.jpg)
អគ្គមេបញ្ជាការកងទ័ពមីយ៉ាន់ម៉ាលោកឧត្តមសេនីយ៍ Min Aung Hlaing (កណ្តាល) និងក្រុមមេបញ្ជាការយោធាមកចូលរួមសមយុទ្ធយោធា។ AFP
ក្រុងវ៉ាស៊ីនតោនៈ ក្រុមសមាជិកព្រឹទ្ធសភាកាលពីថ្ងៃពុធ បានស្នើឲ្យអាមេរិកដាក់ទណ្ឌកម្មទៅលើប្រមុខកងទ័ពមីយ៉ាន់ម៉ា ដោយបាននិយាយថា មានកិច្ចការជាច្រើនទៀត ដែលត្រូវធ្វើ ដើម្បីនាំឲ្យមាន ការទទួលខុសត្រូវចំពោះក្រុមជនរ៉ូហ៊ីងយ៉ា។
នៅក្នុងលិខិតផ្ញើជូនលោករដ្ឋមន្ត្រីការបរទេស ម៉ៃក៍ ប៉ុមប៉េអូ និងលោករដ្ឋមន្ត្រីរតនាគារជាតិ Steven Mnuchin ព្រឹទ្ធសភា ៤ រូប បានថ្លែងថា មីយ៉ាន់ម៉ា មិនបានបង្ហាញពីសញ្ញានៃការរីកចម្រើនគួរឲ្យទុកចិត្តទេ ថ្វីបើមានការថ្កោលទោសពីអន្តរជាតិទៅលើការសម្លាប់រង្គាល និងអំពើហិង្សាលើភេទប្រឆាំងនឹងក្រុមសមាជិកនៃជនភាគតិចមូស្លីម។
ក្រុមសមាជិកព្រឹទ្ធសភាក្នុងនោះមាន Dick Durbin សមាជិកព្រឹទ្ធសភាបក្សប្រជាធិបតេយ្យលេខ ២ បានថ្លែងថា ទណ្ឌកម្មប្រឆាំងប្រមុខកងទ័ពមីយ៉ាន់ម៉ា លោកឧត្តមសេនីយ៍ Min Aung Hlaing និងមន្ត្រីកំពូលៗជាច្រើនរូបទៀត នឹងបង្ហាញពីការមិនអាចអត់ឱនឲ្យបានរបស់អាមេរិកចំពោះទង្វើរំលោភសិទ្ធិមនុស្ស។
ក្រុមសមាជិកព្រឹទ្ធសភាដែលរួមមានសមាជិកព្រឹទ្ធសភាបក្សសាធារណរដ្ឋលោក Todd Young នៃរដ្ឋអ៊ីនដៃអាណាដែលបានកា្លយជាមជ្ឈមណ្ឌលសម្រាប់ជនភៀសខ្លួនមកពីមីយ៉ាន់ម៉ា បានសរសេរថា៖ «រដ្ឋការរបស់លោក ត្រាំ នឹងផ្ញើសារមួយដែលថា អាមេរិកគាំទ្រការទទួលខុសត្រូវចំពោះអ្នកដែលប្រព្រឹត្តការរំលោភសិទ្ធិមនុស្ស ដែលមានឯកសារត្រឹមត្រូវប្រឆាំងនឹងក្រុមជនរ៉ូហ៊ីងយ៉ា និងជនភាគតិចដទៃទៀត»។
ក្រសួងរតនាគារជាតិ កាលពីខែសីហា បានដាក់ទណ្ឌកម្មទៅលើមេបញ្ជាការ ៤ រូបដែលត្រូវបានចោទប្រកាន់ពីបទសម្លាប់មនុស្ស៕ AFP/PSA
