.jpg)
ក្រុមអ្នកជួយសង្គ្រោះសែងអ្នករងរបួសទៅមន្ទីរពេទ្យ ក្នុងការផ្ទុះនៅក្នុងព្រះវិហារមួយកន្លែង។ AFP
ក្រុងចាឡាឡាបាដ៖ ក្រុមមន្ត្រីបានថ្លែងថា ក្រុមអ្នកភូមិបានស្វែងរកសាកសពមនុស្សជាទីស្រឡាញ់របស់ពួកគេរៀងៗខ្លួនកាលពីថ្ងៃសៅរ៍នៅក្នុងគំនរបាក់បែកនៃព្រះវិហារអ៊ិស្លាមមួយកន្លែង នៅអាហ្វហ្គានីស្ថានភាគខាងកើត ដែលបានបាក់រលំដោយសារការផ្ទុះមួយកាលពីថ្ងៃសុក្រ ដោយបានបង្កឲ្យមនុស្ស ៧០ នាក់ស្លាប់ នៅក្នុងនោះមានក្មេងរាប់សិបនាក់ផងដែរ។
ការវាយប្រហារដែលបានបណ្តាលឲ្យមនុស្សស្លាប់ច្រើនបំផុតលើកទី ២ របស់ប្រទេស អាហ្វហ្គានីស្ថាន នៅឆ្នាំនេះ បានកើតឡើងនៅក្នុងស្រុកហាស្កា មីណា នៃខេត្តណាងហ្គារហារភាគខាងកើត ហើយបានបង្កឲ្យមនុស្សយ៉ាងតិច ៣៦ នាក់រងរបួស នៅក្នុងការវាយប្រហារនោះ។
អ្នកនាំពាក្យអភិបាលខេត្តលោក Attaullah Khogyani បានថ្លែងប្រាប់ AFP ថា៖ «យើងបានរាយការណ៍ថា ចំនួនអ្នកស្លាប់បានកើនឡើងដល់់ ៧០ នាក់ នៅក្នុងឧប្បត្តិហេតុកាលពីថ្ងៃសៅរ៍»។
លោកបានថ្លែងថា៖ «យើងបានបញ្ជូនជំនួយទៅកាន់ស្រុកនោះ ដែលរួមមានស្បៀងអាហារ និងសម្ភារផ្សេងៗមួយចំនួនទៀត»។
ក្រុមសាក្សីបាននិយាយថា ដំបូលព្រះវិហារបានបាក់ធ្លាក់សង្កត់លើក្រុមអ្នកបួងសួង ក្រោយពីមានការផ្ទុះមួយបាន «ឮឡើង» នៅទីនោះ លោកអភិបាលស្រុកហ្គូជីយ៉ានីបានថ្លែងថា ឧប្បត្តិហេតុដែលបានបង្កឲ្យមនុស្សស្លាប់នោះ ត្រូវបាននិងកំពុងស៊ើបអង្កេត។
ក្រុមអ្នកស្ម័គ្រចិត្តសែងបុរសរងរបួសម្នាក់ទៅកាន់មន្ទីរពេទ្យ នៅស្រុកហាស្កា មីណា។ AFP
អ្នកនាំពាក្យក្រសួងអប់រំខេត្តណាងហ្គារហារ លោក អាស៊ីប ស៊ីនវ៉ារី បានថ្លែងថា ជនរងគ្រោះយ៉ាងតិច ២៧ នាក់ គឺជាក្មេងសិស្សសាលា។
លោកបានថ្លែងប្រាប់ AFP ថា៖ «ក្មេងសិស្សសាលាទាំងនោះ គឺជាសិស្សថ្នាក់ទី ៩ ដល់ថ្នាក់ទី ១០ ហើយក្មេងសិស្សសាលា ១៦ នាក់ បានរងរបួស» ដោយបានបន្ថែមថា ជាធម្មតាក្មេងទាំងនោះ បានសិក្សានៅឯព្រះវិហារក្រោយពីពួកគេបានបួងសួងរួច។
យោងតាមក្រុមពលរដ្ឋនៅទីនោះបានឲ្យដឹងថា ក្រុមអ្នកគោរពបូជាប្រហែល ៣៥០ នាក់ នៅក្នុងព្រះវិហារនៅពេលការផ្ទុះបានកើតឡើង។
ពលរដ្ឋម្នាក់លោក អូម៉ារ ហ្គូរហ្សាង បាននិយាយថា៖ «យើងនៅតែកំពុងស្វែងរកសាកសពទាំងនោះ ភាគច្រើនក្នុងចំណោមអ្នកស្លាប់ជាក្មេងសិស្សសាលា ឬក្មេងប្រុសស្ថិតក្រោមអាយុ ១៨ ឆ្នាំ»។
គ្មាននរណាម្នាក់អះអាងទទួលខុសត្រូវចំពោះការវាយប្រហារនេះទេ។ អ្នកនាំពាក្យតាលីបង់បាននិយាយថា ក្រុមនេះថ្កោលទោសអំពើព្រៃផ្សៃថា ជាអំពើឧក្រិដ្ឋកម្ម៕ AFP/SK
