.jpg)
គ្រូពេទ្យលើកបង្ហាញវ៉ាក់សាំង AstraZeneca នាពេលកន្លងមក។ រូបថត AFP
កាលពីថ្ងៃពុធ ទី ៣ មីនា អាជ្ញាធរកូរ៉េខាងត្បូងបានប្រកាសថា ពួកគេកំពុងស៊ើបអង្កេតករណីស្លាប់មនុស្សចំនួន ២ នាក់ ដែលមានជំងឺប្រចាំកាយ បន្ទាប់ពីទទួលវ៉ាក់សាំងកូវីដ ១៩ របស់ក្រុមហ៊ុន AstraZeneca។
ភ្នាក់ងារសារព័ត៌មានកូរ៉េខាងត្បូង Yonhap បានរាយការណ៍ថា បុគ្គលអាយុ ៦៣ ឆ្នាំ ១ រូប ដែលស្នាក់នៅមណ្ឌលថែទាំ និងមានជំងឺសរសៃឈាមខួរក្បាលបានចេញរោគសញ្ញាក្ដៅខ្លួន បន្ទាប់ពីទទួលវ៉ាក់សាំង AstraZeneca។ បុគ្គលនេះត្រូវបានគេបញ្ជូនទៅមន្ទីរពេទ្យ ដែលក្រោយមកបានស្លាប់ដោយសារជាតិពុលកើនឡើងក្នុងឈាម និងរលាកសួត។
បុគ្គល ១ រូបទៀតមានអាយុជាង ៥០ ឆ្នាំ ដែលមានជំងឺបេះដូង និងទឹកនោមផ្អែមបានស្លាប់ កាលពីថ្ងៃពុធ បន្ទាប់ពីគាំងបេះដូងជាច្រើនដង។ បុគ្គលរូបនេះបានទទួលវ៉ាក់សាំងដូចគ្នា ១ ថ្ងៃមុនការស្លាប់។
មន្ត្រី ១ រូបនៃទីភ្នាក់ងារត្រួតពិនិត្យ និងការពារជំងឺកូរ៉េ (KDCA) បានប្រាប់សារព័ត៌មាន Reuter ថា ពួកគេកំពុងស៊ើបរកមូលហេតុបង្កការស្លាប់ទាំង ២ នេះ តែមិនបានបញ្ជាក់បន្ថែមលើការរាយការណ៍របស់ Yonhap ទេ៕
