រដ្ឋឡូសអេនជឺឡេស៖ មន្ត្រីកងទ័ពជើងទឹកជាន់ខ្ពស់ម្នាក់បានថ្លែងថា ទាហានជើងទឹកអាមេរិកម្នាក់បានបាញ់សម្លាប់មនុស្ស ២ នាក់ ហើយអ្នកទី ៣ បានរងរបួសនៅឯតំបន់កំពង់ផែចតនាវា Pearl Harbor Naval Shipyard នៅរដ្ឋហាវ៉ៃ កាលពីថ្ងៃពុធ នៅមុនពេលបាញ់សម្លាប់ខ្លួនឯងតាមក្រោយ។
យោងតាមសេចក្តីថ្លែងការណ៍មួយ ដែលបានចេញផ្សាយដោយកងទ័ពជើងទឹកនោះថា មូលដ្ឋានទ័ពនេះ ត្រូវបានបិទអស់រយៈពេលជាង ១ ម៉ោង ក្រោយពីមានការបាញ់ប្រហារគ្នា ចំណែកឯក្រុមមន្ត្រីកងនាវាជើងទឹកបានថ្លែងថា ពួកគេកំពុងស៊ើបអង្កេតអំពីមូលហេតុអ្វីដែលបណ្តាលឲ្យមានការបាញ់ប្រហារគ្នានៅទីនោះ។
លោកឧត្តមនាវីឯក Robert Chadwick បានថ្លែងថា៖ «ខ្ញុំអាចអះអាងបានថា មានជនរងគ្រោះ ៣ នាក់បានស្លាប់។ យើងសូមបញ្ជាក់ថា អ្នកទាំង ២ នាក់នោះ បានស្លាប់បាត់ទៅហើយ មានម្នាក់ស្ថិតនៅក្នុងស្ថានភាពយ៉ាងធ្ងន់ធ្ងរនៅឯមន្ទីរពេទ្យក្នុងតំបន់»។
លោកបានបន្ថែមថា ឃាតករនោះត្រូវគេស្គាល់អត្តសញ្ញាណ «យ៉ាងច្បាស់» ថា ជាទាហានជើងទឹកម្នាក់ បានធ្វើការនៅកងនាវាជើងទឹក USS Columbia ជាកងនាវាមុជទឹកវាយប្រហារនៅក្នុងក្រុងឡូសអេនជឺឡេស បានស្លាប់ក្រោយពី «បានបាញ់ខ្លួនឯងឲ្យរងរបួសធ្ងន់នោះ»។
សាក្សីម្នាក់បានប្រាប់ប្រព័ន្ធផ្សព្វផ្សាយក្នុងតំបន់ថា លោកកំពុងអង្គុយនៅពីមុខកុំព្យួទ័ររបស់លោក នៅពេលលោកបានឮសំឡេងកាំភ្លើងផ្ទុះឡើង ហើយបានប្រញាប់ប្រញាល់ទៅកន្លែងបង្អួច ជាទីដែលលោកបានឃើញជនរងគ្រោះ ៣ នាក់ បានដេកស្លាប់នៅលើដី។
សាក្សីដែលសុំមិនបញ្ចេញឈ្មោះ នោះបាននិយាយថា បន្ទាប់មកលោកបានឃើញខ្មាន់កាំភ្លើងដែលស្លៀកពាក់ឯកសណ្ឋានទាហានជើងទឹកបានបាញ់ក្បាលសម្លាប់ខ្លួនឯង។
អ្នកនាំពាក្យសេតវិមាន លោក Hogan Gidley បានថ្លែងថា ប្រធានាធិបតីអាមេរិកលោក ដូណាល់ ត្រាំ បានថ្លែងដោយសង្ខេបអំពីការបាញ់ប្រហារគ្នានោះ និងកំពុងស៊ើបអង្កេតអំពីស្ថានការណ៍នោះ៕ AFP/SK