.jpg)
មេដឹកនាំកូរ៉េខាងជើងលោក គីម ជុងអ៊ុន (កណ្តាល) និងមន្ត្រីជាន់ខ្ពស់របស់លោកចុះទៅមើលកសិដ្ឋានចិញ្ចឹមត្រី។ AFP
ក្រុងសេអ៊ូលៈ កូរ៉េខាងជើងប្រដាប់ដោយអាវុធនុយក្លេអ៊ែរ បានថ្កោលទោសអាមេរិកជុំវិញវិធានការទណ្ឌកម្មថ្មីបំផុតរបស់ខ្លួន ដោយព្រមានក្រុងវ៉ាស៊ីនតោនថា វិធីសាស្ត្រនេះអាចនឹង «បិទផ្លូវឆ្ពោះទៅរកការលុបបំបាត់អាវុធនុយក្លេអ៊ែរនៅ ឧបទ្វីបកូរ៉េជារៀងរហូត»។
បន្ទាប់ពីការផ្សះផ្សាផ្លូវការទូតយ៉ាងឆាប់រហ័សនៅឆ្នាំនេះ ដែលឡើងដល់កម្រិតខ្ពស់បំផុតនៅឯជំនូបកំពូល នៅប្រទេសសិង្ហបុរីកាលពីខែមិថុនា រវាងមេដឹកនាំកូរ៉េខាងជើងលោក គីម ជុងអ៊ុន និងលោកប្រធានាធិបតីអាមេរិក ដូណាល់ ត្រាំនោះ ការរីកចម្រើន បានជាប់គាំងក្នុងកិច្ចពិភាក្សាស្តីពីអាវុធនុយក្លេអ៊ែររបស់ក្រុងព្យុងយ៉ាងនោះ។
នៅប្រទេសសិង្ហបុរីមេដឹកនាំនៃប្រទេសទាំង ២ បានចុះហត្ថលេខាលើសេចក្តីថ្លែងការណ៍ដែលមានខ្លឹមសារមិនច្បាស់លាស់មួយស្តីពីការលុបបំបាត់ អាវុធនុយក្លេអ៊ែរ ប៉ុន្តែចាប់តាំងពីពេលនោះមក ភាគីទាំង ២ មានការខ្វែងគំនិតគ្នាលើកិច្ចព្រមព្រៀងនោះ។
បច្ចុប្បន្ននេះ ក្រុងព្យុងយ៉ាង កំពុងទាមទារឲ្យបន្ធូរបន្ថយទណ្ឌកម្មនិងចាត់ទុកថា ការទាមទាររបស់អាមេរិកឲ្យលុបបំបាត់អាវុធនុយក្លេអ៊ែរនោះថា «ដូចឧក្រិដ្ឋជន» ចំណែកឯក្រុងវ៉ាស៊ីនតោនកំពុងជំរុញបន្តវិធានការទណ្ឌកម្មប្រឆាំងនឹង កូរ៉េខាងជើង «រហូតដល់ឲ្យមានការលុបចោលកម្មវិធីនុយក្លេអ៊ែររបស់ខ្លួនទាំងស្រុង អាចផ្ទៀងផ្ទាត់បាន»។
កាលពីសប្តាហ៍មុន ក្រុង-វ៉ាស៊ីនតោន បានបញ្ចូលឈ្មោះមន្ត្រីកូរ៉េខាងជើង ៣ នាក់ទៀត ទៅក្នុងក្រុមមន្ត្រីដែលត្រូវរង ទណ្ឌកម្មជុំវិញការរំលោភសិទ្ធិមនុស្ស៕
មេដឹកនាំកូរ៉េខាងជើងលោក គីម ជុងអ៊ុន (ឆ្វេង) និងលោកដូណាល់ ត្រាំ។ AFP
