ក្រុមឧទ្ទាមហ៊ូធីគាំទ្រដោយអ៊ីរ៉ង់នៅប្រទេសយេម៉ែន កាលពីថ្ងៃអាទិត្យបានអះអាងពីការវាយប្រហារមីស៊ីល និងយន្តហោះដ្រូនដែលបានយកប្រទេសអារ៉ាប៊ី សាអ៊ូឌីត នៅជិតខាង ជាគោលដៅ និងបានគំរាមវាយប្រហារជាច្រើនទៀត ខណៈការប្រយុទ្ធគ្នានៅក្នុងសង្គ្រាមស៊ីវិលនោះកើនឡើងយ៉ាងខ្លាំង។
ក្រុមយុទ្ធជនហ៊ូធីបានបង្កើនកិច្ចប្រតិបត្តិការប្រឆាំងនឹងព្រះរាជាណាចក្រនេះ ខណៈការវាយប្រហារផ្លូវអាកាសរបស់ក្រុមចម្រុះយោធាដឹកនាំដោយអារ៉ាប៊ី សាអ៊ូឌីត បានវាយសង្គ្រប់ទៅលើទីតាំងនានារបស់ក្រុមឧទ្ទាមនៅភាគខាងជើងនៃប្រទេសយេម៉ែន ជាកិច្ចខិតខំប្រឹងប្រែងមួយ ដើម្បីបញ្ឈប់ការវាយលុករបស់ពួកគេក្នុងគោលបំណងដណ្តើមយកបន្ទាយរឹងមាំរបស់រដ្ឋាភិបាលនៅទីក្រុងម៉ារីបភាគខាងជើង។
សង្គ្រាមជាច្រើនឆ្នាំមកនេះ បានរុញច្រានប្រទេសយេម៉ែន ធ្លាក់ចូលមាត់ជ្រោះនៃភាពស្រេកឃ្លានរួចស្រេចទៅហើយ។
ប្រទេសអារ៉ាប៊ី សាអ៊ឌីត ដែលបានគាំទ្ររដ្ឋាភិបាលយេម៉ែនប្រឆាំងនឹងក្រុមឧទ្ទាមចាប់តាំងពីឆ្នាំ ២០១៥ បាននិយាយកាលពីថ្ងៃសៅរ៍ថា ខ្លួនបានកម្ទេចចោលមីស៊ីលរបស់ក្រុមឧទ្ទាមហ៊ូធី ដែលបានយកទីក្រុងរីយ៉ាដជាគោលដៅនោះ។
អ្នកនាំពាក្យហ៊ូធីលោក Yah-ya al-Saree បាននិយាយថា៖ «កិច្ចប្រតិបត្តិការនេះ ត្រូវបានធ្វើឡើងជាមួយនឹងមីស៊ីលបាលីស្ទិក ១ គ្រាប់ និងដ្រូន ១៥ គ្រឿង ដោយបានយកតំបន់ជាច្រើននៅក្នុងរដ្ឋធានីរីយ៉ាដជាគោលដៅ។ នេះបើយោងតាមទូរទស្សន៍ Al Masirah TV របស់ក្រុមឧទ្ទាម។
ទូរទស្សន៍ Al Ekhbariya គ្រប់គ្រងដោយរដ្ឋរបស់អារ៉ាប៊ី សាអ៊ូឌីត បាននិយាយថា៖ «បំណែករបស់មីស៊ីលនោះបានខ្ទាតរប៉ាត់រប៉ាយធ្លាក់ក្នុងសង្កាត់មួយចំនួននៅក្នុងទីក្រុងរីយ៉ាដ ដោយបណ្តាលឱ្យផ្ទះយ៉ាងតិច ១ ខ្នងរងការខូចខាត ប៉ុន្តែមិនមានអ្នកស្លាប់ ឬរងរបួស ត្រូវបានគេរាយការណ៍នោះទេ»។
អ្នកឆ្លើយឆ្លងសារព័ត៌មាន AFP ប្រចាំនៅអារ៉ាប៊ី សាអ៊ូឌីតបានរាយការណ៍ថា បានឮសំឡេងផ្ទុះខ្លាំងៗជាច្រើនគ្រាប់ ដោយរូបភាពវីដេអូតាមទូរទស្សន៍បង្ហាញឱ្យឃើញពន្លឺភ្លឺពេញផ្ទៃមេឃ។
ក្រុមចម្រុះបាននិយាយថា ខ្លួនចាប់បានដ្រូនហ៊ូធីចំនួន ៦ គ្រឿង ដោយបានយកព្រះរាជាណាចក្រនេះជាគោលដៅក្នុងនោះមានទីក្រុងនៅភាគខាងត្បូង គឺទីក្រុង Khamis Mu shait និង Jizan។
អាមេរិកបាននិយាយកាលពីថ្ងៃអាទិត្យថា ខ្លួនថ្កោលទោសយ៉ាងដាច់អហង្ការចំពោះការវាយប្រហាររបស់ក្រុមហ៊ូធីទៅលើទីតាំងមានប្រជាជនរស់នៅច្រើននៅក្នុងប្រទេសអារ៉ាប៊ី សាអ៊ូឌីត។
អ្នកនាំពាក្យក្រសួងការបរទេស លោក Ned Price បាននិយាយថា៖ «ការវាយប្រហារទាំងនោះ មិនគ្រាន់តែគំរាមកំហែងដល់ជនស្លូតត្រង់ប៉ុណ្ណោះទេ ថែមទាំងធ្វើឱ្យប៉ះពាល់ដល់ក្តីសង្ឃឹមចំពោះសន្តិភាព និងស្ថិរភាពនៅក្នុងប្រទេសយេម៉ែន ទៀតផង»។
នៅក្នុងរបាយការណ៍មួយដែលត្រូវបានដាក់ជូនក្រុមប្រឹក្សាសិទ្ធិមនុស្សនៅទីក្រុងហ្ស៊ឺណែវ ក្រុមអ្នកជំនាញ Eminent មានសមាជិក ៣ នាក់ ទទួលបន្ទុកការងារនៅប្រទេសយេម៉ែន បាននិយាយថា ខ្លួនមានការព្រួយបារម្ភយ៉ាងខ្លាំងចំពោះការខូចខាតយ៉ាងធ្ងន់ធ្ងរដែលជម្លោះយ៉ាងសាហាវព្រៃផ្សៃនេះ កំពុងកើតឡើងចំពោះប្រជាជនស៊ីវិល។
ចាប់តាំងពីជម្លោះនេះ បានកើតឡើងនៅក្នុងឆ្នាំ ២០១៤ អង្គការសហប្រជាជាតិបានរាយការណ៍ថា ជនស៊ីវិលជាង ១៨ ៤០០ នាក់បានស្លាប់ ហើយបាននិយាយទៀតថា ៨០ ភាគរយនៃប្រជាជន ២៩ លាននាក់របស់ប្រទេសនេះ ត្រូវការជំនួយមនុស្សធម៌ និង ១៦ លាននាក់កំពុងស្រេកឃ្លាន៕