ក្រុងហ៊ូឌីដា៖ ប្រភពយោធាបានថ្លែងកាលពីថ្ងៃចន្ទថា ទាហានគាំទ្ររដ្ឋាភិបាលយេម៉ែន និងក្រុមឧទ្ទាមហ៊ូធីប្រហែល ១៥០ នាក់ បានស្លាប់នៅក្នុងការប្រយុទ្ធគ្នា ១ សប្តាហ៍ នៅកំពង់ផែយុទ្ធសាស្ត្រទីក្រុងហ៊ូឌីដាភាគខាងត្បូង។
ប្រទេសយេម៉ែន ដ៏ក្រីក្រមួយនេះ បានធ្លាក់ចូលទៅក្នុងជម្លោះបំផ្លិចបំផ្លាញមួយរវាងក្រុមឧទ្ទាមហ៊ូធីដែលគាំទ្រដោយប្រទេសអ៊ីរ៉ង់ និងកងកម្លាំងរដ្ឋាភិបាលដែលគាំទ្រដោយប្រទេសអារ៉ាប៊ី សាអ៊ូឌីត ដែលបានធ្វើឱ្យមនុស្សរាប់ម៉ឺននាក់ស្លាប់ និងបង្កឱ្យធ្លាក់ចូលទៅក្នុងវិបត្តិមនុស្សធម៌យ៉ាងធ្ងន់ធ្ងរនៅក្នុងប្រទេសមួយនេះ។
ការប៉ះទង្គិចគ្នាជាច្រើនលើកចុងក្រោយបំផុត នៅកំពង់ផែសមុទ្រក្រហមទីក្រុងហ៊ូឌីដា គឺជាអំពើហិង្សាខ្លាំងបំផុតចាប់តាំងពីបទឈប់បាញ់មួយបានចរចានៅក្នុងតំបន់ដោយអង្គការសហប្រជាជាតិបានចូលជាធរមានកាលពីឆ្នាំ ២០១៨ កន្លងមក។
ប្រភពយោធាគាំទ្ររដ្ឋាភិបាលបានថ្លែងថា ក្រុមឧទ្ទាមហ៊ូធីដែលគ្រប់គ្រងកំពង់ផែហ៊ូឌីដា បានវាយប្រហារទៅលើទីក្រុងនៅភាគខាងត្បូង ដែលជាកងកម្លាំងគាំទ្ររដ្ឋាភិបាលបានការពារទីតាំងជាច្រើននៅទីនោះ។
មន្ត្រីម្នាក់របស់កងកម្លាំងគាំទ្ររដ្ឋាភិបាលបានថ្លែងប្រាប់កាសែត AFP ថា៖ «ចំនួនមនុស្សដែលបានបាត់បង់ជីវិតទាំងទាហានរដ្ឋាភិបាល និងក្រុមឧទ្ទាមបានកើនឡើងប្រហែល ១៥០ នាក់ និង ២៦០ នាក់ផ្សេងទៀតបានរងរបួស នៅក្នុងការប្រយុទ្ធគ្នានៅទីនោះ។
ចំនួនសរុបអ្នកបាត់បង់ជីវិតទាំងនោះ ត្រូវបានអះអាងដោយមន្ត្រីប្រចាំតំបន់នៅខាងភាគីក្រុមឧទ្ទាម។
ក្រុមពលរដ្ឋបាននិយាយថា ការប៉ះទង្គិចគ្នារហូតមកទល់ពេលនេះមិនទទួលបានលទ្ធផលនៅក្នុងការគ្រប់គ្រងទឹកដីផ្នែកណាមួយម្តងទៀតនោះទេ សម្រាប់ក្រុមឧទ្ទាម។
បន្ទាប់ពីការប្រយុទ្ធគ្នាយ៉ាងសាហាវកាលពីថ្ងៃសៅរ៍ និងថ្ងៃអាទិត្យ គឺជាការប៉ះទង្គិចគ្នាជាច្រើនលើកយ៉ាងខ្លាំងក្លាកាលពីព្រឹកថ្ងៃចន្ទ។
ប្រភពគាំទ្ររដ្ឋាភិបាល ២ ផ្សេងទៀតបានថ្លែងថា កងកម្លាំងគាំទ្ររដ្ឋាភិបាលបានស្លាប់ ២៧ នាក់ ហើយពួកគេក៏បានសម្លាប់ឧទ្ទាមចំនួន ៤៤ នាក់ នៅក្នុងការវាយបករបស់ពួកឧទ្ទាម។
ក្រុមគ្រូពេទ្យ និងអ្នកជួយសង្គ្រោះបានថ្លែងថា កងកម្លាំងរបស់ភាគីទាំង ២ បានបាត់បង់ជីវិតសរុប ៧០ នាក់ នៅចន្លោះថ្ងៃសៅរ៍ និងថ្ងៃអាទិត្យ។
ក្រុមគ្រូពេទ្យគ្មានព្រំដែនបានថ្លែងនៅលើគេហទំព័រធ្វីធើរថា ក្រុមរបស់ខ្លួននៅក្នុងមន្ទីរពេទ្យ Mocha Trauma បានកំពុងចូលរួមនៅក្នុងផែនការគ្រោះថ្នាក់ដ៏ធំមួយ៕ AFP/SK