.jpg)
លោក ប្រាយុធ ចាន-អូចា ធ្វើសន្និសីទកាសែតនៅក្រុងបាងកក។ AFP
ក្រុងបាងកក៖ កិច្ចប្រឹងប្រែងជាច្រើន ដើម្បីធ្វើវិសោធនកម្មច្បាប់រដ្ឋធម្មនុញ្ញប្រឈមនឹងឧបសគ្គជាច្រើន ក្រោយពីដៃគូ ២ នៃរដ្ឋាភិបាលចម្រុះនេះ មានការខ្វែងគំនិតគ្នាជុំវិញថា តើនរណាគួរដឹកនាំគណៈកម្មាធិការសភាក្នុងការសិក្សាអំពីការកែប្រែរដ្ឋធម្មនុញ្ញនេះ?
ការធ្វើវិសោធនកម្មរដ្ឋធម្មនុញ្ញ គឺជាកិច្ចការមួយក្នុងចំណោមការងារអាទិភាពចំនួន ១២ ដែលត្រូវបានលម្អិតនៅក្នុងសេចក្តីថ្លែងការណ៍នយោបាយដែលរដ្ឋការរបស់លោក ប្រាយុធ ចាន-អូចា បានប្រកាសនៅចំពោះមុខសភា។
បក្សប្រជាធិបតេយ្យបានលើកឡើងពីការកែប្រែរដ្ឋធម្មនុញ្ញថា ជាលក្ខខណ្ឌដែលត្រូវបំពេញដើម្បីចូលរួមជាមួយរដ្ឋាភិបាលចម្រុះដែលដឹកនាំបក្សប៉ាឡាំងប្រាឆារ៉ាត់ (PPRP)។
បញ្ហានេះ គឺជាឧបសគ្គមួយនៅខាងភាគីរដ្ឋាភិបាល ហើយបច្ចុប្បន្ននេះរដ្ឋសភា កំពុងប្រឹងប្រែងតែងតាំងគណៈកម្មការពិសេសមួយ ដើម្បីសិក្សាអំពីការកែប្រែរដ្ឋធម្មនុញ្ញ។
ក្រុមអ្នកសង្កេតការណ៍នយោបាយជឿថា គណបក្សប្រជាធិតេយ្យ យកចិត្តទុកដាក់យ៉ាងខ្លាំងចំពោះការជំរុញឲ្យដោះស្រាយបញ្ហានេះ ក្រោយពីសមាជិកសភាររបស់ខ្លួននៅសប្តាហ៍នេះបានគាំទ្រអតីតមេដឹកនាំរបស់ពួកគេ គឺលោក អាភីស៊ីត វេចាជីវ៉ា ឲ្យចូលរួមនៅក្នុងគណៈកម្មាធិការនេះនៅក្រោមកូតារបស់ខ្លួន ទោះបីជាលោក អាភីស៊ីត លាលែងពីសមាជិកសភាហើយក្តី។
មានការប៉ាន់ស្មានជាទូទៅថា លោក អាភីស៊ីត ជាអ្នកគាំទ្រចំពោះការកែប្រែរដ្ឋធម្មនុញ្ញឆ្នាំ ២០១៧ នោះ នឹងត្រូវបានតែងតាំងជាប្រធានគណៈកម្មាធិការនេះ។ សមាជិកសភាបក្ស PPRP លោក Weerakorn Khamprakob បានប្រឆាំងចំពោះការតែងតាំងលោក អាភីស៊ីត នេះ៕BKP
