.jpg)
កងកម្លាំងគាំទ្ររដ្ឋាភិបាលស៊ីរីជិះលើរថក្រោះ ខណៈបើកបរនៅតាមដងផ្លូវមួយ។ AFP
ក្រុងដាម៉ាស: ប្រព័ន្ធផ្សព្វផ្សាយព័ត៌មានរដ្ឋស៊ីរី បានរាយការណ៍កាលពីព្រឹកថ្ងៃព្រហស្បតិ៍ថា ការវាយប្រហារផ្លូវអាកាសរបស់ក្រុមចម្រុះដឹកនាំដោយអាមេរិក បានចំលើទីតាំងឈរជើងយោធាជាច្រើនកន្លែងនៅក្នុងតំបន់ភាគខាងកើតនៅក្នុងប្រទេសនេះ ប៉ុន្តែមិនមានអ្នកស្លាប់ឡើយ។
ប្រភពព័ត៌មានយោធាមួយ បានដកស្រង់សម្តីដោយទីភ្នាក់ងារសារព័ត៌មានរដ្ឋសាណា បានឲ្យដឹងថា៖ «ទីតាំងឈរជើងយោធារបស់យើងមួយចំនួននៅចន្លោះក្រុង AlbuKamal និងទីក្រុង Hmeimeh បានរងការវាយប្រហារនាព្រឹកនេះអំឡុងការឈ្លានពានមួយ ដោយយន្តហោះចម្បាំងរបស់ក្រុមចម្រុះអាមេរិក»។
ប្រភពព័ត៌មាននោះ បានថ្លែងប្រាប់ទីភ្នាក់ងារសារព័ត៌មានសាណាថា ការវាយប្រហារនោះគ្រាន់តែបានបណ្តាលឲ្យ «ខូចខាតត្រឹមតែសម្ភារ» ប៉ុណ្ណោះ។
ក្រុង Albu Kamal និងក្រុង Hmeimeh ស្ថិតនៅក្នុងខេត្តឌែរ អេស្ស័រ (Deir Ezzor) ភាគខាងកើតនៅស៊ីរី ជាទីដែលក្រុមកងទ័ពគាំទ្រដោយរុស្ស៊ី និងក្រុមចម្រុះដឹកនាំដោយអាមេរិកបានបើកការវាយប្រហារដាច់ដោយឡែកពីគ្នាប្រឆាំងក្រុមរដ្ឋអ៊ិស្លាម (IS)។
ខ្សែបន្ទាត់តំបន់សុវត្ថិភាពមួយ ត្រូវបានចាប់ផ្តើមអនុវត្ត ចាប់តាំងពីឆ្នាំមុនមានគោលបំណងបញ្ចៀសការវាយប្រហារគ្នា មិនឲ្យប៉ះទង្គិចគ្នា និងបានអនុវត្តតាមបណ្តោយតំបន់ទន្លេអឺហ្រ្វាតស៍ (Euphrates)។
កងទ័ពរបបស៊ីរីឈរជើងនៅភាគខាងលិចទន្លេនេះ ខណៈក្រុមកងទ័ពប្រជាធិបតេយ្យគាំទ្រដោយអាមេរិក (SDF) ឈរជើងនៅក្នុងតំបន់ភាគខាងកើត។
ប្រភពព័ត៌មានយោធាមួយពីកងកម្លាំងចំណុះរដ្ឋាភិបាលស៊ីរី បានឲ្យដឹងថា ការវាយប្រហារនោះ បានយកទីតាំងឈរជើងយោធា ២ កន្លែងរបស់របបស៊ីរី ដែលស្ថិតនៅក្បែរខ្សែត្រៀមសមរភូមិជាមួយនឹងក្រុម IS ជា គោលដៅ៕
