.jpg)
ប៉ូលិសឈរយាម ខណៈក្រុមសាច់ញាតិគោរពវិញ្ញាណក្ខន្ធជនរងគ្រោះ។ AFP
ក្រុងក្វេតតាៈ មន្ត្រី បាននិយាយកាលពីថ្ងៃពុធថា មន្ត្រីប៉ូលិសប៉ាគីស្ថាន ៦ នាក់បានស្លាប់ នៅក្នុងការវាយប្រហារទៅលើប៉ុស្តិ៍ត្រួតពិនិត្យមួយនៅខេត្តបាលូជីស្ថាននៅភាគនិរតី ជាការវាយប្រហារថ្មីបំផុតនៅក្នុងតំបន់ជ្រួលច្របល់មួយដែលត្រូវបានអះអាងដោយក្រុមតាលីបង់។
ការវាយប្រហារនោះ បានធ្វើឡើងនៅក្នុងតំបន់ជួរភ្នំសាន់ចាវីនៃស្រុកសៀរ៉ាត់ មានចម្ងាយប្រហែល ៨០ គីឡូម៉ែត្រពីក្រុងក្វេតតាភាគខាងកើត។
លោក Qadir Bakhsh ជាមន្ត្រីរដ្ឋាភិបាលជាន់ខ្ពស់ម្នាក់ ប្រចាំនៅស្រុកសៀរ៉ាត់ បានប្រាប់ AFP៖ «នេះ គឺជាការវាយប្រហារភ្លាមៗមួយ។ ក្រុមអ្នកវាយប្រហារបានជិះម៉ូតូជាច្រើនគ្រឿង ហើយបានបាញ់សម្លាប់ប៉ូលិសទាំង ៦ នាក់ភ្លាមៗ»។
លោក Bakhsh បាននិយាយថា ក្រុមខ្មាន់កាំភ្លើងប្រដាប់ដោយអាវុធ គ្រាប់បែកដៃ និងអាវុធស្វ័យប្រវត្តិ ហើយបានរត់គេចខ្លួន ក្រោយការវាយប្រហារកាលពីព្រឹកថ្ងៃពុធ ដោយបន្ថែមថា ប្រតិបត្តិការស្រាវជ្រាវមួយ ត្រូវបានធ្វើឡើងភ្លាមៗនៅក្នុងតំបន់នោះ។
ក្រោយមក ក្រុមតាលីបង់ប៉ាគីស្ថានបានចេញមកអះអាងទទួលខុសត្រូវចំពោះការវាយប្រហារតាមសារអេឡិចត្រូនិកទៅកាន់ប្រព័ន្ធផ្សព្វផ្សាយនានា។
លោក Faisal Agha ដែលជាមន្ត្រីរដ្ឋាភិបាលជាន់ខ្ពស់ទៀត បានអះអាងអំពីការវាយប្រហារ និងចំនួនស្លាប់។
ឧបត្តិហេតុនោះ បានកើតឡើង បន្ទាប់ពីមនុស្សយ៉ាងតិច ៤ នាក់ស្លាប់ និង ៧ នាក់រងរបួស ដោយការបំផ្ទុះគ្រាប់បែកកាលពីថ្ងៃអាទិត្យ៕ AFP/SK
