.jpg)
សាច់ញាតិ និងបុគ្គលិកពេទ្យរង់ចាំជនរងគ្រោះនៅច្រកចូលមន្ទីរពេទ្យ។ AFP
ក្រុងកាប៊ុលៈ ក្រុមតាលីបង់ កាលពីថ្ងៃអង្គារ បានអះអាងទទួលខុសត្រូវចំពោះការវាយប្រហារបំផ្ទុះគ្រាប់បែកដាក់ក្នុងរថយន្តយ៉ាងខ្លាំងក្លាមួយនៅក្រុងកាប៊ុល ដែលបានធ្វើឲ្យកក្រើកសង្កាត់នានាដែលនៅជុំវិញនោះ ដោយបានបណ្តាលឲ្យមនុស្សយ៉ាងតិច ៤ នាក់ ស្លាប់ និងជាង ១០០ នាក់ទៀតរងរបួស ជាការវាយប្រហារថ្មីបំផុតនៅក្រុងអាហ្វហ្គានីស្ថាន។
នៅក្នុងសារដ៏ក្រៀមក្រំមួយ ក្រុមសកម្មប្រយុទ្ធ បានប្តេជ្ញាចិត្តធ្វើការវាយប្រហារឲ្យបានច្រើនបន្ថែមទៀតនៅក្នុងក្រុងនេះ ជាការឆ្លើយតបទៅនឹងការតែងតាំងអតីតប្រធានចារកម្ម និងលោក Amrullah Saleh និងជាទាហានជើងចាស់ម្នាក់ ប្រឆាំងក្រុមតាលីបង់ ជារដ្ឋមន្ត្រីមហាផ្ទៃនោះ។
ការផ្ទុះដ៏ខ្លាំងក្លាមួយកាលពីល្ងាចថ្ងៃចន្ទ នៅក្បែរបរិវេណក្រសួងការបរទេស បានធ្វើឲ្យកក្រើកក្រុងកាប៊ុល ហើយការផ្ទុះនោះបានកើតឡើង ខណៈក្រុមអ្នកការទូតកំពុងបង្កើនកិច្ចខិតខំប្រឹងប្រែងរបស់ពួកគេ ដើម្បីបញ្ចប់សង្គ្រាមអស់រយៈពេល ១៧ ឆ្នាំនៅក្នុងប្រទេស អាហ្វហ្គានីស្ថាន ដែលមានការវាយតម្លៃមួយចំនួនថា គឺជាជម្លោះបណ្តាលឲ្យមនុស្សស្លាប់ច្រើនបំផុតនៅក្នុងពិភពលោកនៅឆ្នាំ ២០១៨។
កម្លាំងនៃការបំផ្ទុះនោះ បានធ្វើឲ្យរញ្ជួយនៅទូទាំងក្រុងកាប៊ុល ដោយពីដំបូងបង្កឲ្យមានការយល់ច្រឡំទីតាំងពិតប្រាកដនៃការវាយប្រហារនោះ។
ការវាយប្រហារនោះ បានធ្វើឲ្យផ្ទះសំបែង និងហាងលក់ទំនិញជាច្រើនត្រូវបិទទ្វារ ហើយពលរដ្ឋអាហ្វហ្គានីស្ថាន មានការព្រួយបារម្ភពីសុវត្ថិភាពរបស់ពួកគេ៕ AFP/SK
