ក្រុងបេរូត: ក្រុមអ្នកឃ្លាំមើល បានឲ្យដឹងថា ក្រុមយុទ្ធជនដំបូងរបស់ក្រុមរដ្ឋអ៊ិស្លាម (IS) បានចាកចេញពីតំបន់ឈរជើងចុងក្រោយរបស់ពួកគេនៅក្នុងរដ្ឋធានីនៅស៊ីរី នៅព្រឹកថ្ងៃអាទិត្យ ក្រោមកិច្ចព្រមព្រៀងមួយបង្កើតឡើងបន្ទាប់ពីការប្រយុទ្ធគ្នាដ៏ស្វិតស្វាញជាច្រើនសប្តាហ៍។
លោក Rami Abdel Rahman ប្រមុខរបស់ក្រុមឃ្លាំមើលសិទ្ធិមនុស្ស ស៊ីរី (SOHR) មានមូលដ្ឋាននៅអង់គ្លេសបានឲ្យដឹងថា៖«នៅពេលព្រឹកព្រហាមក្រុមយុទ្ធជនISនិងក្រុមសាច់ញាតិរបស់ពួកគេ៦រថយន្តក្រុងបានចាកចេញពីជំរំប៉ាឡេស្ទីន Yarmuk និងសង្កាត់ Tadamun ដែលនៅកៀកគ្នា»។
លោកAbdel Rahmanបានឲ្យដឹងថាក្រុមរថយន្តក្រុងទាំងអស់នោះធ្វើដំណើរឆ្ពោះទៅកាន់តំបន់វាលខ្សាច់ដ៏ល្វឹងល្វើយនៅស៊ីរីជាទីដែលក្រុមISត្រួតត្រាដែនដីមួយចំនួន។
លោកមិនមានព័ត៌មានលម្អិតអំពីចំនួនមនុស្សដែលជិះនៅលើរថយន្តទាំងនោះឡើយ ប៉ុន្តែ បាននិយាយឲ្យដឹងថា ពួកគេភាគច្រើនគឺជាសាច់ញាតិរបស់ក្រុមជីហាដនិងមិនមានប្រដាប់អាវុធឡើយ។
ការជម្លៀសនេះបានធ្វើឡើងមួយថ្ងៃបន្ទាប់ពីកិច្ចព្រមព្រៀងមួយត្រូវបានបង្កើតឡើង ដើម្បីបញ្ចប់ការវាយប្រហាររយៈពេលមួយខែដ៏សាហាវមួយ ដើម្បីបណ្តេញក្រុម IS ចេញពីទីតាំងឈរជើងចុងក្រោយនៅក្នុងទីក្រុងដាម៉ាសភាគខាងត្បូង៕