ក្រុងស្រីុណាហ្គារៈ ក្រុមមន្ត្រី បាននិយាយថា ទាហានឥណ្ឌា បានទទួលរងការបាត់បង់ថ្មីកាលពីថ្ងៃចន្ទ នៅក្នុងការប្រយុទ្ធយ៉ាងខ្លាំងក្លាជាមួយក្រុមជនសកម្មប្រយុទ្ធកាស្មៀរ ដែលបានបណ្តាលឲ្យមនុស្សយ៉ាងតិច ៧ នាក់ ស្លាប់ ត្រឹមតែប៉ុន្មានថ្ងៃ ក្រោយពីអ្នកវាយប្រហារអត្តឃាតម្នាក់ បានសម្លាប់ទាហានប៉ារ៉ា ៤១ នាក់ នៅក្នុងដែនដីដែលពោរពេញដោយបញ្ហានោះ។
ការប្រឈមមុខដាក់គ្នានោះ បានបង្កើនសម្ពាធទៅលើរដ្ឋាភិបាលឥណ្ឌា ដែលបានស្តីបន្ទោសប៉ាគីស្ថានចំពោះការវាយប្រហារកាលពីថ្ងៃព្រហស្បតិ៍ទៅលើក្បួនរថយន្តយោធាមួយ ដែលបានបង្កឲ្យមានអំពាវនាវរកវិធានការប្រឆាំងនឹងអ្នកជិតខាង និងសត្រូវប្រដាប់ដោយនុយក្លេអ៊ែររបស់ប្រទេសនេះ។
ការបាញ់គ្នាបានបន្តរយៈពេលជាច្រើនម៉ោង ក្រោយពីប្រភពយោធានិងប៉ូលិស បានរាយការណ៍ថា ជនសកម្មប្រយុទ្ធ ២ នាក់ និងជនស៊ីវិលម្នាក់បានស្លាប់នៅក្នុងស្រុក Pulwama ភាគខាងត្បូងក្រុងស្រុីណាហ្គារ ដែលជាក្រុងធំនៅក្នុងដែនដីកាស្មៀរគ្រប់គ្រងដោយឥណ្ឌានោះ។
យោងតាមកងទ័ពឥណ្ឌាបានឲ្យដឹងថា ទាហានមានឋានន្តរសក្តិវរសេនីយត្រីម្នាក់ ស្ថិតនៅក្នុងចំណោមអ្នកស្លាប់នោះដែរ។ ប៉ូលិសបាននិយាយថាទាហានម្នាក់ទៀត និងជនស៊ីវិលម្នាក់ បានរងរបួសយ៉ាងធ្ងន់ធ្ងរ៕ PSA