.jpg)
ប្រជាជនដែលមកលេង ឬរស់នៅក្បែរផ្សារ Xinfadi ជួបជុំគ្នានៅក្រោមបដាសរសេរថា «Nanxiage» និយាយសំដៅសហគមន៍ ១ នៅក្បែរកន្លែងផ្ទុះវីរុសកូរ៉ូណា។ AFP
ក្រុងប៉េកាំង៖ រដ្ឋធានីរបស់ប្រទេសចិន កាលពីថ្ងៃចន្ទបានខិតខំប្រឹងប្រែងគ្រប់គ្រងការផ្ទុះឡើងនៃវីរុសកូរ៉ូណាជាថ្មី ដោយមានករណីឆ្លង ៧៥ នាក់ ដែលទាក់ទងទៅនឹងផ្សារលក់ម្ហូបអាហារតែមួយគត់នៅក្នុងក្រុងប៉េកាំងជាទីដែលអាជ្ញាធរបានបិទសង្កាត់ជាច្រើន និងបានចាប់ផ្តើមធ្វើតេស្តទ្រង់ទ្រាយធំ និងកម្មវិធីតាមដានវីរុសនេះ។
ការផ្ទុះឡើងនៅក្នុងប្រទេសចិន ជាទីដែលវីរុសនេះ បានកើនឡើងពីដំបូងកាលពីចុងឆ្នាំ ២០១៩ ត្រូវបានយកមកដាក់នៅក្រោមការគ្រប់គ្រងរហូតដល់ករណីឆ្លងថ្មីមួយក្រុមត្រូវបានរកឃើញនៅក្នុងរដ្ឋធានីនេះ កាលពីសប្តាហ៍មុន។
មន្ត្រីសុខាភិបាលបានរាយការណ៍ថា មានករណីឆ្លងវីរុសកូរ៉ូណាថ្មី ៤៩ នាក់ នៅទូទាំងប្រទេសកាលពីថ្ងៃចន្ទ នៅក្នុងនោះមាន ៣៦ នាក់ នៅក្នុងក្រុងប៉េកាំង ដែលការឆ្លងនេះទាក់ទងទៅនឹងផ្សារ Xinfadi បានបង្កឲ្យមានការព្រួយបារម្ភអំពីការឆ្លងរលកទី ២។
លោក Li Junjie ជាមន្ត្រីក្រុងម្នាក់បានថ្លែងនៅឯសន្និសីទមួយថា ករណីឆ្លងជាច្រើនក៏ត្រូវបានរកឃើញនៅផ្សារលក់បោះដុំ Yuquandong នៅក្នុងសង្កាត់ Haidian ភាគឦសាននៃរដ្ឋធានីនេះ។
លោកបានថ្លែងថា ផ្សារនោះត្រូវបានបិទ និងសាលារៀនជាច្រើននៅក្បែរនោះ នឹងត្រូវបិទ ខណៈប្រជាជនដែលរស់នៅក្នុងផ្ទះចំនួន ១០ នៅជុំវិញនោះនឹងត្រូវបង្ខំឲ្យចាកចេញពីផ្ទះរបស់ពួកគេ។
មនុស្សជាច្រើនបានឈរតម្រង់ជួរនៅក្នុងពហុកីឡដ្ឋានមួយ ខណៈការធ្វើតេស្តទ្រង់ទ្រាយធំត្រូវបានធ្វើឡើងនៅក្នុងក្រុងប៉េកាំង ជារដ្ឋធានីនៃប្រទេសនេះជាទីដែលវីរុសនេះ បានកើតឡើងកាលពីឆ្នាំទៅ។
វីរុសរាតត្បាតនេះ កំពុងរាលដាលយ៉ាងឆាប់រហ័សនៅអាមេរិកឡាទីន ហើយអ៊ីរ៉ង់ និងឥណ្ឌា បានរាយការណ៍អំពីការកើនឡើងនៃការស្លាប់ និងការឆ្លងដោយបានបន្ថែមការព្រួយបារម្ភអំពីឧបសគ្គនានា ដែលពិភពលោកនឹងប្រឈមរយៈពេលយូរនៅក្នុងការប្រយុទ្ធប្រឆាំងជំងឺកូវីដ ១៩។
ប៉ុន្តែសម្រាប់ ខណៈពេលនេះព័ត៌មានមានភាពល្អប្រសើរនៅអឺរ៉ុប ដែលភាគច្រើនមើលឃើញថា ចំនួនករណីឆ្លងធ្លាក់ចុះថេរក្នុងរយៈពេលប៉ុន្មានសប្តាហ៍ថ្មីៗនេះ។
ប្រទេសជាច្រើនកំពុងបន្តដកការបិទប្រទេស ដែលបានជួយសង្គ្រោះមនុស្ស ប៉ុន្តែក៏នៅតែប៉ះពាល់ដល់សេដ្ឋកិច្ច និងធ្វើឲ្យប្រជាជនដែលត្រូវគេកំណត់ព្រំដែនឲ្យធ្វើដំណើរនោះ ព្រួយបារម្ភ។
មនុស្សជាង ៤៣០ ០០០ នាក់ នៅទូទាំងពិភពលោកបានស្លាប់ដោយសារជំងឺកូ វីដ ១៩ ហើយរយៈពេលជិតកន្លះឆ្នាំ ដែលមនុស្សច្រើនរាប់មិនអស់ បានជួបនឹងការលំបាក ចំណែកឯសេដ្ឋកិច្ចវិញក៏ត្រូវរងការប៉ះពាល់ដោយវិបត្តិនេះដែរ៕ AFP/PSA
