.jpg)
ទាហានអាហ្វហ្គានីស្ថាន ត្រួតពិនិត្យមើលកន្លែងវាយប្រហារគ្រាប់បែកដាក់ក្នុងរថយន្តនៅក្បែរមូលដ្ឋានទ័ព។ AFP
ក្រុងកាប៊ុល៖ ក្រុមតាលីបង់អាហ្វហ្គានីស្ថាន បានដកបម្រាមមួយមានរយៈពេលច្រើនខែពីគណៈកម្មាធិការកាកបាទក្រហមអន្តរជាតិ (ICRC) ដែលបានធ្វើការនៅក្នុងតំបន់នានាស្ថិតនៅក្រោមការគ្រប់គ្រងរបស់ពួកគេ កាលពីថ្ងៃអាទិត្យ ហើយធានាឲ្យមានសន្តិសុខឡើងវិញសម្រាប់អ្នកដែលកំពុងបំពេញការងារឲ្យអង្គការនោះ។
នៅក្នុងសេចក្តីថ្លែងការណ៍មួយ អ្នកនាំពាក្យក្រុមតាលីបង់ លោក Zabihullah Mujahid បានថ្លែងថា ក្រុមជីវពល និងក្រុមបុគ្គលិកកាកបាទក្រហម «បានយល់ព្រមអនុវត្តកិច្ចព្រមព្រៀងចាស់ស្តីអំពីការសន្យាថ្មីសំខាន់ៗនៅក្នុងការដឹកនាំជំនួយមនុស្សធម៌ទៅកាន់ទឹកដីអ៊ិស្លាម ដែលបានអនុញ្ញាតឲ្យក្រុមបុគ្គលិក ICRC បន្តសកម្មភាពរបស់ពួកគេឡើងវិញនៅទីនោះ»។
សេចក្តីថ្លែងការណ៍នោះ បានបន្ថែមថា ក្រុមយុទ្ធជនសកម្មប្រយុទ្ធតាលីបង់ត្រូវបានគេណែនាំ «ឲ្យបើកផ្លូវសម្រាប់សកម្មភាពការងារ ICRC និងត្រូវផ្តល់សន្តិសុខ និងសម្ភារជូនដល់ក្រុមការងាររបស់គណៈកម្មាធិការនេះ»។
អ្នកនាំពាក្យប្រធានាធិបតីអាហ្វហ្គានីស្ថាន លោក Sediq Sediqqi ថ្លែងអំឡុងសន្និសីទកាសែតនៅក្រុងកាប៊ុល។ AFP
លោក Schaerer Juan Pedro ជាប្រមុខ ICRC ប្រចាំនៅក្រុងកាប៊ុល បានថ្លែងនៅលើគេហទំព័រធ្វីធើរថា៖ «យើងសូមស្វាគមន៍ការទទួលស្គាល់នៃគោលការណ៍មនុស្សធម៌របស់យើង និងការធានាឲ្យមានសន្តិសុខឡើងវិញ ដើម្បីផ្តល់លទ្ធភាពឲ្យយើងធ្វើការនៅក្នុងប្រទេស អាហ្វហ្គានីស្ថាន នៅក្នុងការគាំទ្រដល់មនុស្សដែលរងផលប៉ះពាល់ដោយជម្លោះប្រដាប់អាវុធ»។
កាលពីខែមេសា ក្រុមបះបោរបានដាក់បម្រាមក្រុមបុគ្គលិកកាកបាទក្រហម និងអង្គការសុខភាពពិភពលោក (WHO) មិនឲ្យធ្វើសកម្មភាពផ្តល់ជំនួយមនុស្សធម៌ នៅក្នុងតំបន់ស្ថិតនៅក្រោមការគ្រប់គ្រងរបស់ពួកគេ និងមិនធានាសន្តិសុខដល់ពួកគេទៀតផង។
ក្រុមតាលីបង់ មិនបានលើកឡើងអំពីអង្គការ WHO នៅក្នុងសេចក្តីថ្លែងការណ៍ ដែលខ្លួនបានថ្លែងថា វាបានកើតឡើងបន្ទាប់ពីកិច្ចពិភាក្សាជាមួយអង្គការកាកបាទក្រហម ICRC នៅក្នុងដូហា។
អ្នកនាំពាក្យក្រសួងមហាផ្ទៃលោក Nasrat Rahimi (ស្តាំ) ធ្វើសន្និសីទកាសែតក្រោយ ត្រាំ ចរចាជាមួយតាលីបង់។ AFP
កាលពីខែ សីហា ឆ្នាំ ២០១៨ ក្រុមតាលីបង់ បានដកការធានាសុវត្ថិភាពជាបណ្តោះអាសន្នជូនដល់អង្គការ ICRC នោះ ដោយបានចោទប្រកាន់ក្រុមអង្គការអន្តរជាតិមួយនេះ ពីបទខកខានមិនបានដោះស្រាយកាតព្វកិច្ចបេសកកម្មរបស់ខ្លួន ដើម្បីត្រួតពិនិត្យលក្ខខណ្ឌការឃុំខ្លួននៅក្នុងគុកអាហ្វហ្គានីស្ថាន និងផ្តល់ជំនួយថ្នាំពេទ្យទៅឲ្យក្រុមអ្នកទោសតាលីបង់។
នៅពេលមានការភ័យខ្លាចនៃអំពើហិង្សាកើនឡើងកាន់តែខ្លាំង ជាមួយការបោះឆ្នោតជ្រើសរើសប្រធានាធិបតី ដែលបានរៀបចំធ្វើឡើងនៅចុងខែនេះ កងកម្លាំងអាហ្វហ្គានីស្ថាន និងក្រុមបះបោរតាលីបង់ បានជាប់ទាក់ទងនៅក្នុងការប្រយុទ្ធគ្នាទៅវិញទៅមកយ៉ាងខ្លាំងក្លានៅទូទាំងប្រទេស អាហ្វហ្គានីស្ថាន ដោយមានស្រុកមួយចំនួនដែលបានគ្រប់គ្រងដោយក្រុមជីវពលនៅភាគខាងជើង បានក្នុងដៃរបស់កងកម្លាំងរដ្ឋាភិបាល៕ AFP/SK
