ក្រុងតេហ្គូស៊ីហ្គាល់ប៉ាៈ ក្រុមមន្ត្រីសុខាភិបាល បាននិយាយថា តម្រួតយោធាហុងឌូរ៉ាស់ បានបើកការបាញ់ប្រហារទៅលើក្រុមនិស្សិត ដែលកំពុងធ្វើការតវ៉ាកាលពីថ្ងៃចន្ទ ដោយបានបង្កឲ្យមនុស្សយ៉ាងតិច ៥នាក់ រងរបួស។
និស្សិតរាប់រយនាក់នៅសាកលវិទ្យាល័យស្វយ័តជាតិនៃក្រុងហុងឌូរ៉ាស់ កំពុងទាមទារឲ្យលោកប្រធានាធិបតី Juan Orlando Hernandez ចុះចេញពីតំណែង ក្រោយពីការមានបាតុកម្មប្រឆាំងនឹងរូបលោកកាលតែខ្លាំងឡើងកាលពីសប្តាហ៍មុន នៅពេលដែលមនុស្ស៣នាក់ បានស្លាប់នៅអំឡុងការតវ៉ានោះ។
លោក Armando Sarmiento ប្រធានផ្នែកអភិវឌ្ឍន៍ស្ថាប័ននៅសាកលវិទ្យាល័យមានមូលដ្ឋាននៅក្រុងតេហ្គូស៊ីហ្គាល់ប៉ា បានថ្លែងប្រាប់ AFPថា៖ «តម្រួតយោធាប្រហែល ៤០ នាក់បានចូលទៅក្នុងបរិវេណសាកលវិទ្យាល័យដោយគ្មានការអនុញ្ញាត»។
លោក Sarmiento បានបន្ត ថា ពួកគេដេញចាប់ក្រុមនិស្សិត ដោយបានបាញ់ពួកគេដោយប្រើគ្រាប់ពិត៕ PSA