ក្រុងសេអ៊ូល៖ ប្រទេស កូរ៉េខាងជើង បានអះអាងម្តងហើយម្តងទៀត កាលពីថ្ងៃអង្គារថា ខ្លួនមិនចាប់អារម្មណ៍ចំពោះការរៀបចំកិច្ចពិភាក្សាជាមួយអាមេរិកទេ រយៈពេលប៉ុន្មានម៉ោង មុនពេលប្រេសិតពិសេសនុយក្លេអ៊ែរកំពូល របស់ក្រុងវ៉ាស៊ីនតោន គ្រោងធ្វើដំណើរទៅក្រុងសេអ៊ូល ដើម្បីពិភាក្សាថា តើត្រូវទម្លុះទម្លាយភាពទាល់ច្រក នៅក្នុងការចរចាបញ្ហានុយក្លេអ៊ែរ ជាមួយក្រុងព្យុងយ៉ាង ដោយរបៀបណា?
លោក វ៉ុន ចុង-ហ្គុន ជាអគ្គនាយកនៃក្រសួងការបរទេសកូរ៉េខាងជើងទទួលបន្ទុកដោះស្រាយកិច្ចការអាមេរិកបានធ្វើសុន្ទរកថា នៅក្នុងសេចក្តីថ្លែងការណ៍មួយ ដោយបានថ្លែងថា នៅតែមានមនុស្សនិយាយគ្នាអំពីការសម្របសម្រួលឲ្យមានកិច្ចប្រជុំមួយ រវាងអាមេរិក និងកូរ៉េខាងជើង ទោះបីជានៅក្រោយ លោកស្រី ឆូ ស៊ុន-ហ៊ី អនុរដ្ឋមន្ត្រីការបរទេសទី១ បានបញ្ជាក់យ៉ាងច្បាស់ថា ប្រទេសកូរ៉េខាងជើង នឹងមិនបើកកិច្ចពិភាក្សាជាមួយអាមេរិកជាដាច់ខាត។
លោក វ៉ុន ចុង-ហ្គុន បានថ្លែងនៅក្នុងសេចក្តីថ្លែងការណ៍មួយ ដែលបានចេញផ្សាយដោយទីភ្នាក់ងារសារព័ត៌មានមជ្ឈិមកូរ៉េផ្លូវការ របស់ប្រទេសកូរ៉េខាងជើងថា៖ «ដោយបាននិយាយយ៉ាងច្បាស់ម្តងទៀតថា យើងមិនចាប់អារមុ្មណ៍ក្នុងការអង្គុយទល់មុខគ្នា ជាមួយអាមេរិកនោះទេ»។
កាលពីថ្ងៃសៅរ៍កន្លងទៅ លោកស្រី ឆូ ស៊ុន-ហ៊ី បានធ្វើសេចក្តីថ្លែងការណ៍ស្រដៀងគ្នាថា ប្រទេសកុម្មុយនីស្តមួយនេះ មិនចាំបាច់អង្គុយតុចរចាជាមួយអាមេរិកនោះឡើយ ខណៈកូរ៉េខាងជើង បានចោទប្រកាន់ក្រុងវ៉ាស៊ីនតោនពីបទឆ្លៀតយកផលប្រយោជន៍កិច្ចពិភាក្សា រវាងប្រទេសទាំង ២ ធ្វើជា «ឧបករណ៍មួយដើម្បីដោះស្រាយវិបត្តិនយោបាយរបស់ខ្លួន» នៅអាមេរិក។
សេចក្តីថ្លែងការណ៍របស់លោក វ៉ុន ចុង-ហ្គុន បានធ្វើឡើង ខណៈអនុរដ្ឋមន្ត្រីការបរទេសអាមេរិក លោក ស្តេបហែន ប៊ឺហ្គាន់ ដែលបានប្រើប្រាស់ទាហានស៊ើបយកការណ៍របស់ក្រុងវ៉ាស៊ីនតោនទៅលើប្រទេសកូរ៉េខាងជើង នោះ គ្រោងធ្វើទស្សនកិច្ចទៅកាន់ក្រុងសេអ៊ូលនៅពេលរសៀលថ្ងៃអង្គារនៅចំពេលមានការសន្និដ្ឋានថា លោក ស្តេបហែន ប៊ឺហ្គាន់ អាចស្វះស្វែងរក ដើម្បីចាប់ផ្តើមចរចាបញ្ហាអាវុធនុយក្លេអ៊ែរ ជាមួយកូរ៉េខាងជើងដែលបានជាប់គាំងនោះ។
កិច្ចពិភាក្សាអំពីជំនួបកំពូលមួយទៀត រវាងប្រធានាធិបតីអាមេរិកលោក ដូណាល់ ត្រាំ និងមេដឹកនាំកូរ៉េខាងជើង លោក គីម ជុងអ៊ុន បានបរាជ័យចាប់តាំងពីប្រធានាធិបតីកូរ៉េខាងត្បូង លោក មូន ជេអ៊ីន កាលពីពេលថ្មីៗនេះ បានថ្លែងថា លោកនឹងជំរុញឲ្យមានកិច្ចប្រជុំមួយបែបនេះ ត្រូវធ្វើឡើងនៅមុនការបោះឆ្នោតប្រធានាធិបតីអាមេរិក នៅខែវិច្ឆិកាខាងមុខនេះ។
លោក វ៉ុន ចុង-ហ្គុន បានថ្លែងថា៖ «អនុរដ្ឋមន្ត្រីការបរទេសទី១ របស់យើង កាលពីពេលថ្មីៗនេះ បានបញ្ជាក់យ៉ាងច្បាស់ថា ជំហររបស់លោកស្រីនៅក្នុងសេចក្តីថ្លែងការណ៍មួយជុំវិញពាក្យចចាមអារ៉ាមមិនទាន់ដល់ពេលវេលាសម្រាប់ជំនួបកំពូលរវាងកូរ៉េខាងជើង និងអាមេរិកទេ។ សេចក្តីថ្លែងការណ៍នោះ ក៏បានលើកឡើងអំពីមនុស្សម្នាក់ ដែលបានបង្ហាញបំណងរបស់លោកចង់ធ្វើជាអ្នកសម្របសម្រួលរវាងអាមេរិក និងប្រទេសកូរ៉េខាងជើង៕Yonhap/SK