ការស៊ើបអង្កេតមួយបានរកឃើញថា ក្រុមឧក្រិដ្ឋជនកំពុងឃុបឃិតជាមួយកម្លាំងសន្តិសុខបង់ក្លាដែស ដើម្បីទាញប្រាក់ចំណេញពីការសូកប៉ាន់ផ្ទៃក្នុង។ ក្រុមទាំងនោះមានទំនាក់ទំនងជាមួយនាយករដ្ឋមន្ត្រីប្រទេសលោកស្រី Sheikh Hasina។ នេះបើតាមការរាយការណ៍របស់សារព័ត៌មាន Aljazeera។
Haris Ahmed និង AnisAhmed ត្រូវបានកាត់ទោសពីបទឃាតកម្ម ប៉ុន្តែពួកគេទាំង ២ ត្រូវបានការពារដោយបងប្រុសរបស់ពួកគេដែលជាមន្ត្រីយោធាជាន់ខ្ពស់បង់ក្លាដែស។ បន្ទាប់មកពួកគេបានរត់គេចខ្លួនទៅក្រៅប្រទេស ដើម្បីគេចចេញពីការអនុវត្តច្បាប់។
បើតាមរបាយការណ៍ដែលសារព័ត៌មាន Aljazeera បានចេញផ្សាយ អ្នកដែលនៅពីក្រោយការរត់គេចរបស់ពួកគេគឺ Aziz Ahmed ជាមេបញ្ជាការកងទ័ពបង់ក្លាដែសដែលស្និទ្ធជាមួយនាយករដ្ឋមន្ត្រីលោកស្រី Sheikh Hasina និងជាមេដឹកនាំសម្ព័ន្ធ Awami League ដែលកំពុងកាន់អំណាច។
Haris និង Anis Ahmed ដែលត្រូវបានគេរកឃើញថា បានចូលរួមនៅក្នុងការសម្លាប់ លោក Mustafizur Rahman Mustafa ក្នុងឆ្នាំ ១៩៩៦។ លោក Mustafizur Rahman Mustafa ជាសមាជិកគណបក្សនយោបាយមួយដែលជាគូប្រជែងនៅក្នុងទីក្រុងដាក្កា។ បន្ទាប់ពីឃាតកម្មនោះមក Haris និង Anis Ahmed បានរត់ទៅលាក់ខ្លួននៅប្រទេសក្រៅ។
Haris ដែលនៅតែស្ថិតក្នុងបញ្ជីឧក្រិដ្ឋជននៅក្នុងប្រទេសបង់ក្លាដែស បានភៀសខ្លួនទៅកាន់ទីក្រុងប៊ុយដាប៉ែស ប្រទេសហុងគ្រី ហើយបានរស់នៅទីនោះដោយប្រើអត្តសញ្ញាណជា Mohammad Hasan។ រីឯ Anis Ahmed រស់នៅក្នុងទីក្រុងគូឡាឡាំពួ ប្រទេសម៉ាឡេស៊ី បន្ទាប់ពីការកាត់ទោសរបស់គាត់ត្រូវបានតម្កល់ទុកនៅឆ្នាំ២០០៧។
នៅពេលដែល Haris បានផ្លាស់ប្តូរអត្តសញ្ញាណរបស់លោករួចមក លោកបានបង្កើតអាជីវកម្ម និងទិញទ្រព្យសម្បត្តិនៅទ្វីបអឺរ៉ុប។ ការចំណាយរបស់លោក ត្រូវបានចោទប្រកាន់ថា មានការកេងបន្លំលុយពីប្រទេសបង់ក្លាដែស ដែលទទួលបានដោយការសូកប៉ាន់។
តាមការស៊ើបអង្កេតរបស់ Aljazeera បានអះអាងថា Haris រកលុយបានក្នុងនាមជាឈ្មួញកណ្តាលដោយបានទទួលសំណូកជាថ្នូរនឹងការប្រើប្រាស់ទំនាក់ទំនងរបស់លោក ដោយលក់មុខតំណែងក្នុងជួរកងកម្លាំងនគរបាលជាតិ និងដាក្កាក្នុងការឃុបឃិតជាមួយមន្ត្រីជាន់ខ្ពស់។
លោក Haris ទទួលបានប្រាក់ចំណេញ ដែលគាត់បានធ្វើពីកិច្ចសន្យាយោធាដោយប្រើអំណាចបងប្រុសរបស់លោកជាមេបញ្ជាការកងទ័ព ដើម្បីទាញសំណូកជាប្រាក់ចំណេញ។ លោកក៏បានអះអាងថា ការធ្វើសកម្មភាព នេះមានការគាំទ្រពីអ្នកនយោបាយដែលគាត់ធ្លាប់ការពារ។
គួរបញ្ជាក់ផងដែរថា Haris និង Anis ធ្លាប់ជាអង្គរក្សរបស់នាយករដ្ឋមន្ត្រីបង់ក្លាដែស លោកស្រី Sheikh Hasina អំឡុងពេលដែលលោកស្រីជាអ្នកនយោបាយប្រឆាំង និងជាមេដឹកនាំនៃគណបក្ស Awami League ក្នុងឆ្នាំ ១៩៨០ និង ១៩៩០។
កាលពីថ្ងៃទី ៣ កុម្ភៈ រដ្ឋាភិបាលបង់ក្លាដែសបានចេញសេចក្តីថ្លែងការណ៍នៅសារព័ត៌មានជាតិបង់ក្លាដែសថា៖ «ប្រព័ន្ធផ្សព្វផ្សាយដែលមានមូលដ្ឋាននៅកាតា Al Jazeera បានចេញផ្សាយរឿងមួយដែលមានចំណងជើងថា All the Prime Minister''s Men ដែលក្រសួងការបរទេសរបស់យើងបានចេញការឆ្លើយតបរហ័សដោយហៅការរាយការណ៍នេះថា ជាយុទ្ធនាការស្អប់ខ្ពើមនយោបាយដែលមិនពិត និងបរិហារកេរ្តិ៍ហើយបង្កើតឡើងដោយពួកជ្រុលនិយម និងសម្ព័ន្ធមិត្តរបស់ពួកគេ។ នេះបើតាមការរាយការណ៍របស់ The Daily Star។
ការរាយការណ៍នោះបានបន្តថា របាយការណ៍របស់ Aljazeera គ្មានភ័ស្តុតាងដែលភ្ជាប់ទំនាក់ទំនងរវាងនាយករដ្ឋមន្ត្រី និងស្ថាប័នដទៃទៀតឡើយ។
គួរបញ្ជាក់ថា ត្រកូល Ahmed មានបងប្អូន ៥ នាក់។ Josef Ahmed ត្រូវបានគេចាត់ទុកថា ជាឧក្រិដ្ឋជនដែលមានគ្រោះថ្នាក់បំផុតនៅក្នុងប្រទេសបង់ក្លាដែស លោកត្រូវបានកាត់ទោសជាប់ពន្ធនាគារដល់ស្លាប់ពីបទពាក់ព័ន្ធនឹងអំពើឃាតកម្មក្នុងឆ្នាំ ១៩៩៦។ ទោះយ៉ាងណាលោកត្រូវបានដោះលែងនៅខែឧសភា ឆ្នាំ ២០១៨ បន្ទាប់ពីមានការលើកលែងទោសដោយមានការគាំទ្រពីនាយករដ្ឋមន្ត្រីលោកស្រី Sheikh Hasina ។
ប៉ុន្មានសប្តាហ៍ក្រោយមក លោកស្រី Hasina បានតែងតាំងលោក AzizAhmed ដែលជាបងប្រុសរបស់លោក Josef ជាប្រមុខកងទ័ពបង់ក្លាដែស៕