.jpg)
ក្រុមអ្នកគាំទ្រលោក អុីវ៉ូ មូរ៉ាល់ស៍ ប៉ះទង្គិចជាម្ួយប៉ូលិសបង្ក្រាបកុបកម្ម នៅក្នុងការតវ៉ាមួយនៅទីក្រុងឡាប៉ាស។ AFP
ក្រុងឡាប៉ាស៖ ប្រធានាធិបតីស្តីទីរបស់ប្រទេស បូលីវី លោកស្រី Jeanine Anez កាលពីថ្ងៃពុធ បានចូលកាន់តំណែងដែលនៅទំនេរ ដែលបានបន្សល់ទុកដោយការលាលែងពីតំណែងរបស់លោក អ៊ីវ៉ូ មូរ៉ាល់ស៍ ដែលបានថ្លែងថា លោកបានត្រៀមខ្លួនរួចជាស្រេច ដើម្បីវិលត្រឡប់ពីការនិរទេសខ្លួននៅប្រទេស ម៉ិកស៊ិក ដើម្បីធ្វើឲ្យប្រទេសមួយនេះ «ស្ងប់ស្ងាត់» ខណៈប៉ូលិសបង្ក្រាបកុបកម្មបានប៉ះទង្គិច ជាមួយក្រុមអ្នកគាំទ្ររបស់លោក ដែលបានធ្វើឲ្យម្នាក់ស្លាប់នៅក្នុងការតវ៉ានោះ។
លោកស្រី Anez ជាអនុប្រធានព្រឹទ្ធសភាមានវ័យ ៥២ ឆ្នាំ នៅមុនការប្រកាសខ្លួនឯងថា ជាប្រធានាធិបតីស្តីទីកាលពីថ្ងៃអង្គារ ដែលជាវិធានការមានការគាំទ្រដោយតុលាការរដ្ឋធម្មនុញ្ញហើយបានតែងតាំងរដ្ឋមន្ត្រី ១១ នាក់ និងមេបញ្ជាការយោធាជាន់ខ្ពស់ថ្មីចំនួនម្នាក់ផងដែរ។
នៅក្នុងសន្និសីទសារព័ត៌មានមួយនៅឯវិមានរដ្ឋាភិបាល លោកស្រីបានប្តេជ្ញាចិត្តជាថ្មីម្តងទៀត ដើម្បី «រៀបចំឲ្យមានការបោះឆ្នោតកាន់តែឆាប់ តាមដែលអាចធ្វើទៅបាន»។
លោកស្រី Anez បានតែងតាំងអតីតអ្នកការទូតលោកស្រី Karen Longari ជារដ្ឋមន្ត្រីការបរទេស និងសមាជិកព្រឹទ្ធសភាស្តាំនិយមម្នាក់លោក Arturo Murillo ជារដ្ឋមន្ត្រីក្រសួងមហាផ្ទៃ។
រដ្ឋមន្ត្រីការបរទេសថ្មីរបស់ប្រទេសបូលីវី លោកស្រី Karen Longaric Rodriguez ស្បថចូលកាន់តំណែងនៅពីមុខលោកស្រី Jeanine Anez។ AFP
រដ្ឋមន្ត្រីសេដ្ឋកិច្ចរបស់លោកស្រីគឺលោក Jose Luis Parada បានធ្វើការឲ្យរដ្ឋាភិបាលប្រចាំតំបន់នៅក្នុងខេត្តសាន់តា្រហ្គូសភាគខាងកើត ដែលសម្បូរទៅដោយទ្រព្យនោះ ជាកន្លែងទីតាំងឈរជើងរបស់យោធាមួយកន្លែងនៅទីនោះ។
ដោយបានបដិសេធទៅនឹងការប្រកាសរបស់លោក មូរ៉ាល់ស៍ ថា តំណែងប្រធានាធិបតីរបស់លោកស្រី គឺបានពីការធ្វើរដ្ឋប្រហារមួយ លោកស្រីបានថ្លែងថា៖ «គ្មានការធ្វើរដ្ឋប្រហារនៅក្នុងប្រទេស បូលីវី នោះទេ គឺមានតែជំនួសច្បាប់រដ្ឋធម្មនុញ្ញមួយប៉ុណ្ណោះ»។
លោកស្រីបានថ្លែងថា៖ «រដ្ឋប្រហារតែមួយប៉ុណ្ណោះនៅក្នុងប្រទេសមួយនេះ ត្រូវបានធ្វើឡើងដោយលោក មូរ៉ាល់ស៍» ដោយបាននិយាយសំដៅទៅលើការធ្វើប្រជាមតិកាលពីឆ្នាំ ២០១៦ ដែលបានរាំងខ្ទប់អតីតប្រធានាធិបតីរូបនោះ មិនឲ្យដំណើរការរៀបចំការបោះឆ្នោតឡើងវិញ ប៉ុន្តែលោក មូរ៉ាល់ស៍ ត្រូវបានទម្លាក់ពីអំណាចដោយតុលាការរដ្ឋធម្មនុញ្ញ។
ប៉ូលិសបង្ក្រាបកុបកម្មបានបាញ់ឧស្ម័នបង្ហូរទឹកភ្នែក នៅក្នុងការប៉ះទង្គិចគ្នាជាច្រើនលើកជាមួយក្រុមអ្នកតវ៉ារបស់លោក មូរ៉ាល់ស៍ រាប់រយនាក់ ដែលបានដង្ហែក្បួនទៅវិមានប្រធានាធិបតី ដើម្បីតវ៉ាប្រឆាំងការតែងតាំងរបស់លោកស្រី។
លោកវេជ្ជបណ្ឌិតម្នាក់បានថ្លែងថា បុរសមានវ័យ ២០ ឆ្នាំម្នាក់បានត្រូវគ្រាប់កាំភ្លើងស្លាប់នៅក្នុងភូមិមួយ នៅជិតទីក្រុងសាន់តា្រហ្គូសភាគខាងកើតនៅក្នុងការប៉ះទង្គិចរវាងប៉ូលិស និងអ្នកគាំទ្រ៕ AFP/SK
