.jpg)
ក្រុងចាឡាឡាបាដៈ មន្ត្រីបានថ្លែងថា មនុស្សយ៉ាងតិច ១៥ នាក់បានស្លាប់ និង ៣ នាក់ផ្សេងទៀតរងរបួស នៅក្នុងការវាយប្រហារបំផ្ទុះគ្រាប់បែកក្នុងរថយន្តមួយគ្រឿង ដែលបានកំណត់គោលដៅទៅលើ អគាររដ្ឋាភិបាលមួយនៅអាហ្វហ្គានីស្ថានភាគខាងកើត កាលពីថ្ងៃសៅរ៍។
អ្នកនាំពាក្យអភិបាលខេត្ត គឺលោក អាតតុលឡាហ៍ ហ្គូជីអានី បានថ្លែងប្រាប់កាសែត AFP ថា ការបំផ្ទុះគ្រាប់បែកបានធ្វើឡើងនៅកន្លែងអគាររដ្ឋបាលមួយ ដែលក៏ជាកន្លែងស្នាក់នៅរបស់យោធាមួយចំនួន នៅក្នុងស្រុកហ្គានីហ្គែលនៃខេត្តណាហ្គារហារ។
លោកបានថ្លែងថា៖ «ការបំផ្ទុះគ្រាប់បែកនោះ បានចុចបំផ្ទុះនៅកន្លែងច្រកចូលអគារទីស្នាក់ការស្រុក អ្នកវាយប្រហារប្រដាប់អាវុធខ្លះ បានព្យាយាមចូលទៅអគារនោះ ក្រោយពីធ្វើការវាយប្រហារ ប៉ុន្តែត្រូវបានសម្លាប់ដោយកងកម្លាំងសន្តិសុខ»។
អ្នកនាំពាក្យប៉ូលិសខេត្ត គឺលោក ហ្វារីដ ខាន់ បានអះអាងអំពីព័ត៌មានលម្អិតនោះ។
លោកបានថ្លែងថា ក្រុមជនរងគ្រោះភាគច្រើនបំផុត គឺជាសមាជិកកងកម្លាំងសន្តិសុខអាហ្វហ្គានីស្ថាន ប៉ុន្តែជនស៊ីវិលខ្លះ គឺស្ថិតនៅក្នុងចំណោមអ្នកស្លាប់ទាំងនោះ៕ SK
