.jpg)
ក្រុមអ្នកភូមិរត់ភៀសខ្លួន ដោយសារការប្រយុទ្ធគ្នានៅទីប្រជុំជនប៊ូធីដោង។ M. Times
រដ្ឋរ៉ាក់ឃីន៖ មនុស្ស ២ នាក់បានស្លាប់កាលពីថ្ងៃសៅរ៍ និង ៧ នាក់ផ្សេងទៀតរងរបួសនៅក្នុងការវាយប្រហារកាំភ្លើងធំមួយ ដែលបានចំត្រង់ភូមិមួយនៅក្នុងទីប្រជុំជនប៊ូធីដោង នៅក្នុងរដ្ឋរ៉ាក់ឃីន ខណៈកងកម្លាំងរដ្ឋាភិបាល និងក្រុមប្រដាប់អាវុធជនជាតិភាគតិចបានស្តីបន្ទោសចំពោះឧប្បត្តិហេតុនេះ។
លោក ឃីនធូ ខា អ្នកនាំពាក្យកងទ័ពអារ៉ាកាន បាននិយាយថា ពួកគេមិនបានបាញ់ដាក់ទៅលើភូមិនោះទេ ហើយក៏គ្មានការប្រយុទ្ធគ្នាដែរ។
លោកបានប្រាប់កាសែត Myanmar Times កាលពីថ្ងៃអាទិត្យថា៖ «បញ្ហានោះ មិនទាក់ទងជាមួយពួកយើងទាល់តែសោះ។ គ្មានការប្រយុទ្ធគ្នាទេ។ «មនុស្ស ២ នាក់បានស្លាប់ និងមនុស្ស ៧ នាក់ផ្សេងទៀតបានរងរបួស ដោយសារកងកម្លាំង Tatma daw បាញ់កាំភ្លើងធំទៅលើភូមិនោះ»។
យោងតាមអ្នកភូមិបានឲ្យដឹងថា គ្រាប់កាំភ្លើងធំចំនួន ៣ គ្រាប់ បានធ្លាក់ចំភូមិនោះ ក្រោយពីទាហាន Tatmadaw បានចូលទៅក្បែរភូមិឃីង តោង កាលពីរសៀលថ្ងៃសៅរ៍។
Tatmadaw បាននិយាយនៅក្នុងសេចក្តីថ្លែងការណ៍មួយថា កងទ័ពអារ៉ាកានបានបាញ់ពួកគេដោយកាំភ្លើងធំជាច្រើនគ្រាប់ គ្រាប់ ១ នៃគ្រាប់ទាំងនោះ បានចំភូមិឃីងតោង។
Tatmadaw បាននិយាយថា ម្នាក់ក្នុងចំណោមអ្នកដែលស្លាប់ បានស្លាប់នៅនឹងកន្លែង ចំណែកដទៃទៀតបានស្លាប់ ខណៈដែលកំពុងត្រូវបានព្យាបាលនៅមន្ទីរពេទ្យប៊ូធីដោង។ Tatmadaw បានបន្ថែមថា អ្នកភូមិរងរបួស ៧ នាក់ផ្សេងទៀត ត្រូវព្យាបាលនៅមន្ទីរពេទ្យ។
សេចក្តីថ្លែងការណ៍របស់ Tatmadaw បានឲ្យដឹងទៀតថា មានការប៉ះទង្គិចយ៉ាងតិច ៥ លើក ដែលកើតឡើងក្បែរភូមិនោះរវាងទ័ពរដ្ឋាភិបាល និងកងទ័ពអារ៉ាកានពីខែធ្នូ ដល់ថ្ងៃទី ២០ ខែ មករា ឆ្នាំ ២០២០៕ M.Times
