ក្រុងបេរូត៖ ក្រុមឃ្លាំមើលសិទ្ធិមនុស្សមានមូលដ្ឋាននៅអង់គ្លេស បានថ្លែងកាលពីថ្ងៃអាទិត្យថា ការប៉ះទង្គិចគ្នាជាច្រើនលើករវាងកងកម្លាំងរបបស៊ីរីគាំទ្រដោយប្រទេសរុស្ស៊ី និងក្រុមរដ្ឋអ៊ិស្លាម បានបង្កឲ្យក្រុមយុទ្ធជនភាគីទាំង ២ ជាង ៥០ នាក់ស្លាប់ នៅក្នុងការប្រយុទ្ធគ្នារយៈពេល ២ ថ្ងៃ។
ក្រុមឃ្លាំមើលសិទ្ធិមនុស្សស៊ីរីបានថ្លែងថា ការប្រយុទ្ធគ្នា និងការវាយប្រហារផ្លូវអាកាសរបស់រុស្ស៊ី នៅក្នុងខេត្តហ៊ូមភាគកណ្តាល ចាប់តាំងពីល្ងាចថ្ងៃព្រហស្បតិ៍ បានផ្តាច់ជីវិតយុទ្ធជនគាំទ្ររដ្ឋាភិបាលនៃរបបស៊ីរី ២០ នាក់ និងក្រុមជីហាដ ៣១ នាក់ នៅក្នុងការវាយប្រហារនោះ។
ប្រធានឃ្លាំមើលសិទ្ធិមនុស្ស គឺលោក រ៉ាមី អាប់ឌែល រ៉ាហ៍ម៉ាន់ បានថ្លែងថា៖ «ការប្រយុទ្ធគ្នាបានចាប់ផ្តើមធ្វើឡើងនៅយប់ថ្ងៃព្រហស្បតិ៍ដល់ថ្ងៃសុក្រ ដោយក្រុមជីហាដបានវាយប្រហារទៅលើទីតាំងឈរជើងរបស់របបស៊ីរី» នៅជិតទីក្រុងអាល់ស៊ុកហ៍ណា។
ក្រុមជីហាដ IS បានយកតំបន់វាលខ្សាច់បាឌៀដ៏ធំល្វឹងល្វើយនៅស៊ីរីមកគ្រប់គ្រង ទោះបីជាក្រុមនេះ បានបាត់បង់ទឹកដីតូចៗចុងក្រោយកាលពីឆ្នាំមុនរបស់ពួកគេក្តី ក៏ពួកគេនៅតែបើកការវាយប្រហារនៅទីនោះជាប្រចាំ។
ក្រុម IS បានប្រកាសបង្កើតទឹកដី «កាលីហ្វ» ឆ្លងព្រំដែននៅក្នុងផ្នែកជាច្រើននៃប្រទេសស៊ីរី និងប្រទេសអ៊ីរ៉ាក់ កាលពីឆ្នាំ ២០១៤ ប៉ុន្តែយុទ្ធនាការយោធាជាច្រើន បានធ្វើឲ្យក្រុមជីហាដឲ្យចុះខ្សោយ និងបាត់បង់ការគ្រងគ្រងទឹកដីរបស់ខ្លួន។
សង្គ្រាមនៅស៊ីរី បានបង្កឲ្យមនុស្សជាង ៣៨ នាក់ស្លាប់ ចាប់តាំងពីឆ្នាំ ២០១១៕ AFP/SK