.jpg)
លោករដ្ឋមន្ត្រីការបរទេសអ៊ីរ៉ង់ ម៉ូហាម៉ាដ ចាវ៉ាដ ហ្សារីហ្វ ធ្វើសន្និសីទកាសែត។ AFP
ក្រុងតេអេរ៉ង់ៈ ប្រព័ន្ធផ្សព្វផ្សាយរដ្ឋ បានរាយការណ៍ឲ្យដឹងថា រដ្ឋមន្ត្រីការបរទេសអ៊ីរ៉ង់ លោក ម៉ូហាម៉ាដ ចាវ៉ាដ ហ្សារីហ្វ បានថ្លែងកាលពីថ្ងៃសៅរ៍ថា ការសម្រេចចិត្តរបស់អាមេរិក ដាក់ពង្រាយទាហាន ១ ៥០០ នាក់ បន្ថែមទៅកាន់តំបន់មជ្ឈិមបូព៌ា គឺជា «ការគំរាមកំហែងមួយដល់សន្តិភាពអន្តរជាតិ»។
លោក ហ្សារីហ្វ បានប្រាប់ទីភ្នាក់ងារព័ត៌មាន IRNA នៅមុននឹងបញ្ចប់ទស្សនកិច្ចរបស់ លោកនៅប៉ាគីស្ថានថា៖ «ការបង្កើនវត្តមានកងកម្លាំងអាមេរិកនៅក្នុងតំបន់របស់យើង គឺធ្វើឲ្យគ្រោះថ្នាក់យ៉ាងខ្លាំង និងជាការគំរាមកំហែងដល់សន្តិភាព និងសន្តិសុខអន្តរជាតិ»។
ក្រុងវ៉ាស៊ីនតោន បានថ្លែងថា ការដាក់បន្ថែមកងកម្លាំង ដែលបានកើតឡើង ក្រោយពីការដាក់ពង្រាយក្រុមនាវាដឹកយន្តហោះ មានយន្តហោះទម្លាក់គ្រាប់បែក B-52 ជាច្រើនគ្រឿង នាវាវាយប្រហារទាំងនៅលើគោក និងក្នុងទឹក និងប្រព័ន្ធការពារមីស៊ីល កាលពីដើមខែឧសភា ជាការឆ្លើយតបទៅនឹង «យុទ្ធនាការ» នៃការវាយប្រហារជាច្រើនលើកកាលពីពេលថ្មីៗនេះដែលបានអនុម័តដោយមេដឹកនាំកំពូលរបស់អ៊ីរ៉ង់។
លោក ចាវ៉ាដ ហ្សារីហ្វ ចាប់ដៃជាមួយសមភាគីប៉ាគីស្ថាន Shah Mehmood Qureshi។ AFP
ការវាយប្រហារទាំងនោះមាន ការបាញ់គ្រាប់រ៉ុក្កែត ចូលក្នុងតំបន់បៃតង Green Zone នៅក្រុងបាដាដ និងការបំផ្ទុះគ្រាប់បែក ដែលបានធ្វើឲ្យរថពាសដែក ៤ គ្រឿង រងការខូចខាតនៅក្បែរច្រកចូលទៅកាន់ឈូងសមុទ្រ និងការវាយប្រហារយន្តហោះដ្រូន ដោយក្រុមឧទ្ទាមយេម៉ែន នៅកន្លែងបំពង់បង្ហូរប្រេងរបស់អារ៉ាប៊ីសាអ៊ូឌីតដ៏សំខាន់មួយផងដែរ។
អ៊ីរ៉ង់បានបដិសេធថា មិនបានជាប់ទាក់ទងនៅក្នុងការវាយប្រហារណាមួយនោះទេ។
លោក ម៉ូហាម៉ាដ ចាវ៉ាដ ហ្សារីហ្វ បានថ្លែងថា៖ «អាមេរិក បានធ្វើការអះអាង ដើម្បីបង្ហាញគោលយោបាយអរិភាព របស់ពួកគេ និងបង្កើតឲ្យមានភាពតានតឹងនៅក្នុងតំបន់ឈូងសមុទ្រពែរ្ស៍»។
អាមេរិក បានបញ្ចប់ការលើកលែងដាក់ទណ្ឌកម្មនៅខែនេះ ដែលខ្លួនបានផ្តល់ឲ្យពីការលុបចោលការដាក់ទណ្ឌកម្មជាឯកតោភាគីទាំងស្រុង ដែលអាមេរិក បានដាក់ជាថ្មីក្រោយពីធ្វើការដកខ្លួនចេញកិច្ចព្រមព្រៀងនុយក្លេអ៊ែរឆ្នាំ ២០១៥ រវាងក្រុមប្រទេសមហាអំណាច និងអ៊ីរ៉ង់ កាលពីខែ ឧសភា ឆ្នាំ ២០១៨។
វិធានការរបស់អាមេរិកនោះ ធ្វើឲ្យប៉ះពាល់សេដ្ឋកិច្ចរបស់អ៊ីរ៉ង់ ដែលកំពុងដុនដាបស្រាប់ ខណៈមានការគំរាមដាក់ទណ្ឌកម្ម ដូចជាតួកគីប្រកាសឈប់ទិញប្រេងអ៊ីរ៉ង់៕ AFP/SK
