ក្រុងសាណាៈ គ្រូពេទ្យ និងកងកម្លាំងក្រុមឧទ្ទាម បាននិយាយកាលពីថ្ងៃសៅរ៍ថា ជនស៊ីវិល ៩ នាក់ បានស្លាប់នៅក្នុងការវាយប្រហារផ្លូវអាកាសនាពេលរាត្រីនៅភាគខាងកើតក្រុង Taez នៃប្រទេស យេម៉ែន។
គ្រូពេទ្យម្នាក់ នៅមន្ទីរពេទ្យ Al-Thawra បានថ្លែងប្រាប់ AFP ថា ក្មេង ២ នាក់ នៅក្នុងចំណោមអ្នកស្លាប់ទាំង ៩ នាក់ នៅក្នុងការវាយប្រហារផ្លូវអាកាសរបស់ក្រុមចម្រុះយោធាដឹកនាំដោយអារ៉ាប៊ីសាអ៊ូឌីត ដែលប្រយុទ្ធគាំទ្ររដ្ឋាភិបាល។
គ្រូពេទ្យ ដែលសុំមិនបញ្ចេញឈ្មោះបាននិយាយថា មនុស្សជាច្រើននាក់ទៀត បានរងរបួស។
យោងតាមទីភ្នាក់ងារព័ត៌មាន Saba ដែលគ្រប់គ្រងដោយរដ្ឋបានឲ្យដឹងថា ក្រុមឧទ្ទាមហ៊ូធី បាននិយាយថា ក្រុមចម្រុះនោះ បានយកស្ថានីយប្រេងនៅក្នុងខេត្ត Taez ជាគោលដៅ។
ក្រុង Taez កំពុងត្រូវបានឡោមព័ទ្ធដោយក្រុមឧទ្ទាមហ៊ូធី ដែលជាសម្ព័ន្ធមិត្តរបស់អ៊ីរ៉ង់ ប៉ុន្តែត្រូវបានគ្រប់គ្រងដោយកងកម្លាំងគាំទ្ររដ្ឋាភិបាលដែលត្រូវបានគាំទ្រដោយក្រុមយោធាចម្រុះដឹកនាំដោយអារ៉ាប៊ីសាអ៊ូឌីតនិងប្រទេស អារ៉ាប់រួម។
នៅក្នុងក្រុងសាណា បុណ្យសពត្រូវបានរៀបចំធ្វើសម្រាប់មនុស្ស ៦ នាក់ នៅក្នុងនោះមានបងប្អូន ៤នាក់ ដែលបានស្លាប់នៅក្នុងការវាយប្រហារផ្លូវអាកាសរបស់ក្រុមចម្រុះកាលពីសប្តាហ៍មុន។
ជម្លោះរយៈពេល ៤ ឆ្នាំ នៅប្រទេស យេម៉ែន បានបង្កឲ្យអ្វី ដែលអង្គការសហប្រជាជាតិ ចាត់ទុកថាជាវិបត្តិមនុស្សធម៌អាក្រក់បំផុតនៅក្នុងពិភពលោក ដោយមនុស្សជាង ២៤ លាននាក់ ជាង ២ ភាគ ៣ នៃចំនួនប្រជាជនសរុបកំពុងត្រូវការជំនួយយ៉ាងខ្លាំង។
ប្រជាជនរាប់ម៊ឺននាក់ ភាគច្រើនជាជនស៊ីវិល បានស្លាប់ដោយសង្គ្រាមនៅក្នុងប្រទេសនេះ៕ AFP/PSA