កាលពីថ្ងៃពុធ ទី ១២ ឧសភា អង្គការសុខភាពពិភពលោកបានប្រកាសថា កូវីដ ១៩ ប្រភេទ B.1.617 នៅប្រទេសឥណ្ឌា បានរីករាលដាលដល់ ៤៩ ប្រទេស។
ទីភ្នាក់ងារផ្តល់ជំនួយសង្គ្រោះពិភពលោកបាននិយាយថាប្រទេសចំនួន ៧ ក្នុងចំណោម ១០ ដែលបង្កើនចំនួនអ្នកឆ្លងទ្វេដងលឿនបំផុតគឺនៅតំបន់អាស៊ី និងប៉ាស៊ីហ្វិក។
ការកើនឡើងនៃការឆ្លងថ្មីនៅក្នុងប្រទេសឥណ្ឌាបានប៉ះពាល់ទៅប្រព័ន្ធសុខភាពសារធារណៈដោយកង្វះអុកស៊ីហ្ស៊ែនសម្ភារវេជ្ជសាស្ត្រ និងកន្លែងបញ្ចុះសព។ នៅសប្តាហ៍នេះមានសាកសពជាង ១០០ ត្រូវបានគេរកឃើញអណ្តែតនៅក្នុងទន្លេ Ganges។
វីរុសកូរ៉ូណាវ៉ារ្យ៉ង់ B.1.617 ត្រូវបានគេជឿថា ជាកត្តាមួយក្នុងចំណោមកត្តាជាច្រើនដែលនៅពីក្រោយការផ្ទុះដ៏ធំនៃការឆ្លងរាលដាលនៅទូទាំងប្រទេសឥណ្ឌា។
អគ្គលេខាធិការអង្គការសហប្រជាជាតិលោក Antonio Guterres បាននិយាយថា សមត្ថភាពផលិតវ៉ាក់សាំងកូវីដ ១៩ ត្រូវតែកើនឡើងទ្វេដងហើយបានអំពាវនាវឱ្យមានការចែកចាយវ៉ាក់សាំងឱ្យបានត្រឹមត្រូវនៅតាមបណ្តាប្រទេសកំពុងអភិវឌ្ឍន៍។
លោកបានព្រមានថា កង្វះនៃការចាក់វ៉ាក់សាំងនឹងបណ្តាលឱ្យមានបម្រែបម្រួលថ្មីនៅតាមបណ្តាប្រទេសដែលមិនសូវមានលទ្ធភាពក្នុងការទិញវ៉ាក់សាំង៕