.jpg)
លោកស្រី Marion Koopmans សមាជិកនៃអង្គការ WHO (ឆ្វេង)។ AFP
កាលពីថ្ងៃព្រហស្បតិ៍ ទី ១៤ មករា ក្រុមអ្នកស្រាវជ្រាវរបស់អង្គការសុខភាពពិភពលោកបានទៅដល់ក្រុងវូហាន ប្រទេសចិន ក្រោយពីមានការយឺតយ៉ាវក្នុងការធ្វើដំណើរដោយសារបញ្ហាឯកសារ។
ក្រោយពីមានការយឺតយ៉ាវក្នុងការទៅដល់ក្រុងវូហាន ក្រុមអ្នកជំនាញអន្តរជាតិបានទៅដល់ក្រុងនេះនៅថ្ងៃទី ១៤ មករា ក្រោយពីមានការទទូចមិនពេញចិត្តពីប្រធានអង្គការសុខភាពពិភពលោក។ វត្តមានរបស់ក្រុមអ្នកស្រាវជ្រាវនៅក្រុងវូហាន គឺក្នុងគោលបំណងសិក្សាស្រាវជ្រាវពីដើមកំណើតវីរុសកូវីដ ១៩។
យោងតាមអ្នកនាំពាក្យអង្គការសុខភាពពិភពលោក អ្នកជំនាញស្រាវជ្រាវអន្តរជាតិដែលអង្គការបានបញ្ជូនទៅក្រុងវូហានលើកនេះ មានចំនួន ១០ នាក់ និងអ្នកស្រាវជ្រាវ ២ រូបទៀត ដែលបានទៅមុនកាលពីខែកក្កដា ឆ្នាំ ២០២០។
អង្គការសុខភាពពិភពលោកបានបញ្ជាក់ថា ការបញ្ជូនក្រុមស្រាវជ្រាវអន្តរជាតិទៅក្រុងវូហាននេះ គឺមិនមែនស្វែងរកថាភាគីណាដែលជាអ្នកទទួលខុសត្រូវនោះទេ។ ប៉ុន្តែជាការស្រាវជ្រាវដើម្បីរកប្រភពឱ្យច្បាស់លាស់នៃការឆ្លងរាលដាលនៃវីរុសនេះ។
លោកស្រី Marion Koopmans ជាសមាជិកក្រុមដឹកនាំដោយអង្គការសុខភាពពិភពលោកបាននិយាយកាលពីខែ ធ្នូ ឆ្នាំ ២០២០ ហើយលោកស្រីសន្និដ្ឋានថា វីរុស SARS-CoV-2 បានឆ្លងពីសត្វប្រចៀវទៅមនុស្ស។
យោងតាមសារព័ត៌មាន BBC អ្នកជំនាញរបស់អង្គការសុខភាពពិភពលោក លោក Mike Ryan បានប្រាប់អ្នកយកព័ត៌មាននៅសប្តាហ៍នេះថា៖ «យើងកំពុងស្វែងរកចម្លើយដែលអាចជួយសង្រ្គោះយើងនាពេលអនាគតមិនមែនរកអ្នកដែលត្រូវស្តីបន្ទោសឡើយ។ ការសិក្សាស្រាវជ្រាវនេះ គឺធ្វើឡើងដើម្បីរកឱ្យឃើញពីរបៀបដែលវីរុសនោះលេចចេញមក។
គួរបញ្ជាក់ផងដែរថា ករណីកូវីដដំបូង គឺកើតមានឡើងកាលពីចុងឆ្នាំ ២០១៩ នៅក្រុងវូហានប្រទេសចិន ដែលមានអ្នកឆ្លងសរុបប្រមាណជាង ៩ លាននាក់ក្នុងសកលលោកគិតត្រឹមថ្ងៃទី ១៤ មករា។
នៅមុនការទៅដល់របស់ក្រុមអ្នកជំនាញ ១០ រូបនេះ ទីក្រុងប៉េកាំង ក៏កំពុងតែសិក្សាស្វែងរកពេលវេលា និងទីកន្លែងជាក់លាក់ដែលវីរុសនេះរាតត្បាតដែរ។ អ្នកការទូតជាន់ខ្ពស់ចិន លោក វ៉ាង យី បាននិយាយថា៖ «ការសិក្សាកាន់តែមានច្រើនឡើងៗ ដែលបានបង្ហាញថា វីរុសនេះបានលេចចេញពីតំបន់ជាច្រើន»។
ប្រទេសចិន ធ្លាប់បានអះអាងថា វីរុសនេះ អាចមិនមែនកើតមានឡើងនៅប្រទេសចិន ដោយមានសារព័ត៌មានចិនបានរាយការណ៍កាលពីឆ្នាំ ២០២០ ថា វីរុសនេះអាចមានប្រភពពីតំបន់ផ្សេង។ ប៉ុន្តែការរាយការណ៍នេះត្រូវបានអ្នកវិភាគមួយចំនួននិយាយថា ជាការលើកឡើងដោយមិនមានមូលដ្ឋានច្បាស់លាស់។
ទោះបីជាមានអ្នកជំនាញស្រាវជ្រាវ ២ រូប ដែលអង្គការសុខភាពពិភពលោកបញ្ជូនទៅក្រុងវូហាន កាលពីខែកក្កដា ឆ្នាំ ២០២០ ក៏ដោយក៏អ្នកទាំង ២ ហាក់ដូចជាមានការពិបាកក្នុងការទទួលនូវព័ត៌មានពីក្រុមស្រាវជ្រាវរបស់ចិនទាក់ទងនឹងការស្រាវជ្រាវនេះ។
ប្រទេសចិន កន្លងមក រងការចោទប្រកាន់ពីការបិទព័ត៌មានពីការរីករាលដាលដំបូងកាលពីឆ្នាំ ២០១៩ ដែលបណ្តាលឱ្យមានការឆ្លងរីករាលដាលនេះកើតឡើង៕
