ក្រុងកាប៊ុល៖ ក្រុមមន្ត្រីបានថ្លែងថា ក្រុមបំផ្ទុះគ្រាប់បែកអត្តឃាតតាលីបង់ បានកំណត់គោលដៅទៅលើមូលដ្ឋានយោធាអាមេរិកសំខាន់ ១ កន្លែង នៅប្រទេស អាហ្វហ្គានីស្ថាន កាលពីថ្ងៃពុធជាការវាយប្រហារទ្រង់ទ្រាយធំមួយ ដែលបានបង្កឲ្យជនស៊ីវិល ២ នាក់ស្លាប់ និងមនុស្សជាង ៧០ នាក់ផ្សេងទៀតរងរបួស នៅចំពេលចាប់ផ្តើមបន្តការចរចាសន្តិភាពឡើងវិញរវាងអាមេរិក និងក្រុមយុទ្ធជនតាលីបង់។
យោងតាមក្រុមមន្ត្រីនៅក្នុងតំបន់បានឲ្យដឹងថា ការវាយប្រហារនៅពេលព្រឹកព្រលឹមបានចាប់ផ្តើមនៅពេលអ្នកវាយប្រហារអត្តឃាតម្នាក់ បានចុចបំផ្ទុះគ្រាប់បែកបង្កប់នៅក្នុងរថយន្តរបស់លោកនៅខាងក្រៅអគារមន្ទីរពេទ្យមួយនៅជិតមូលដ្ឋានយោធាបា្រហ្គាមនៅខេត្តប៉ារវ៉ាន់ នៅទីក្រុងកាប៊ុលភាគខាងជើង។
ក្រុមមន្ត្រីក្នុងតំបន់បានថ្លែងថា ខ្មាន់កាំភ្លើងជាង ៧ នាក់ មានខ្លះពាក់អាវកាក់បង្កប់គ្រឿងផ្ទុះ ត្រូវបានគេជឿថា បានដើរចូលទៅក្នុងអគារនោះ ដែលស្ថិតនៅក្រោមសំណង់អគារ ហើយមិនបានធ្វើសកម្មភាព ដើម្បីប្រើប្រាស់គ្រឿងផ្ទុះវាយប្រហារប្រឆាំងមូលដ្ឋានយោធា US នៅជិតទីនោះទេ។
អ្នកនាំពាក្យក្រសួងមហាផ្ទៃអាហ្វហ្គានីស្ថានលោក ណាស្រាត រ៉ាហ៊ីមី បានថ្លែងនៅលើគេហទំព័រធ្វីធើរថា ជនអត្តឃាតទាំងអស់នៅក្នុងបរិវេណមន្ទីរពេទ្យនោះ បានស្លាប់នៅក្នុងការប្រយុទ្ធជាមួយកងកម្លាំងអាហ្វហ្គានីស្ថាន និងកងកម្លាំងបរទេស។
លោក រ៉ាហ៊ីមី បានថ្លែងថា ជនស៊ីវិលយ៉ាងតិច ២ នាក់ ក្នុងនោះមានស្ត្រីម្នាក់បានស្លាប់ ខណៈមនុស្ស ៧៣ នាក់ផ្សេងទៀតរងរបួសនៅក្នុងការបំផ្ទុះគ្រាប់បែកនោះ ដែលបានធ្វើឲ្យផ្ទះជាច្រើនខ្នងនៅចម្ងាយ ៣០០ ម៉ែត្រ ពីទីនោះបានរងការខូចខាតទាំងស្រុង។
អ្នកនាំពាក្យក្រុមតាលីបង់បានអះអាងទទួលខុសត្រូវចំពោះការវាយប្រហារនោះ ដោយបញ្ជាក់ថា៖ «ទាហានអាមេរិក និងអាហ្វហ្គានីស្ថានជាច្រើននាក់បានស្លាប់ និងរងរបួស៕ AFP/SK