.jpg)
កាលពីថ្ងៃអង្គារ ទី ៥ កូរ៉េខាងត្បូងប្រកាសថា ខ្លួនបញ្ជូនគណប្រតិភូទៅអ៊ីរ៉ង់ ដើម្បីស្វែងរកដំណោះស្រាយការទូតជាមួយអ៊ីរ៉ង់ជុំវិញនាវាដឹកប្រេងដែលត្រូវបានរឹបអូសដោយកងកម្លាំងអ៊ីរ៉ង់។
សារព័ត៌មានអ៊ីរ៉ង់បានរាយការណ៍ថា កាលពីថ្ងៃចន្ទ នាវា MT HankukChemi និងនាវិកដែលមានសមាជិក ២០ នាក់ក្នុងនោះមានជនជាតិកូរ៉េខាងត្បូង ៥ នាក់ ជនជាតិមីយ៉ាន់ម៉ា ១១ នាក់ ជនជាតិឥណ្ឌូនេស៊ី ២ នាក់ និងវៀតណាម ២ នាក់ ត្រូវបានកងកម្លាំងបដិវត្តន៍អ៊ិស្លាមស្ទាក់ចាប់នៅច្រកសមុទ្រ Homuz ដោយអះអាងថា នាវាបានរំលោភច្បាប់បរិស្ថាន និងកំពុងបំពុលសមុទ្រ។
ក្រុមហ៊ុនកូរ៉េខាងត្បូង ដែលជាម្ចាស់នាវានេះបាននិយាយថា នាវាមានផ្ទុកសារធាតុគីមី ៧ ២០០ តោន ដែលភាគច្រើនជាមេតាណុល ហើយបានច្រានចោលការចោទប្រកាន់ពីការបំពុលផ្លូវទឹក។
ក្រោយពីការរឹបអូសនេះ ក្រសួងការពារជាតិកូរ៉េខាងត្បូងបញ្ជូនអង្គភាពប្រឆាំងចោរកម្មសមុទ្រដែលមានសមាជិក ៣០០ នាក់ និងនាវាចម្បាំង Choi Young ទៅកាន់តំបន់នោះ។
ការរឹបអូសនាវាដឹកប្រេងនេះកើតឡើងនៅពេលដែលទីក្រុងតេអេរ៉ង់ និងសេអ៊ូលជាប់គាំងក្នុងការចរចា ដើម្បីបញ្ចេញទ្រព្យសម្បត្តិអ៊ីរ៉ង់ចំនួន ៧ ពាន់លានដុល្លារ ដែលជាប់គាំងនៅធនាគារកូរ៉េខាងត្បូងចាប់តាំងពីសហរដ្ឋអាមេរិករឹតបន្តឹងទណ្ឌកម្មលើអ៊ីរ៉ង់។ ប្រទេសអ៊ីរ៉ង់ ចង់ប្រើប្រាក់នោះ ដើម្បីទិញវ៉ាក់សាំងកូវីដ ១៩ តាមរយៈកម្មវិធី COVAX របស់ WHO៕
