ក្រុងអាថែនៈ ប្រទេសក្រិក កាលពីថ្ងៃអង្គារ បានទាមទារថា តួកគីត្រូវដកនាវារុករកប្រេងមួយគ្រឿងនៅកន្លែងជម្លោះកាន់តែខ្លាំងឡើងរបស់ពួកគេ ជុំវិញសិទ្ធិព្រំដែនសមុទ្រ ហើយបានព្រមានថា ខ្លួននឹងការពារអធិបតេយ្យភាពរបស់ខ្លួន ដោយបានអំពាវនាវឲ្យមានកិច្ចប្រជុំ របស់ក្រុមរដ្ឋមន្ត្រីការបរទេសអឺរ៉ុបបន្ទាន់មួយ ដើម្បីដោះស្រាយវិបត្តិនេះ។
ភាពតានតឹងបានផ្ទុះឡើងកាលពីថ្ងៃចន្ទ នៅពេលក្រុងអង់ការ៉ាបានបញ្ជូននាវារុករកប្រេងអូរូក រីស (Oruc Reis) មួយគ្រឿង ដែលបានអមដំណើរដោយក្រុមនាវាតួកគីជាច្រើនគ្រឿង នៅម្តុំកោះកាស្ទីលឡូរីហ្សូ នៅក្នុងសមុទ្រមេឌីទែរ៉ាណេភាគខាងកើត។
នៅក្នុងសេចក្តីថ្លែងការណ៍តាមទូរទស្សន៍មួយ រដ្ឋមន្ត្រីការបរទេសក្រិក គឺលោក នីកូស ឌែនឌៀស បានស្នើឲ្យក្រុងអង់ការ៉ា ដកនាវាអូរូក រីស (Oruc Reis) ចេញពីដែនសមុទ្រក្រិក «ជាបន្ទាន់»។
លោក ឌែនឌៀស បានថ្លែងថា៖ «យើងបានអំពាវនាវឲ្យតួកគី ចាកចេញពីទឹកដីប្រទេសក្រិកជាបន្ទាន់»។ «យើងសូមបញ្ជាក់យ៉ាងច្បាស់ថា ប្រទេសក្រិក នឹងការពារអធិបតេយ្យភាពរបស់ខ្លួន ក្នុងស្មារតីខ្ពស់បំផុត»៕ Xinhua/SK