.jpg)
ទាហានអាមេរិកដើរនៅកន្លែងដែលក្រុមតាលីបង់បានធ្វើការវាយប្រហារ។AFP
ក្រុងកាប៊ុលៈ ក្រសួងការពារជាតិបានថ្លែងកាលពីថ្ងៃចន្ទថា ក្រុមយុទ្ធជនតាលីបង់បានសម្លាប់កងកម្លាំងសន្តិសុខ ១២ នាក់ក្នុងរយៈពេល ៤៨ ម៉ោងចុងក្រោយនៅក្នុងការបន្តវាយប្រហារក្នុងខេត្ត Badghis ភាគខាងលិចអាហ្វហ្គានីស្ថាន។
នៅក្នុងការវាយប្រហារថ្មីបំផុតទៅលើកងកម្លាំងអាហ្វហ្គានីស្ថាន ដែលបានប្រឈមមុខទៅនឹងការបំផ្លិចបំផ្លាញខាតបង់អស់ជាច្រើនក្នុងរយៈពេលប៉ុន្មានឆ្នាំថ្មីៗនេះ ក្រុមយុទ្ធជនតាលីបង់កាលពីសប្តាហ៍មុនបានវាយប្រហារក្រុមខ្សែបណ្តាញរដ្ឋាភិបាល នៅក្បែរក្រុង Bala Murghab ដោយដណ្តើមកាន់កាប់យកទីតាំងឈរជាច្រើនផងដែរ។
នៅក្នុងសេចក្តីថ្លែងការណ៍មួយ ក្រសួងការពារជាតិបានថ្លែងថា៖ «វាគឺជាសេចក្តីទុក្ខយ៉ាងក្រៀមក្រំ យើងសូមប្រកាសថា នៅអំឡុងពេលប្រតិបត្តិការ ទាហានអាហ្វហ្គានីស្ថាន ៨ នាក់ ហើយប៉ូលិស ៤ នាក់ ដែលបានប្រយុទ្ធយ៉ាងអង់អាចក្លាហាន និងលះបង់សាច់ស្រស់ឈាមស្រស់របស់ពួកគេ ដើម្បីជាតិ និងប្រជាជនបានស្លាប់»។
សេចក្តីថ្លែងការណ៍នោះ បានបន្ថែមទៀតថា ទាហាន ១០ នាក់ និងប៉ូលិស ២៤ នាក់ផ្សេងទៀតបានរងរបួសនៅក្នុងការវាយប្រហារដែលបានបណ្តាលឲ្យ «ភេរវករតាលីបង់ ៩៩ នាក់ស្លាប់»។
ក្រុមមន្ត្រីបានថ្លែងថា ប្រតិបត្តិការបោសសម្អាតបានបន្ត នៅក្នុងស្រុកនោះ ហើយកម្លាំងសន្តិសុខ បានជួយក្រុមការងារកាកបាទក្រហមដឹកសាកសពយុទ្ធជនតាលីបង់ចេញពីសមរភូមិ ជាទីដែលពួកគេបានប្រយុទ្ធគ្នានោះ៕ AFP/SK
