ក្រុងហ្គាហ្សាៈ ក្រុមជនសកម្មប្រយុទ្ធប៉ាឡេស្ទីននៅតំបន់ហ្គាហ្សា បានប្រកាសបទឈប់បាញ់មួយ ដែលសម្របសម្រួលដោយអេហ្ស៊ីបជាមួយអុីស្រាអែល បន្ទាប់ពីមានអំពើហិង្សាកាន់តែខ្លាំងឡើង បានជិតឈានដល់មាត់ជ្រោះនៃសង្គ្រាមពេញទំហឹង។
នៅក្នុងសេចក្តីថ្លែងការណ៍មួយកាលពីថ្ងៃអង្គារ ជនសកម្មប្រយុទ្ធជាច្រើនក្រុមក្នុងនោះមានក្រុមហាម៉ាស និយាយថា ពួកគេនឹងគោរពតាមបទឈប់បាញ់នេះ ខណៈអុីស្រាអែល ក៏ត្រូវគោរពតាមដែរនោះ។
លោកនាយករដ្ឋមន្ត្រីអុីស្រាអែល បេនចាមីន នេតាន់យ៉ាហ៊ូ និងក្រុមយោធា នៅមិនទាន់ធ្វើការអត្ថាធិប្បាយអំពីសេចក្តីប្រកាសនោះ នៅឡើយទេ។ លោករដ្ឋមន្ត្រីការពារជាតិ AvigdorLieberman បានថ្លែងថា លោក មិនគាំទ្រការបញ្ឈប់វាយប្រហារទាំងនោះទេ។
អំពើហិង្សានោះ ដែលបានបណ្តាលឲ្យបាត់បង់ជីវិតពលរដ្ឋប៉ាឡេស្ទីន៧នាក់នៅក្នុងរយៈពេល ២៤ ម៉ោង ខណៈការវាយប្រហារផ្លូវអាកាសរបស់អុីស្រាអែល បានបំផ្លាញអគារអស់ជាច្រើន ហើយបានធ្វើឲ្យដុំភ្លើង និងផ្សែងក្រាស់ឃ្មឹកហើរទៅលើអាកាស គឺជាអំពើហិង្សាដ៏អាក្រក់បំផុតរវាងអុីស្រាអែល និងក្រុមជនសកម្មប្រយុទ្ធប៉ាឡេស្ទីន ចាប់តាំងពីសង្គ្រាមនៅក្នុងឆ្នាំ ២០១៤ មកម្លេះ ។
សំលេងស៊ីរ៉ែនរថយន្ត ឮលាន់កងរំពងនៅអុីស្រាអែលភាគខាងត្បូង ហើយប្រជាជនរាប់ម៉ឺននាក់ បានរត់ទៅរកទីកន្លែងលាក់ខ្លួន ខណៈគ្រាប់រ៉ុក្កែតប្រហែលជា ៤៦០ គ្រាប់ និងគ្រាប់កាំភ្លើងត្បាល់ជាច្រើនគ្រាប់ ត្រូវបានចេញពីតំបន់ហ្គាហ្សា ដោយបានបណ្តាលឲ្យមនុស្ស ២៧ នាក់ រងរបួស នៅក្នុងនោះ ៣ នាក់ទៀត បានរងរបួសយ៉ាងធ្ងន់ធ្ងរ៕ SK