.jpg)
លោក ប្រាយុធ ចាន-អូចា វិលត្រឡប់ពីការគោរពព្រះបដិមាធ្វើអំពីស្ពាន់ដ៏ខ្ពស់១ ក្រោយពីលោកចូលរួមប្រារព្ធខួបលើកទី១៣៣ នៅខេត្តណាខនណាយ៉ុក។BKP
ក្រុងបាងកក៖ ក្រុមគណបក្សនយោបាយបានគាំទ្រដល់ការប្តេជ្ញាចិត្តរបស់លោកនាយករដ្ឋមន្ត្រី ប្រាយុធ ចាន-អូចា ដើម្បីធានាឲ្យធ្វើវិសោធនកម្មច្បាប់រដ្ឋធម្មនុញ្ញ ខណៈគណៈកម្មាធិការសភាកំពុងសិក្សាអំពីការកែប្រែច្បាប់រដ្ឋធម្មនុញ្ញ ដែលបានឯកភាពគ្នាដំបូង ដើម្បីឲ្យអង្គភាពសរសេរសេចក្តីព្រាងច្បាប់រដ្ឋធម្មនុញ្ញឡើងវិញ ត្រូវបានកំពុងបង្កើតឡើង ដើម្បីរៀបចំច្បាប់រដ្ឋធម្មនុញ្ញថ្មីមួយ នៅក្នុងប្រទេសថៃ បច្ចុប្បន្ន។
អនុប្រធានគណបក្សប្រជាធិបតេយ្យ គឺលោក នីភីត អ៊ីនតារ៉ាស៊ុមបាត់ ដែលជាសមាជិកម្នាក់របស់គណៈកម្មាធិការសភាបានថ្លែងប្រាប់កាសែតបាងកកប៉ុស្តិ៍ កាលពីថ្ងៃពុធថា លោកបានជឿជាក់លើលោកឧត្តមសេនីយ៍ ប្រាយុធ ចាន-អូចា ដោយសារលោកមានភាពស្មោះត្រង់ នៅក្នុងការជំរុញឲ្យមានការសរសេរសេចក្តីព្រាងច្បាប់រដ្ឋធម្មនុញ្ញឡើងវិញ ដោយសារវាជាគោលនយោបាយមួយក្នុងចំណោមគោលនយោបាយសំខាន់ៗរបស់រដ្ឋាភិបាល។
«លោកនាយករដ្ឋមន្ត្រី ប្រាយុធ ចាន-អូចា បានថ្លែងថា លោកនឹងស្តាប់គណៈកម្មាធិការសភា ដែលមានសមាជិកចំនួន ៤៩ រូប មកពីគណបក្សផ្សេងៗគ្នា»។
លោក នីភីត អ៊ីនតារ៉ាស៊ុមបាត់ បានថ្លែងថា៖ «លោកក៏បានថ្លែងប្រាប់ទីភ្នាក់ងារជាច្រើន ឲ្យប្រមូលមតិយោបល់ផ្សេងៗពីក្រុមអ្នកតវ៉ានិស្សិត និងសាធារណជន។ លោកបានយកចិត្តទុកដាក់យ៉ាងខ្លាំង ចំពោះអ្វីដែលពួកគេត្រូវតែនិយាយនៅពេលនេះ។ នេះ គឺជាកាយវិការដ៏ទន់ភ្លន់មួយរបស់លោក»។
លោកឧត្តមសេនីយ៍ ប្រាយុធ ចាន-អូចា កាលពីថ្ងៃអង្គារបានអះអាងទៅកាន់ក្រុមអ្នកកាសែតថា លោកបានគាំទ្រឲ្យធ្វើវិសោធនកម្មច្បាប់រដ្ឋធម្មនុញ្ញមួយ ហើយរដ្ឋាភិបាលនឹងបង្ហាញឲ្យមានការសរសេរសេចក្តីព្រាងច្បាប់រដ្ឋធម្មនុញ្ញដោយខ្លួនឯងឡើងវិញ នៅក្នុងកិច្ចប្រជុំសភានៅលើកក្រោយ។
លោក ប្រាយុធ បានថ្លែងកាលពីថ្ងៃពុធថា រដ្ឋាភិបាលនឹងរៀបចំឲ្យមានវេទិកានៅទូទាំងប្រទេសនៅខែក្រោយ ដើម្បីប្រមូលមតិយោបល់ពីក្រុមមនុស្សវ័យក្មេង។ ការធ្វើវិសោធនកម្មច្បាប់រដ្ឋធម្មនុញ្ញមួយ គឺធ្វើទៅតាមការទាមទារ ១ ក្នុងចំណោមការទាមទារជាច្រើន ដែលបានធ្វើឡើងដោយក្រុមនិស្សិត ដែលបានរៀបចំតវ៉ានៅក្នុងតំបន់ផ្សេងៗគ្នា នៅក្នុងប្រទេស។
លោក ប្រាយុធ បានថ្លែងថា លោកនឹងស្វែងរកពេល ដើម្បីជួបជាមួយក្រុមនិស្សិតនៅក្នុងវេទិកាមួយ៕ BKP/SK
