ក្រុងស្តេបប៉ាណាគឺត៖ កងកម្លាំងប្រទេសអាមេនី និងអាស៊ែបៃហ្សង់ បានបាញ់គ្រាប់រ៉ុក្កែត និងកាំភ្លើងធំទៅវិញទៅមកយ៉ាងខ្លាំងក្លា ខណៈការប្រយុទ្ធគ្នាកាន់តែខ្លាំងឡើង ជុំវិញតំបន់ជម្លោះណាហ្គូរណូ និងការ៉ាបាក់ហ៍ កាលពីថ្ងៃអាទិត្យ ដែលបានបំបែកខ្លួនចេញពីរដ្ឋធានីក្នុងតំបន់ ហើយទីក្រុងធំជាងគេបំផុតទី២ របស់ប្រទេសអាស៊ែបៃហ្សង់ បានរងការវាយប្រហារយ៉ាងខ្លាំងក្លាថែមទៀតផង។
ប្រទេសអាមេនី បាននិយាយថា ទីក្រុងស្តេបប៉ាណាគឺតដ៏សំខាន់ នៅតំបន់ណាហ្គូរណូ និងការ៉ាបាក់ហ៍ ដែលបានកំពុងស្ថិតនៅក្រោមការបាញ់ផ្លោងចាប់តាំងពីថ្ងៃសុក្រនោះ បានរងការវាយប្រហារម្តងទៀត កាលពីថ្ងៃអាទិត្យ ហើយអ្នកកាសែត AFP ខ្លះ បាននិយាយថា គឺមានសំឡេងគ្រាប់ផ្ទុះជាប្រចាំ ហើយដុំផ្សែងខ្មៅក្រាស់ឃ្មឹកបានហុយទ្រលោមគ្របដណ្តប់នៅក្នុងផ្នែកខ្លះនៃទីក្រុងនោះ។
ក្រសួងការពារជាតិអាស៊ែបៃហ្សង់ បានថ្លែងថា ហ្គាន់ចាជាទីក្រុង ១ ដែលមានប្រជាជនរស់នៅជាង ៣៣០ ០០០ នាក់ នៅប្រទេសអាស៊ែបៃហ្សង់ភាគខាងលិច ក៏បានស្ថិតនៅក្រោមការវាយប្រហារផងដែរ ខណៈកងកម្លាំងបំបែកខ្លួនបានគាំទ្រដោយអាមេនីបានអះអាងថា បានបំផ្លាញមូលដ្ឋានទ័ពអាកាស ១ កន្លែង។
ភាគីទាំង ២ បានចោទប្រកាន់គ្នាទៅវិញទៅមក ពីបទកំណត់គោលដៅទៅលើតំបន់ជនស៊ីវិល ខណៈជម្លោះបានរីកកាន់តែធំឡើង ១ សប្តាហ៍ក្រោយពីប្រយុទ្ធគ្នាយ៉ាងខ្លាំងបានផ្ទុះឡើងក្នុងជម្លោះអស់ជាច្រើនទសវត្សរ៍ ជុំវិញតំបន់កុលសម្ព័ន្ធអាមេនី។
ប្រទេសអាមេនី និងអាស៊ែបៃហ្សង់ បានផ្គើនទៅនឹងការអំពាវនាវរបស់អន្តរជាតិឱ្យមានបទឈប់បាញ់មួយ ហើយបានប៉ះទង្គិចគ្នាជាច្រើនលើកកាន់តែខ្លាំងឡើងនៅក្នុងរយៈពេលប៉ុន្មានថ្ងៃថ្មីៗនេះ ដោយភាគីទាំង ២ បានអះអាងអំពីជ័យជម្នះនៅសមរភូមិមុខរៀងៗខ្លួន ហើយបាននិយាយថា ពួកគេកំពុងធ្វើឱ្យសត្រូវគូបដិបក្ខស្លាប់ និងរងរបួសយ៉ាងច្រើននៅក្នុងការប្រយុទ្ធគ្នានៅទីនោះ។
រថយន្តស៊ីរ៉ែនជាច្រើនគ្រឿង បានកំពុងបន្លឺសំឡេងយ៉ាងទ្រហឹង និងការផ្ទុះគ្រាប់ត្រូវបានគេឮជាប្រចាំនៅទីក្រុងស្តេបប៉ាណាគឺត ជាទីដែលក្រុមពលរដ្ឋបាន និងកំពុងរត់រកកន្លែងមានសុវត្តិភាពនៅក្នុងនោះរួមមានក្រុមគ្រួសារមួយចំនួននៅក្នុងអគារជាន់ក្រោមដីនៃព្រះវិហារ Holy Mother of God Cathedral នៅទីក្រុងស្តេបប៉ាណាគឺត។
ក្រសួងការបរទេសអាមេនីបានថ្លែងថា ទីក្រុងស្តេបប៉ាណាគឺត និងទីក្រុងមួយចំនួនផ្សេងទៀត បានរងការវាយប្រហារដោយសារការប្រយុទ្ធគ្នាយ៉ាងខ្លាំងក្លា៕ AFP/SK