ក្រុងម៉ូស្គូ: យោងតាមប្រភពព័ត៌មានពីក្រុមមន្ត្រីបានឲ្យដឹងថា ការវាយប្រហារទៅលើព្រះវិហារគ្រិស្តអរថូដុក កាលពីថ្ងៃសៅរ៍នៅក្នុងសាធារណរដ្ឋឆេឆេនី នៅរុស្ស៊ីភាគខាងត្បូងដែលពលរដ្ឋភាគច្រើនជាជនមូស្លីម បានសម្លាប់ភ្នាក់ងារប៉ូលិស ២ នាក់ និងជនស៊ីវិលម្នាក់ និងបានបណ្តាលឲ្យក្រុមឧទ្ទាម ៤ នាក់ស្លាប់។
ក្រុមមន្ត្រីបានឲ្យដឹងថា៖ «យោងតាមប្រភពព័ត៌មានជាបឋម ភ្នាក់ងារប៉ូលិស ទទួលខុសត្រូវផ្នែកសន្តិសុខនៅព្រះវិហារគ្រិស្ត និងជនស៊ីវិលម្នាក់ត្រូវបានសម្លាប់»។ ពួកគេបានបន្ថែមថា «ក្រុមឧទ្ទាម ៤ នាក់ត្រូវបានសម្លាប់» ខណៈភ្នាក់ងារប៉ូលិស ២ នាក់ផ្សេងទៀតបានរងរបួស។
ពួកគេ ក៏បានចង្អុលបង្ហាញផងដែរថា កូនកាំបិតមួយ និងកាំភ្លើងមួយដើម ត្រូវបានរកឃើញលើខ្លួនរបស់ក្រុមអ្នកវាយប្រហារ នៅពីក្រោយការវាយប្រហារមានគោលដៅលើព្រះវិហារគ្រិស្ត Archangel Michael នៅក្នុងក្រុង Grozny ភាគកណ្តាល និងបានថ្លែងថាក្រុមប៉ូលិស បានការពាររារាំង «លទ្ធផលដ៏ធ្ងន់ធ្ងរជាងនេះ និងក្រុមជនរងគ្រោះជាច្រើននាក់»។
ប្រធានាធិបតី ឆេឆេនី លោក Ramzan Kadyrov បានថ្លែងប្រាប់ក្រុមភ្នាក់ងារសារព័ត៌មានរុស្ស៊ីថា ក្រុមឧទ្ទាម ដែលធ្វើសកម្មភាព «តាមការបញ្ជារបស់ប្រទេសលោកខាងលិចណាមួយ កំពុងស្វែងរកដើម្បីចាប់ខ្លួនក្រុមអ្នកមានជំនឿសាសនាជាចំណាប់ខ្មាំង» នៅក្នុងសាធារណរដ្ឋដែលកំពុងមានបញ្ហាមួយ ជាទីដែលរុស្ស៊ី បានប្រយុទ្ធនៅក្នុងសង្គ្រាមដ៏ស្វិតស្វាញ ២ ជាមួយក្រុមអ្នកបំបែករដ្ឋកាលពីជាង ២០ ឆ្នាំកន្លងទៅ។
បន្ទាប់ពីជម្លោះឆ្នាំ ១៩៩៤-១៩៩៦ លើកដំបូងមកតំបន់នេះបានប្រែក្លាយទៅជាតំបន់អ៊ិស្លាមកាន់តែខ្លាំង និងភាពចលាចល បានរាលដាលទៅពេញទូទាំងតំបន់កូកាសភាគខាងជើង។
នៅក្នុងខែមិថុនាឆ្នាំ ២០១៥ ក្រុមឧទ្ទាមបានចុះចូលជាមួយក្រុមរដ្ឋអ៊ិស្លាម (IS) ហើយតំបន់នេះ បាននាំឲ្យមានការហូរចូលនៃក្រុមយុទ្ធជនជីហាដដ៏ច្រើនលើសលប់ទៅកាន់ទឹកដីស៊ីរី និងអ៊ីរ៉ាក់៕