ក្រុងបេរូត៖ កាកបាទក្រហមរបស់ប្រទេសលីបង់ (LRC) បានប្រកាសកាលពីថ្ងៃសៅរ៍ថា ចំនួនអ្នករងរបួសនៅក្នុងការតវ៉ា នៅក្នុងទីក្រុងបេរូត បានកើនឡើងរហូតដល់ចំនួន ២៣៨ នាក់ នៅក្នុងប្រទេសមួយនេះ។
យោងតាមសារព័ត៌មានអ៊ីលណាស្រា (Elnashra) ជាកាសែតឯករាជ្យតាមអនឡាញមួយ បានឲ្យដឹងថា កាកបាទក្រហមលីបង់ LRC បានថ្លែងថា មនុស្សចំនួន ៦៣ នាក់បានរងរបួស ត្រូវបានគេបញ្ជូនទៅមន្ទីរពេទ្យ ខណៈមនុស្ស ១៧៥ នាក់ផ្សេងទៀត ត្រូវបានព្យាបាលនៅកន្លែងតវ៉ា។
កាលពីរសៀលថ្ងៃសៅរ៍កន្លងទៅ មនុស្សជាច្រើនពាន់នាក់បានចេញតាមដងផ្លូវ នៅកណ្តាលទីក្រុងបេរូត នៅក្នុងការតវ៉ាប្រឆាំងរដ្ឋាភិបាល ដែលបានទាមទារឲ្យរដ្ឋាភិបាលមួយនេះ រុះរើប្រព័ន្ធនយោបាយនៅក្នុងប្រទេសលីបង់ ជាច្រើនថ្ងៃក្រោយពីមានការផ្ទុះឃ្លាំងស្តុកសារធាតុគីមីយ៉ាងខ្លាំងក្លា បានធ្វើឲ្យកក្រើករដ្ឋធានីលីបង់ ដែលបានបណ្តាលឲ្យមនុស្សយ៉ាងតិច ១៥៨ នាក់ស្លាប់ និងមនុស្ស ៦ ០០០ នាក់ផ្សេងទៀតរងរបួស។
ក្រុមអ្នកតវ៉ាទាំងនោះបានកំពុងព្យាយាមសម្រុកចូលទៅក្នុងរដ្ឋសភាភ្លាមៗនោះ កងកម្លាំងសន្តិសុខបានប្រើឧស្ម័នបង្ហូរទឹកភ្នែក ដើម្បីបំបែកពួកគេចេញពីទីនោះ។
នៅក្នុងការឆ្លើយតបវិញ ពួកគេបានគប់ដុំថ្មទៅលើកងកម្លាំងសន្តិសុខ ហើយបានព្យាយាមរុះរើរបងបន្លាលួស នៅក្នុងការព្យាយាមមួយ ដើម្បីឲ្យចូលទៅជិតរដ្ឋសភានោះ។
ការផ្ទុះទ្រង់ទ្រាយធំ ២ បានធ្វើឲ្យកក្រើកកំពង់ផែនៃទីក្រុងបេរូត កាលពីថ្ងៃអង្គារ នៅប្រហែលម៉ោង ៦ និង ១០ នាទីព្រលប់ ដោយធ្វើឲ្យលាន់សន្ធឹកយ៉ាងខ្លាំង៕ Xinhua/SK