសារអំណះអំណាងទៅព្រឹទ្ធសភា ហើយសភាតំណាងត្រូវឆ្លើយតបនឹងចម្លើយរបស់លោក Trump កាលពីសប្ដាហ៍មុន។ នៅថ្ងៃទី ៩ កុម្ភៈ សភាតំណាងត្រូវធ្វើការឆ្លើយតបនឹងឯកសារអំណះអំណាងរបស់លោក Trump ដែលដល់ចំណុចនេះការជំនុំជម្រះក្ដីអាចចាប់ផ្ដើម។
ក្នុងការជំនុំជម្រះក្ដីខាងមុខនេះប្រធានសភាតំណាងលោកស្រី Nancy Pelosi បានតែងតាំងសមាជិកសភាតំណាងចំនួន ៩ រូប ធ្វើជាអយ្យការ។ ក្រុមអ្នកការពារក្ដីលោក Trump គឺនឹងមានសមាសភាពមេធាវីឯកជន ហើយអាចមានការចូលរួមពីសមាជិកសភាតំណាងដែលគាំទ្រលោក។ មកដល់ពេលនេះ លោក Trump បានជួលលោកមេធាវី Butch Bowers ដែលជាអតីតមន្ត្រីក្នុងក្រសួងយុត្តិធម៌របស់រដ្ឋបាលប្រធានាធិបតីលោក George W. Bush។
ពេលបញ្ចប់ការជំនុំជម្រះក្ដី សមាជិកព្រឹទ្ធសភាអាចបោះឆ្នោតផ្ដន្ទាទោស ឬលើកលែងទោសលោក Trump។ ព្រឹទ្ធសភាត្រូវបោះឆ្នោតក្នុងសំឡេងភាគច្រើន ២ ភាគ ៣ ស្មើនឹង ៦៧ សំឡេង ដើម្បីផ្ដន្ទាទោសលោក Trump។
បើសិនព្រឹទ្ធសភាអនុម័តផ្ដន្ទាទោសលោក Trump ពួកគេអាចបោះឆ្នោត ៥១ សំឡេង ហាមឃាត់លោក Trump មិនឱ្យឈរឈ្មោះបោះឆ្នោតនាពេលអនាគត សម្លាប់អាជីពនយោបាយរបស់លោក។
បច្ចុប្បន្នបក្សប្រជាធិបតេយ្យមានអាសនៈក្នុងព្រឹទ្ធសភាចំនួន ៥០ ដូច្នេះដើម្បីទទួលសំឡេង ២ ភាគ ៣ បក្សប្រជាធិបតេយ្យត្រូវការសំឡេងយ៉ាងហោចណាស់ចំនួន ១៧ ពីសមាជិកបក្សសាធារណរដ្ឋ។
ចំនួនសមាជិកព្រឹទ្ធសភាបក្សសាធារណរដ្ឋប្រឆាំងនឹងការធ្វើការជំនុំជម្រះក្ដីលោក Trump គឺកំពុងកើនឡើង។ សមាជិកព្រឹទ្ធសភាតំណាងរដ្ឋ Florida លោក Marco Rubio បាននិយាយថា៖ «ខ្ញុំគិតថាការជំនុំជម្រះក្ដីនេះគឺជាអំពើឆោតល្ងង់»។ លោកបានបន្តទៀតថា៖ «ឱកាសដំបូងដែលខ្ញុំអាចបោះឆ្នោត ដើម្បីបញ្ឈប់ការជំនុំជម្រះក្ដី ខ្ញុំនឹងបោះ»។
សមាជិកព្រឹទ្ធសភាតំណាងរដ្ឋ Arkansas លោក Tom Cotton បាននិយាយថា លោកមិនជឿថាព្រឹទ្ធសភាមានសិទ្ធិអំណាចក្រោមរដ្ឋធម្មនុញ្ញក្នុងការផ្ដន្ទាទោសលោក Trump បន្ទាប់ពីលោកបានចាកចេញពីតំណែង។
សមាជិកព្រឹទ្ធសភាតំណាងរដ្ឋ Texas លោក John Cornyn បានគាំទ្រមតិលោក Cotton ដោយបង្ហោះសារទៅកាន់បណ្ដាញសង្គម Twitter ថា៖ «ប្រសិនបើវាជាគំនិតល្អក្នុងការចោទប្រកាន់ និងកាត់ក្ដីអតីតប្រធានាធិបតីចុះអតីតប្រធានាធិបតីបក្សប្រជាធិបតេយ្យវិញពេលដែលបក្សសាធារណរដ្ឋទទួលបានសំឡេងភាគច្រើននៅឆ្នាំ ២០២២? គិតហើយធ្វើអ្វីល្អសម្រាប់ប្រទេស»។
សំណួរថា តើព្រឹទ្ធសភាអាចជំនុំជម្រះក្ដី និងផ្ដន្ទាទោសអតីតប្រធានាធិបតី បន្ទាប់ចេញពីតំណែង បានដែរឬទេ គឺនៅជាសំណួរបើកនៅឡើយ ដោយសាររដ្ឋធម្មនុញ្ញមិនបានបញ្ជាក់ច្បាស់លាស់ ហើយរឿងបែបនេះមិនធ្លាប់កើតមានពីមុនមក។ បក្សប្រជាធិបតេយ្យបានច្រានចោលការអះអាងរបស់បក្សសាធារណរដ្ឋដោយលើកឡើងការជំនុំជម្រះក្ដីរបស់រដ្ឋមន្ត្រីក្រសួងការពារជាតិ ១ រូបកាលពីឆ្នាំ ១៨៧៦ ក្រោយពីលោកបានចេញពីតំណែងរួចទៅហើយ។
ផ្ទុយនឹងមិត្តរួមបក្សលោក Mitt Romney ដែលសមាជិកព្រឹទ្ធសភាមកពីរដ្ឋ Utah និងជាអតីតបេក្ខជនប្រធានាធិបតីនៃបក្សសាធារណរដ្ឋបាននិយាយថា៖ «ខ្ញុំជឿថា ការញុះញង់ឱ្យមានការបះបោរ គឺជាបទល្មើសដែលអាចផ្ដន្ទាទោសបាន។ បើមិនដូច្នោះទេ តើមានអ្វីទៀត?»។
ប្រធានសំឡេងបក្សសាធារណរដ្ឋក្នុងព្រឹទ្ធសភាលោក Mitch McConnell មិនបានបង្ហាញថា លោកនឹងបោះឆ្នោតរបៀបណា ឬយល់ព្រមនឹងមតិរបស់សមាជិកបក្សរបស់លោកទេ។ កាលពីសប្ដាហ៍មុនលោក McConnell បាននិយាយថា លោក Trump បានញុះញង់អ្នកគាំទ្ររបស់លោកមុនពេលកុបកម្មនេះ។
សំណួរដ៏សំខាន់មួយទៀត គឺថាតើនរណានឹងធ្វើជាប្រធានអង្គជំនុំជម្រះក្ដីនេះ? ជាធម្មតាប្រធានតុលាការកំពូលនឹងដើរតួជាប្រធានអង្គជំនុំជម្រះក្ដីរបស់ប្រធានាធិបតី តែដោយសារលោក Trump បានចេញពីតំណែងរួចទៅហើយគេមិនទាន់ដឹងច្បាស់ថា តើប្រធានតុលាការកំពូលត្រូវបំពេញតួនាទីនេះដែរឬទេ។ បើសិនប្រធានតុលាការកំពូលមិនត្រូវការបំពេញតួនាទីនេះ អនុប្រធានាធិបតី Kamala Harrisឬប្រធានព្រឹទ្ធសភាស្ដីទីនឹងដើរតួជាងប្រធានអង្គជំនុំជម្រះក្ដី។
យ៉ាងណាមិញ នេះគឺជាលើកទី២ ហើយដែលលោក Trump ប្រឈមនឹងការជំនុំជម្រះក្ដីចំពោះមុខព្រឹទ្ធសភា។ កាលពីចុងឆ្នាំ ២០១៩ លោក Trump ប្រឈមការជំនុំជម្រះក្ដី ជុំវិញការទាក់ទងរបស់លោកទៅកាន់រដ្ឋាភិបាលអ៊ុយក្រែន ដើម្បីជំរុញបើកការស៊ើបអង្កេតលើអាជីវកម្មកូនប្រុសលោក Biden ប៉ុន្តែដល់ពេលបញ្ចប់ការជំនុំជម្រះក្ដីនៅដើមឆ្នាំ ២០២០ ព្រឹទ្ធសភាបានបោះឆ្នោតលើកលែងទោសរបស់លោក៕