.jpg)
ប្រជាជនកូឡុំប៊ី ចូលរួមតវ៉ានៅក្នុងក្រុងហ្គោបូតាកាលពីថ្ងៃទី ២៦ ខែ វិច្ឆិកា ឆ្នាំ ២០១៩។ AFP
ក្រុងបូហ្គោតា៖ ប្រទេស កូឡុំប៊ី បាននិយាយកាលពីថ្ងៃចន្ទថា ខ្លួនបានបណ្តេញពលរដ្ឋវ៉េណេស៊ុយអេឡា ៥៩ នាក់ចេញពីប្រទេស ដោយសារពួកគេចូលរួមក្នុងការតវ៉ានៅតាមដងផ្លូវ ខណៈដែលលោកប្រធានាធិបតី អ៊ីវ៉ាន ឌូគី បានជួបពិភាក្សាជាមួយក្រុមដឹកនាំជំនួញ និងការងារ នៅក្នុងកិច្ចប្រឹងប្រែងបញ្ចប់ការតវ៉ាដោយហិង្សាប្រឆាំងនឹងរដ្ឋាភិបាល។
ក្រុមអ្នកតវ៉ាបានគ្រោងធ្វើការហែក្បួនទ្រង់ទ្រាយធំមួយទៀតកាលពីថ្ងៃចន្ទ ថ្វីបើលោក ឌូគី បានចាប់ផ្តើមពិភាក្សាថ្នាក់ជាតិកាលពីថ្ងៃអាទិត្យ ដើម្បីដោះស្រាយបញ្ហាអំពើពុករលួយវិសមភាពសេដ្ឋកិច្ច និងវិបត្តិដទៃទៀតក្តី។
ទីភ្នាក់ងារទេសន្តរប្រវេសន៍របស់រដ្ឋាភិបាលបាននិយាយថា ពលរដ្ឋវ៉េណេស៊ុយអេឡាទាំងនោះ ត្រូវបានគេចាត់ទុកជាការគំរាមកំហែងដល់សណ្តាប់ធ្នាប់សាធារណៈ និងសន្តិសុខជាតិ។
ចាប់តាំងពីថ្ងៃព្រហស្បតិ៍សប្តាហ៍មុនមក ប្រទេស កូឡុំប៊ី ត្រូវរងប៉ះពាល់ដោយសារការតវ៉ាទ្រង់ទ្រាយធំដែលមិនធ្លាប់មានតាំងពីមុនមកប្រឆាំងនឹងលោក ឌូគី ដែលគ្មានប្រជាប្រិយភាពនោះ ហេតុដូច្នេះហើយរលកនៃកំហឹងរបស់ប្រជាជនសាមញ្ញដោយសារហេតុផលផ្សេងៗ បានរាលដាលនៅទូទាំងប្រទេស អេក្វាទ័រ ស៊ីលី និងប្រទេស បូលីវី។
ប្រជាជនកូឡុំប៊ី ចង់ឲ្យលោកប្រធានាធិបតី អ៊ីវ៉ាន់ ឌូគី ប្រយុទ្ធប្រឆាំងអំពើពុករលួយធ្វើឲ្យការអប់រំសាធារណៈល្អប្រសើរឡើង និងជំរុញឲ្យមានកំណើនសេដ្ឋកិច្ចប្រកបដោយភាពត្រឹមត្រូវ។
ពួកគេក៏ព្រួយបារម្ភអំពីការគ្រប់គ្រងកិច្ចព្រមព្រៀងសន្តិភាពឆ្នាំ ២០១៦ ជាមួយក្រុមឧទ្ទាមឆ្វេងនិយមនៃកងកម្លាំងប្រដាប់អាវុធកូឡុំប៊ី (FARC) ដែលមិនពេញនិយមសម្រាប់ប្រជាជនកូឡុំប៊ីទេ៕ AFP/PSA
