កាលពីថ្ងៃអាទិត្យទី ២ ឧសភា ប្រទេសកូរ៉េខាងជើងបានវាយប្រហាររដ្ឋបាលលោក Biden ដែលត្រៀមបង្ហាញយុទ្ធសាស្ត្ររបស់ខ្លួនសម្រាប់ដោះស្រាយជាមួយក្រុងព្យុងយ៉ាងទាក់ទងនឹងកម្មវិធីនុយក្លេអ៊ែររបស់កូរ៉េខាងជើង។
ទីក្រុងព្យុងយ៉ាងបាននិយាយថា ការអត្ថាធិប្បាយថ្មីៗរបស់ទីក្រុងវ៉ាស៊ីនតោនបានបង្ហាញថា ប្រធានាធិបតីសហរដ្ឋអាមេរិកលោក Joe Biden មានចេតនាក្នុងការរក្សានូវគោលនយោបាយអរិភាពទៅលើប្រទេសខ្លួន។
គួរបញ្ជាក់ផងដែរថា គោលនយោបាយអរិភាពគឺជាការដាក់ទណ្ឌកម្មទៅលើប្រទេសកូរ៉េខាងជើងដែលមានការធ្វើសមយុទ្ធយោធារួមគ្នារវាងសហរដ្ឋអាមេរិក និងកូរ៉េខាងត្បូង។
នៅក្នុងសេចក្តីថ្លែងការណ៍មួយដែលត្រូវបានផ្សព្វផ្សាយនៅលើប្រព័ន្ធផ្សព្វផ្សាយរដ្ឋរបស់ប្រទេសកូរ៉េខាងជើងនៅថ្ងៃទី ២ ឧសភា ក្រសួងការបរទេសកូរ៉េខាងជើងបានហៅការអត្ថាធិប្បាយរបស់លោក Biden ទាក់ទងនឹងកម្មវិធីនុយក្លេអ៊ែរនេះថា ជាការអត្ថាធិប្បាយដែលមិនអាចទទួលយកបាន និងជាកំហុសធំមួយ។
លោក Kwon Jong-gun ជាអគ្គនាយកនៃអគ្គនាយកដ្ឋានកិច្ចការបរទេសសហរដ្ឋអាមេរិកនៃក្រសួងការបរទេសកូរ៉េខាងជើងថ្លែងថា៖ «សេចក្តីថ្លែងការណ៍របស់លោក Biden ឆ្លុះបញ្ចាំងយ៉ាងច្បាស់ពីចេតនារបស់លោកក្នុងការបន្តអនុវត្តគោលនយោបាយអរិភាពទៅលើប្រទេសកូរ៉េខាងជើងដូចដែលសហរដ្ឋអាមេរិកបានធ្វើអស់រយៈពេលជាងកន្លះសតវត្សរ៍មកហើយ»។ នេះបើតាមការរាយការណ៍របស់សារព័ត៌មាន The Guardian ។
សេចក្តីថ្លែងការណ៍របស់ក្រសួងការបរទេសមួយទៀតបានសរសេរថា ការអត្ថាធិប្បាយមុនៗ ដែលរិះគន់ស្ថានភាពសិទ្ធិមនុស្សរបស់កូរ៉េខាងជើងបានជេរប្រមាថសេចក្តីថ្លៃថ្នូររបស់មេដឹកនាំកូរ៉េខាងជើងលោក Kim Jong-un ។
គួរបញ្ជាក់ផងដែរថា កាលពីចុងខែមេសា លោក Biden បានហៅកម្មវិធីនុយក្លេអ៊ែររបស់កូរ៉េខាងជើង និងអ៊ឺរ៉ង់ថាជាការគំរាមកំហែងយ៉ាងធ្ងន់ធ្ងរដល់សន្តិសុខពិភពលោក។ ទីក្រុងវ៉ាស៊ីនតោនគ្រោងនឹងចាត់វិធានការដែលក្រឹតទៅតាមស្ថានការណ៍នៅកូរ៉េខាងជើង។
យោងតាមការដកស្រង់សម្តីរបស់សារព័ត៌មាន BBC លេខានៃក្រុមអ្នកនាំពាក្យនៃសេតវិមានលោកស្រី Jen Psaki បាននិយាយកាលពីថ្ងៃទី ៣០ មេសាថា ការពិនិត្យឡើងវិញនៃគោលនយោបាយរបស់សហរដ្ឋអាមេរិកត្រូវបានបញ្ចប់ ហើយបានស្នើឱ្យលោក Biden រៀនសូត្រពីបទពិសោធរបស់រដ្ឋបាលមុនៗដែលបានព្យាយាមក្នុងការដោះស្រាយបញ្ហានុយក្លេអ៊ែរនៅប្រទេសកូរ៉េខាងជើង ប៉ុន្តែបរាជ័យ។
លោកស្រីបាននិយាយថា៖ គោលនយោបាយរបស់យើងនឹងមិនផ្តោតលើការសម្រេចនូវការចរចាធំនោះទេ ហើយក៏មិនពឹងផ្អែកលើការដោះស្រាយជាយុទ្ធសាស្ត្រដែរ»។ លោកស្រីបានបន្តនិយាយថា ផ្ទុយទៅវិញសហរដ្ឋអាមេរិកនឹងបន្តអនុវត្តវិធីសាស្ត្រជាក់ស្តែងដែលទូលំទូលាយ និងអាចពង្រីកទំនាក់ទំនងការទូតជាមួយប្រទេសកូរ៉េខាងជើងស្តីពីការបង្កើនសន្តិសុខទៅដល់អាមេរិក និងសម្ព័ន្ធមិត្តរបស់ខ្លួន។
សហរដ្ឋអាមេរិកត្រូវបានគេរំពឹងថា នឹងធ្វើជាម្ចាស់ផ្ទះទីប្រឹក្សាសន្តិសុខជាតិជប៉ុន និងកូរ៉េខាងត្បូងសម្រាប់ការពិភាក្សាអំពីការពិនិត្យនូវគោលនយោបាយនោះឡើងវិញនាពេលឆាប់ៗនេះ៕