.jpg)
ទិដ្ឋភាពទូទៅបង្ហាញក្រុមអ្នកចូលរួមជំនួបសន្តិភាព ស្តីពីប្រទេស លីប៊ី នៅក្រុងប៊ែរឡាំង។ AFP
បុរីញូវយ៉ក៖ ក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃអង្គារ បានអំពាវនាវឲ្យក្រុមភាគីសង្គ្រាមទាំង ២ នៅលីប៊ី ត្រូវប្រញាប់ប្រញាល់ឲ្យឈានទៅរកបទឈប់បាញ់មួយ ដែលនឹងបើកផ្លូវឲ្យមានដំណើរការនយោបាយមួយ ដោយមានបំណងចង់ឲ្យបញ្ចប់ជម្លោះនៅក្នុងប្រទេសសម្បូរប្រេងនេះ។
កិច្ចប្រជុំអង្គការសហប្រជាជាតិស្តីពីជំនួបកំពូលលីប៊ីនៅចុងសប្តាហ៍ បានរៀបចំធ្វើឡើងនៅក្នុងទីក្រុងប៊ែរឡាំង ដែលត្រូវបានគេមើលឃើញអំពីការបង្កើតគណៈកម្មការយោធាមួយ ដែលត្រូវបានគេសង្ឃឹមថា នឹងបង្ហាញផ្លូវឲ្យមានការចូលរួមផ្អាកការប្រយុទ្ធគ្នានៅក្នុងប្រទេស លីប៊ី។
បទឈប់បាញ់នោះ នឹងរួមបញ្ចូលសមាជិក ៥ ក្រុមមកពីរដ្ឋាភិបាលបានទទួលស្គាល់ដោយអង្គការសហប្រជាជាតិនៅក្នុងទីក្រុងទ្រីប៉ូលី និងក្រុមប្រឆាំងស្មោះត្រង់ជាមួយយោធារបស់បុរសខ្លាំង គឺលោក ហ្គាលីហ្វា ហាហ្វតារ។
ក្រុមប្រឹក្សាសន្តិសុខអង្គការសហប្រជាជាតិបានថ្លែងថា៖ «សមាជិករបស់ក្រុមប្រឹក្សាសន្តិសុខបានស្នើឲ្យក្រុមភាគីជាប់ពាក់ព័ន្ធលីប៊ីទាំងអស់ បង្កើតគណៈកម្មការយោធា ៥ បូក ៥ ដើម្បីរៀបចំឲ្យមានកិច្ចព្រមព្រៀងបទឈប់បាញ់មួយឲ្យបានកាន់តែឆាប់តាមដែលអាចធ្វើទៅបាន»។
លោក អេរដូហ្គែន (កណ្តាល) និងលោក ម៉ៃក៍ ប៉ុមប៉េអូ (ឆ្វេង) ធ្វើដំណើរទៅចូលរួមជំនួបសន្តិភាពស្តីពីលីប៊ី។AFP
ប្រទេស អាហ្វ្រិកខាងជើង បានហែកហួរដោយសារការប្រយុទ្ធគ្នា រវាងក្រុមប្រឆាំងប្រដាប់អាវុធគូបដិបក្ខចាប់តាំងពីមានការបះបោរបានគាំទ្រដោយអង្គការណាតូនៅឆ្នាំ ២០១១ បានសម្លាប់ជនផ្តាច់ការលោក មួម៉ា ហ្គាដាហ្វី ហើយបានទម្លាក់របបរបស់លោក។
ចាប់តាំងពីខែមេសាឆ្នាំមុន រដ្ឋាភិបាលបង្រួបបង្រួមជាតិ (GNA) បានទទួលស្គាល់ដោយអង្គការសហប្រជាជាតិនៅក្នុងទីក្រុងទ្រីប៉ូលី បានវាយបកវិញ ប្រឆាំងយុទ្ធនាការទ្រង់ទ្រាយធំរបស់ក្រុមយុទ្ធជនស្មោះត្រង់ជាមួយលោក ហ្គាលីហ្វា ហាហ្វតារ ដែលបានគាំទ្រដោយក្រុមប្រទេសមួយចំនួន នៅក្នុងនោះមានប្រទេស រុស្ស៊ី អេហ្ស៊ីប អារ៉ាប់រួម និងប្រទេស បារាំង។
នៅថ្ងៃមុនកិច្ចប្រជុំអន្តរជាតិកងកម្លាំងរបស់លោក ហាហ្វតារ បានរាំងខ្ទប់មិនឲ្យនាំប្រេងចេញពីកំពង់ផែសំខាន់របស់ប្រទេស លីប៊ី។
ក្រុងទី្រប៉ូលីជាទីដែលដំណោះស្រាយចំពោះជម្លោះនៅតែមិនប្រាកដប្រជា ទោះបីមានកិច្ចព្រមព្រៀងអន្តរជាតិក្តី។ AFP
វិធាននោះបានធ្វើឲ្យជាប់គាំងប្រភពចំណូលដ៏សំខាន់របស់ប្រទេសមួយនេះ ដើម្បីប្រឆាំងការសម្រេចចិត្តរបស់ប្រទេស តួកគី ដែលបានបញ្ជូនកងកម្លាំង ដើម្បីគាំទ្រក្រុមគូបដិបក្ខលោក ហាហ្វតារ។
យោងតាមអង្គការ UN បានឲ្យដឹងថា គណៈកម្មការយោធាត្រូវបានគេរំពឹងថា នឹងជួបប្រជុំគ្នានៅប៉ុន្មានថ្ងៃខាងមុខនេះ ដោយបានបង្កើនការងារជាមួយការបើកចំហឲ្យមានបទឈប់បាញ់ដ៏ផុយស្រួយ ឲ្យឈានទៅរកបទឈប់បាញ់ជាអចិន្រ្តៃយ៍មួយ ធ្វើទៅតាមការស្នើសុំរបស់ក្រុមមេដឹកនាំអន្តរជាតិ នៅក្នុងទីក្រុងប៊ែរឡាំង។
បទឈប់បាញ់ត្រូវបានគាំទ្ររួមរុស្ស៊ី និងតួកគី ហើយបានរៀបចំធ្វើឡើងយ៉ាងទូលំទូលាយ និងចូលជាធរមាននៅថ្ងៃទី ១២ ខែមករា៕ AFP/SK
