The Phnom Penh Post Search

Search form

Logo of Phnom Penh Post newspaper Phnom Penh Post - កូរ៉េ​ខាង​ជើង ប្រកាស​រដ្ឋ​ក្នុង​ស្ថានភាព​សង្គ្រាម ជាមួយ​កូរ៉េ​ខាង​ត្បូង អាមេរិក​ថា​អត់​ប្រយោជន៍




កូរ៉េ​ខាង​ជើង ប្រកាស​រដ្ឋ​ក្នុង​ស្ថានភាព​សង្គ្រាម ជាមួយ​កូរ៉េ​ខាង​ត្បូង អាមេរិក​ថា​អត់​ប្រយោជន៍

កូរ៉េ​ខាង​ជើង ប្រកាស​រដ្ឋ​ក្នុង​ស្ថានភាព​សង្គ្រាម ជាមួយ​កូរ៉េ​ខាង​ត្បូង អាមេរិក​ថា​អត់​ប្រយោជន៍

130401_17a
កងទ័ព និងពលរដ្ឋកូរ៉េខាងជើង ជួបជុំគ្នានៅទីលានគីម អ៊ីលស៊ុង ដើម្បីគាំទ្រសេចក្តីថ្លែងការណ៍ទីបញ្ជាការកំពូលកងទ័ពប្រយុទ្ធយកឈ្នះអាមេរិក និងកូរ៉េខាងត្បូង AFP

ក្រុង​សេអ៊ូលៈ ប្រទេស​កូរ៉េ​ខាង​ជើង​បាន​ប្រកាស​កាល​ពី​ថ្ងៃ​សៅរ៍​ថា ខ្លួន​គឺ​ស្ថិត​នៅ​ក្នុង​ស្ថានភាព​សង្គ្រាម​ជាមួយ​ប្រទេស​កូរ៉េ​ខាង​ត្បូង ហើយ​បាន​ព្រមាន​ទី​ក្រុង​សេអ៊ូល និង​វ៉ាស៊ីនតោន​ថា ការ​បង្ក​ហេតុ​ណា​មួយ​នឹង​បង្កើន​ទៅ​ជា​ជម្លោះ​នុយក្លេ​អ៊ែរ ពេញ​បន្ទុក​មួយ​ភ្លាមៗ​។

អាមេរិក​បាន​និយាយ​ថា ខ្លួន​យក​ចិត្ត​ទុក​ដាក់​យ៉ាង​ម៉ឺង​ម៉ាត់​ចំពោះ​ការ​ប្រកាស នេះ ប៉ុន្តែ​បាន​កត់​សម្គាល់​ថា ខ្លួន​នឹង​អនុវត្ត​ទៅ​តាម​គំរូ​ដែល​ធ្លាប់​ធ្វើ ខណៈ​កូរ៉េ​ខាង​ត្បូង​សេអ៊ូល​ភាគ​ច្រើន​បាន​បដិសេធ​ថា​វា​គ្រាន់​តែ​ជា​ការ​គំរាម​ចាស់​ដែល​បំពាក់​ដោយ​សម្លៀក​បំពាក់​ថ្មី​តែ​ប៉ុណ្ណោះ​។

វា​គឺជា​ការ​គំរាម​កំហែង​ថ្មី​បំផុត​មួយ​ក្នុង​ចំណោម​ការ​ប្រកាស​ក្នុង​សំឡេង​ធ្ងន់ៗ​បន្ទាន់​ពី​ទី​ក្រុង​ព្យុងយ៉ាង ដែល​ត្រូវ​គ្នា​នឹង​ការ​ព្រមាន​ខ្លាំងៗ​ពី​ក្រុង​សេអ៊ូល និង​វ៉ាស៊ីនតោន​ដោយ​បញ្ឆេះ​កង្វល់​អន្តរជាតិ​ថា​ស្ថានការណ៍ នេះ​អាច​កើន​ឡើង​ហួស​ពី​ការ​គ្រប់​គ្រង​។

នៅ​ក្នុង​សេចក្តី​ថ្លែង​ការណ៍​រដ្ឋាភិបាល​មួយ​ដែល​ផ្សាយ​ដោយ​ទី​ភ្នាក់​ងារ​សារព័ត៌មាន​មជ្ឈិម​កូរ៉េ កូរ៉េ​ខាង​ជើង​បាន​និយាយ​ថា៖ «ចាប់​ពី​ពេល​នេះ​ទៅ ទំនាក់​ទំនង​អន្តរ​កូរ៉េ បាន​ចូល​ទៅ​ក្នុង​សភាព​នៃ​សង្គ្រាម​មួយ ហើយ​រាល់​បញ្ហា​រវាង​កូរ៉េ​ទាំង​ពីរ​នឹង​ត្រូវ​ដោះ​ស្រាយ​ស្រប​ដោយ​អនុលោម ទៅ​តាម​ពិធីសារ​សង្គ្រាម​»។

សេចក្តី​ថ្លែង​ការណ៍​នោះ​បាន​និយាយ​ថា៖ «​ស្ថានការណ៍​យូរ​អង្វែង​នៅ​ឧបទ្វីប​កូរ៉េ ដែល​មិន​កំពុង​ទទួល​បាន​សន្តិភាព ឬ​ក៏​ស្ថិត​នៅ​ក្នុង​សង្គ្រាម​ដែរ​ទី​បំផុត​ចប់​ហើយ»​ដោយ​បន្ថែម​ថា ការ​បង្ក​ហេតុ​ណា​មួយ​របស់​អាមេរិក ឬ​កូរ៉េ​ខាង​ត្បូង​នឹង​បង្ក​ទៅ​ជា​«​សង្គ្រាម​នុយក្លេអ៊ែរ​មួយ»​។

តាម​លក្ខណៈ​បច្ចេកទេស កូរ៉េ​ទាំង​ពីរ​នៅ​តែ​ធ្វើ​សង្គ្រាម​នឹង​គ្នា​អស់​រយៈ​ពេល​៦​ទសវត្សរ៍​ហើយ​ពី​ព្រោះ​សង្គ្រាម​កូរ៉េ​ឆ្នាំ​១៩៥០-៥៣ ត្រូវ​បាន​បញ្ចប់​ដោយ​កិច្ច​ព្រម​ព្រៀង​ឈប់​បាញ់ មិន​មែន​សន្ធិ​សញ្ញា​សន្តិភាព​ទេ។

កូរ៉េ​ខាង​ជើង​បាន​ប្រកាស​កាល​ពី​ដើម​ខែ​នេះ​ថា ខ្លួន​បាន​ហែក​ចោល​កិច្ច​ព្រម​ព្រៀង​ឈប់​បាញ់ និង​កតិកា​សញ្ញា​សន្តិភាព​ជាច្រើន​ទៀត​ដែល​បាន​ចុះ​ហត្ថលេខា​ជាមួយ​ក្រុង​សេអ៊ូល​ជា​ការ​តវ៉ា​ប្រឆាំង​នឹង​សមយុទ្ធ​យោធា​រួម​គ្នា​រវាង​កូរ៉េ​ខាង ត្បូង-អាមេរិក​។

សេតវិមាន​បាន​ចាត់​ទុក​សេចក្តី​ថ្លែង​ការណ៍​ចុង​ក្រោយ​បំផុត​ពី​ទី​ក្រុង​ព្យុងយ៉ាង​ថា «អត់​ប្រយោជន៍» ហើយ​ខណៈ​យក​ចិត្ត​ទុក​ដាក់​«យ៉ាង​ម៉ឺង​ម៉ាត់»​បាន​ព្យាយាម​ដាក់​កម្រិត​គំរាម​ភ្លាមៗ​នោះ ទៅ​ក្នុង​បរិបទ​។

អ្នក​នាំ​ពាក្យ​ក្រុម​ប្រឹក្សា​សន្តិសុខ​ជាតិ លោក​ស្រី ខេថ្លីន ហៃដេន បាន​និយាយ​ថា៖ «កូរ៉េ​ខាង​ជើង​មាន​ប្រវត្តិសាស្ត្រ​វាយ​ប្រហារ វោហារ និង​គំរាម​ជា​យូរ​មក​ហើយ​ហើយ​ការ​ប្រកាស​ថ្ងៃ​នេះ​ស្រដៀង​ធ្វើ​តាម​គំរូ​ដែល​ធ្លាប់​មាន​»។

នៅ​ក្រុង​សេអ៊ូល​ក្រសួង​បង្រួប​បង្រួម​បាន​ទទូច​ថា ការ​គំរាម​ធ្វើ​សង្គ្រាម​ពិត​ជា​មិន​មែន​ជា​រឿង​ថ្មី​ទេ​។ ក្រសួង​ការពារ​ជាតិ​បាន​ប្តេជ្ញា «ផ្ទាល់​តប​យ៉ាង​ម៉ឺង​ម៉ាត់​»ចំពោះ ការ​បង្ក​ហេតុ​ណា​មួយ ប៉ុន្តែ​បន្ថែម​ថា មិន​មាន​ចលនា​កង​ទ័ព​គួរ​ឲ្យ​កត់​សម្គាល់​ត្រូវ​បាន​ធ្វើ​ឡើង​នៅ​តាម​ព្រំដែន​ទេ។

កាល​ពី​រាត្រី​ថ្ងៃ​សៅរ៍​កូរ៉េ​ខាង​ជើង​បាន​បង្កើន​ការ​គំរាម​របស់​ខ្លួន​ដោយ​ព្រមាន​ថា ខ្លួន​អាច​នឹង​បិទ តំបន់​ឧស្សាហកម្ម កេសុង ដែល​ជា​តំបន់​វិនិយោគ​រួម​គ្នា​រវាង​កូរ៉េ​ខាង​ត្បូង​និង​កូរ៉េ​ខាង​ជើង ដែល​ផ្តល់​ឲ្យ​របប​នោះ​នូវ​រូបិយប័ណ្ណ​រឹង​។

ស្ថាប័ន​រដ្ឋ​មួយ​បាន​និយាយ​ថា ៖​«​យើង​ព្រមាន​ថា វិធាន​ការ​តឹង​រ៉ឹង​នឹង​ត្រូវ​អនុវត្ត បើ​សិន​ជា​កូរ៉េ​ខាង​ត្បូង​នៅ​តែ​បន្ត​និយាយ​ឥត​ពិចារណា ដើម្បី​បង្ខូច​សេចក្តី​ថ្លៃ​ថ្នូរ​របស់​យើង​»ដោយ​បន្ថែម​ថា អនាគត​តំបន់​ឧស្សាហកម្ម​ពឹង​ផ្អែក​ទាំង​ស្រុង​លើ​ឥរិយាបថ​របស់​ក្រុង សេអ៊ូល​។

បង្កើត​ក្នុង​ឆ្នាំ​២០០៤ ជា​និមិត្តរូប​នៃ​កិច្ច​សហ​ប្រតិបត្តិការ​ឆ្លង​ព្រំដែន តំបន់​សេដ្ឋកិច្ច​កេសុង​នៅ​តែ​មាន​សកម្មភាព​ប្រតិបត្តិការ​ទោះ​វិបត្តិ​នៃ​ទំនាក់​ទំនង​អន្តរ​កូរ៉េ​កើត​មាន​ដដែលៗ​ក៏​ដោយ​។

មន្ត្រី​ក្រុង​សេអ៊ូល បាន​និយាយ ថា តំបន់​ឧស្សាហកម្ម​ដែល​នៅ ក្នុង​ទឹក​ដី​កូរ៉េ​ខាង​ជើង​នោះ បាន​និង​កំពុង​ដំណើរ​ការ​ធម្មតា កាល​ពី​ថ្ងៃ​អាទិត្យ ថ្វី​បើ​មាន​ការ​គំរាម​កំហែង​បិទ​ពី​កូរ៉េ​ខាង​ជើង​ក្តី។

ប៉ុន្តែ​មាន​កង្វល់​ជា​ច្រើន​ដែល​ថា ប្រតិបត្តិការ​របស់​តំបន់​នេះ​អាច​រង​ការ​ប៉ះ​ពាល់​ដោយ​សារ​វិធាន​ការ​របស់​ទី​ក្រុង​ព្យុងយ៉ាង​កាល​ពី​ថ្ងៃ​ពុធ​ដែល​បាន​កាត់​ផ្តាច់​ប្រព័ន្ធ​ទូរស័ព្ទ​យោធា​ទាន់​ហេតុ​ការណ៍​ដែល​ប្រើ​ដើម្បី​ត្រួត​ពិនិត្យ​ការ​ធ្វើ​ដំណើរ​ចេញ​និង​ចូល​តំបន់​នោះ។

ទោះ​ជា​យ៉ាង​នេះ​ក្តី ក្រុម​អ្នក​សង្កេត​កាណ៍​ភាគ​ច្រើន​បំផុត​នៅ​តែ​ជឿ​ថា ទង្វើ​នេះ​នឹង​នៅ​តែ​ជា​រឿង​ពាក្យ​សម្ដី​ជា​ជាង​ការ​ប្រយុទ្ធ​ដោយ​កម្លាំង​បាយ។

អ្នក​ជំនាញ​កូរ៉េ និង​ជា​នាយក​ប្រតិបត្តិ​នៃ​មូលនិធិ Mansfield នៅ​ទី​ក្រុង​វ៉ាស៊ីនតោន លោក Gordon Flake បាន​និយាយ​ថា ៖​«​ប៉ុន្មាន​សប្តាហ៍​ថ្មីៗ​នេះ​កូរ៉េ​ខាង​ជើង​បាន​ប្រែ​ក្លាយ​វោហាសាស្ត្រ ទៅ​ជា​សិល្បៈ​សម្តែង​»។

លោក Flake បាន​និយាយ​ថា ៖ «​នៅ​ពេល​ពួកគេ​បាន​ប្រកាស​ចាត់​ទុក​បទ​ឈប់​បាញ់​ជា​មោឃៈ ខ្ញុំ​ពុំ​គិត​ថា​មាន​ការ​ប្រកាស​សង្គ្រាម​កើត​មាន​ជា​ថ្មី​នោះ​ទេ​»។

ប៉ុន្តែ​លោក​បន្ថែម​ថា ស្ថានការណ៍​ពេល​នេះ​បាន​ក្លាយ​ទៅ​ជា​ផុយ​ស្រួយ​ខ្លាំង​ណាស់​រហូត​ដល់​ការ​គិត​អ្វី​មួយ​ខុស​តែ​បន្តិច​នឹង​បង្កើន​សក្តានុពល​សម្រាប់​ការ​កើន​ឡើង​យ៉ាង​ឆាប់​រហ័ស។

ទាំង​ប្រទេស​ចិន និង​រុស្ស៊ី បាន​អំពាវ​នាវ​ឲ្យ​មាន​ភាព​ស្ងៀម​ស្ងាត់​ដោយ​អ្នក​ការ​ទូត​រុស្ស៊ី​ម្នាក់​សម្តែង​កង្វល់​ជា​ពិសេស​ពី​ថ្ងៃ​សៅរ៍​។

ឯកអគ្គរដ្ឋ​ទូត​រុស្ស៊ី នៅ​កូរ៉េ​ខាង​ជើង លោក Grigory Logvinov បាន​ប្រាប់​ទី​ភ្នាក់​ងារ interfax ថា ៖​«​យើង​រំពឹង​ថា គ្រប់​ភាគី​នឹង​បង្ហាញ​ការ​ទទួល​ខុស​ត្រូវ​អតិបរមា និង​អត់​ធ្មត់​»។

បារំាង បាន​ជំរុញ​កូរ៉េ​ខាង​ជើង​កុំ​បង្ក​ហេតុ​ថ្មី​ណា​មួយ និង​វិល​ទៅ​កាន់​ផ្លូវ​ចរចា​វិញ​។ រីឯ​អង់គ្លេស​បាន​ថា​ការ​គំរាម​កំហែង​ធ្វើ​ឲ្យ​ក្រុង​ព្យុងយ៉ាង​ឯកោ៕ CC

អត្ថបទគួរចាប់អារម្មណ៍