ក្រុងមេដាន៖ យោងតាមអាជ្ញាធរដែលបានពិពណ៌នាអ្នកវាយប្រហារដែលមានអាយុ ២៤ ឆ្នាំ ថា ចចកមួយក្បាលប៉ុណ្ណោះ បានឲ្យដឹងថា អ្នកវាយប្រហារអត្តឃាតម្នាក់ បានបំផ្ទុះខ្លួនឯងនៅប៉ុស្តិ៍ប៉ូលិសមួយនៅឥណ្ឌូនេស៊ីកាលពីថ្ងៃពុធ ដោយបានបង្កឲ្យរូបគេស្លាប់ និងមនុស្ស ៦ នាក់ផ្សេងទៀតរងរបួស។
ហេតុផលចំពោះការវាយប្រហារនោះ មិនត្រូវបានដឹងភ្លាមៗទេ ប៉ុន្តែប៉ុស្តិ៍ប៉ូលិសជាច្រើន ជាញឹកញយគឺជាគោលដៅសម្រាប់ក្រុមបដិវត្តន៍នៅក្នុងប្រទេសភាគច្រើនមូស្លីមធំបំផុតនៅក្នុងពិភពលោក ដែលបានតស៊ូជាមួយក្រុមជនសកម្មប្រយុទ្ធអ៊ិស្លាម។
ការបំផ្ទុះនោះបានកើតឡើងនៅម៉ោងប្រហែល ៨ និង ៤៥ នាទីព្រឹកនៅបរិវេណប៉ុស្តិ៍ប៉ូលិស នៅក្នុងក្រុងម៉េដាននៅលើកោះស៊ូម៉ាត្រានៅក្នុងអំឡុងពេលហៅបញ្ចីឈ្មោះវត្តមាននៅពេលព្រឹក។
អ្នកនាំពាក្យប៉ូលិសលោក Dedi Prasetyo បានថ្លែងប្រាប់ក្រុមអ្នកកាសែតនៅក្នុងក្រុងហ្សាការតាថា៖ «សម្រាប់ពេលនេះ យើងជឿថា គេគឺជាចចកមួយក្បាលប៉ុណ្ណោះ»។
លោកបានបន្ថែមថា៖ «កងប្រឆាំងភេរវកម្ម និងក្រុមកោសល្យវិច័យ កំពុងត្រួតពិនិត្យកន្លែងកើតអំពើឧក្រិដ្ឋកម្មនោះ»។
លោកបានបន្ថែមថា មនុស្សយ៉ាងតិច ៦ នាក់បានរងរបួស នៅក្នុងការផ្ទុះនោះក្នុងនោះមានមន្ត្រី ៤ នាក់ និងជនស៊ីវិល ២ នាក់ ប៉ុន្តែរបួសរបស់ពួកគេមិនធ្ងន់ធ្ងរទេ។
អ្នកវាយប្រហារនោះ ត្រូវកំណត់អត្តសញ្ញាណថា ជានិស្សិតបានពាក់គ្រឿងផ្ទុះនៅលើខ្លួនរបស់គេ ប៉ុន្តែមិនដឹងថាគ្រឿងផ្ទុះប្រភេទអ្វីទេ៕ AFP