ក្រុងតឺតតើរ៖ កងកម្លាំងអាមេនី និងអាស៊ែបៃហ្សង់ បានជាប់ពាក់ព័ន្ធនៅក្នុងការប្រយុទ្ធគ្នាជាថ្មីកាលពីថ្ងៃអង្គារ នៅតំបន់ណាហ្គូរណូ និងការ៉ាបាក់ហ៍ ទោះបីជាស្នើសុំឱ្យមានបទឈប់បាញ់ ១ ក្តី ខណៈអង្គការកាកបាទក្រហមបានព្រមានថា មនុស្សរាប់សែននាក់បានរងផលប៉ះពាល់រួចមកហើយ ដោយសារជម្លោះរវាងប្រទេសទាំង ២។
រដ្ឋមន្ត្រីការបរទេសអាមេរិកលោក ម៉ៃក៍ ប៉ុមប៉េអូ បានស្នើឱ្យភាគីទាំង ២ គោរពបទឈប់បាញ់ ១ ដែលបានឯកភាពគ្នាត្រឹមតែ ៤ ថ្ងៃប៉ុណ្ណោះ នៅក្រុងម៉ូស្គូ ខណៈក្រុមប្រទេសមហាអំណាចខ្លះ កំពុងស្វែងរកដំណោះស្រាយមួយ ដើម្បីដោះស្រាយជម្លោះនោះ ហើយបានព្រមានអំពី «ផលវិបាកមហន្តរាយ» លុះត្រាតែចាត់វិធានការជាបន្ទាន់ ដើម្បីទប់ស្កាត់ជម្លោះនោះ។
យោងតាមចំនួនសរុបបានផ្អែកទៅលើចំនួនខូចខាត ចេញពីភាគីប្រទេសទាំង ២ បានឲ្យដឹងថា ការប្រយុទ្ធគ្នាយ៉ាងស្វិតស្វាញជាង ២ សប្តាហ៍ រវាងគូបដិបក្ខនៅតាមជួរភ្នំ Caucasus បានបង្កឱ្យមនុស្សជិត ៦០០ នាក់ស្លាប់ នៅក្នុងនោះរួមមានជនស៊ីវិលចំនួន ៧៣ នាក់៕ AFP/SK