ក្រុងប៉ារីសៈ ការវាយប្រហារជាច្រើនលើកទៅលើវិហារអ៊ិស្លាម ២ កន្លែងនៅប្រទេស នូវែលសេឡង់ ដែលបានបណ្តាលឲ្យមនុស្សយ៉ាងតិច ៤៩ នាក់ស្លាប់កាលពីថ្ងៃសុក្រ នៅក្នុងពិធីសូត្រធម៌បួងសួងរបស់ជនមូស្លីម បានបង្កឲ្យមានការភ័យតក់ស្លុត និងការស្អប់ខ្ពើមយ៉ាងខ្លាំងនៅទូទាំង ពិភពលោក។
លោកស្រីនាយករដ្ឋមន្ត្រី Jacinda Ardern បានថ្លែងថា ការសម្លាប់រង្គាលនៅក្នុងក្រុងគ្រីសឆឺចនេះ គឺជា «ការវាយប្រហារភេរវកម្ម» យ៉ាងច្បាស់ ហើយបានពិពណ៌នាថាជា «ថ្ងៃដ៏ខ្មៅងងឹតបំផុតរបស់ប្រទេស នូវែលសេឡង់»។
ប្រធានាធិបតីអាមេរិក លោក ដូណាល់ ត្រាំ បានសរសេរនៅលើគេហទំព័រធ្វីធើរថា «ខ្ញុំសូមចូលរួមរំលែកទុក្ខយ៉ាងក្រៀមក្រំបំផុត និងសូមបួងសួងឲ្យប្រជាជននូវែលសេឡង់ទាំងអស់ ឆាប់រួចពីទុក្ខភ័យទាំងឡាយ ក្រោយពីមានការ វាយប្រហារយ៉ាងព្រហើនគួរស្អប់ខ្ពើមនៅក្នុងវិហារអ៊ិស្លាមនោះ» ខណៈអ្នកនាំពាក្យរបស់លោក បានប្រកាសថា វា គឺជា «សកម្មភាពវាយប្រហារយ៉ាងសាហាវព្រៃផ្សៃគួរឲ្យស្អប់ខ្ពើម» ជាទីបំផុត។
លោកប្រធានាធិបតីតួកគី រ៉េសិប តៃយីប អេរដូហ្គែន បានថ្លែងថា៖ «ដោយមានការវាយប្រហារ និងជាអរិភាពទៅលើជនមូស្លីម ដែលពិភពលោកតាមដានយ៉ាងយកចិត្តទុកដាក់ និងមិនចង់ឲ្យកើតឡើងនៅទីណាមួយឡើយ ហើយការវាយប្រហារនេះ ឈានទៅកម្រិតនៃការសម្លាប់រង្គាល»។
«ប្រសិនបើគ្មានវិធានការនានាមិនត្រូវបានចាត់ឡើងឲ្យទាន់ពេលវេលានោះទេ ព័ត៌មាននៃគ្រោះមហន្តរាយជាច្រើន នឹងកើតឡើងបន្ទាប់ពីព្រឹត្តិការណ៍ សម្លាប់រង្គាលបែបនេះ»។
ប្រធានាធិបតីអ៊ីស្រាអែល លោក Reuven Rivlin បានសរសេរនៅក្នុងគេហទំព័រធ្វីធើរថា៖ «អំពើឃាតកម្មទៅលើមនុស្សនៅកន្លែងបួងសួងដ៏ស័ក្តិសិទ្ធិបំផុតរបស់ពួកគេ គឺជាទង្វើដ៏ថោកទាប និងគួរឲ្យស្អប់ខ្ពើម។ សម្រាប់មនុស្សទូទៅ ដែលមានសាសនា ខុសៗគ្នា និងអ្នកដែលមិនកាន់សាសនាក្តី ត្រូវតែមានការប្រុងប្រយ័ត្នខ្ពស់។
នាយករដ្ឋមន្ត្រី លោក បេនចាមីន នេតានីយ៉ាហ៊ូ បានថ្លែងថា៖ «ខ្ញុំសូមចូលរួមកាន់ទុក្ខចំពោះការស្លាប់របស់ក្រុមអ្នកគោរពបូជាស្លូតត្រង់នៅក្រុងគ្រីសឆឺច និងសូមថ្កោលទោសអំពើភេរវកម្មមួយនេះយ៉ាងខ្លាំងបំផុត»៕ AFP/SK