កាលពីថ្ងៃអាទិត្យ ទី ១៤ មីនា គណបក្ស Christian Democrats Union (CDU) របស់លោកស្រី Angela Merkel បានធ្លាក់សំឡេងឆ្នោតក្នុងការបោះឆ្នោតរដ្ឋសំខាន់ចំនួន ២ ខណៈមានរឿងអាស្រូវកំពុងកើនឡើងដែលពាក់ព័ន្ធនឹងសមាជិកសភាទទួលប្រាក់សំណូកក្នុងការជួយលក់ម៉ាស់។
ការបោះឆ្នោតនៅរដ្ឋ Baden Wurttemberg និងរដ្ឋ Rhineland Palatinate ត្រូវបានគេឃើញថា ជាការសាកល្បងមតិសាធារណៈសម្រាប់ឆ្នាំ ២០២១ ដែលនឹងជាឆ្នាំមានការបោះឆ្នោតសំខាន់ច្រើនដូចជាការបោះឆ្នោតក្នុងរដ្ឋចំនួន ៤ ផ្សេងទៀត និងការបោះឆ្នោតជ្រើសតាំងសមាជិកសភា Bundestag។ នៅខែកញ្ញាខាងមុខនេះ អាល្លឺម៉ង់នឹងជ្រើសរើសអធិការបតី និងរដ្ឋាភិបាលថ្មី ដើម្បីកាន់កាប់សេដ្ឋកិច្ចធំបំផុតនៅអឺរ៉ុប បន្ទាប់ពីរយៈពេល ១៦ ឆ្នាំក្រោមការដឹកនាំរបស់លោកស្រី Merkel។
លោក Winfried Kretschmann អភិបាលមកពីគណបក្ស Greens នៃរដ្ឋ BadenWurttemberg បានទទួលជ័យជម្នះ ដើម្បីបន្តការគ្រប់គ្រងមួយអាណត្តិទៀត។ ឥឡូវនេះលោកកំពុងប្រឈមនឹងជម្រើស ២ គឺ៖ បន្តសម្ព័ន្ធភាពរបស់គាត់ជាមួយ CDU ឬរើសជម្រើសថ្មី៖ បង្កើតសម្ព័ន្ធភាពថ្មីជាមួយគណបក្ស Social Democrats (SPD) និង Free Democrats (FDP)។
លទ្ធផលនៅរដ្ឋ BadenWurttemberg គឺបង្ហាញការធ្លាក់ចុះនូវប្រជាប្រិយភាពរបស់បក្សកាន់អំណាច CDU នៅអាល្លឺម៉ង់។ រដ្ឋភាគខាងត្បូងនេះ ដែលមានទ្រព្យសម្បត្តិច្រើន ហើយជាលំនៅឋានរបស់អភិជន គឺជាតំបន់គាំទ្រ CDU ជាច្រើនទសវត្សរ៍មកហើយ រហូតដល់ឆ្នាំ ២០១១ ទើប CDU បាត់បង់ការគាំទ្រនៅតំបន់នេះ។
នៅ Rhineland Palatinate គណបក្ស SPD ដែលដឹកនាំដោយលោកស្រីអភិបាល Malu Dreyer បានទទួលជ័យជម្នះ ហើយលោកស្រីទំនងអាចនឹងបង្កើតសម្ព័ន្ធភាពជាមួយគណបក្ស Greens និង SPD។
អគ្គលេខាធិការនៃគណបក្ស CDU លោក Paul Ziemiak បាននិយាយកាលពីថ្ងៃអាទិត្យ នៅក្នុងសន្និសីទសារព័ត៌មានមួយថា៖ «ថ្ងៃនេះមិនមែនជាការបោះឆ្នោតដ៏ល្អសម្រាប់ Christian Democrats Union ទេ»។ លោកបានបន្តទៀតថា៖ «យើងចង់ឃើញលទ្ធផលល្អជាងនេះ»។
គណបក្ស CDU បានឃើញការធ្លាក់ចុះសំឡេងឆ្នោតយ៉ាងតិច ៤ ភាគរយ នៅក្នុងរដ្ឋ BadenWurttemberg និងច្រើនជាង ៥ ភាគរយ នៅរដ្ឋ Rhineland Palatinate បើធៀបនឹងលទ្ធផលឆ្នាំ ២០១៦។ គណបក្សនេះឈរនៅលំដាប់ថ្នាក់ទី២ ក្នុងការបោះឆ្នោតនេះ តែជាលទ្ធផលអាក្រក់បំផុតសម្រាប់គណបក្សអភិរក្សនិយមនេះ តាំងពីបញ្ចប់សង្គ្រាម លោកលើកទី២ មក។
លទ្ធផលបានចង្អុលបង្ហាញអំពីបញ្ហាដែលគណបក្ស CDU កំពុងប្រឈមក្នុងការព្យាយាមស្តារទំនុកចិត្តអ្នកបោះឆ្នោត ដែលត្រូវបានបាត់បង់បន្ទាប់ពីសមាជិកសភារបស់ពួកគេចំនួន ៣ រូប ក្នុងនោះ ១ រូបជាតំណាងរដ្ឋ Baden Wurttemberg ត្រូវបានបង្ខំឱ្យលាលែងពីតំណែងបន្ទាប់ពីគេបានរកឃើញថា សមាជិកទាំងនេះបានទទួលប្រាក់សំណូករាប់សែនអឺរ៉ូ ដើម្បីជួយរៀបចំកាលលក់ម៉ាស់ទៅកាន់រដ្ឋាភិបាលមូលដ្ឋានមួយចំនួន ខណៈពេលដែលកំពុងមានការខ្វះខាត។
បន្ទាប់ពីមានការលេចចេញរឿងអាស្រូវនេះមេដឹកនាំគណបក្ស CDU បានទាមទារឱ្យសមាជិកសភារបស់ខ្លួនទាំង ២៤០ រូបចុះហត្ថលេខាលើសេចក្ដីប្រកាសមួយដោយសន្យាថា ពួកគេមិនបានប្រើប្រាស់តំណែងរបស់ខ្លួន ដើម្បីធ្វើការកេងប្រវ័ញ្ចទាក់ទងនឹងការប្រយុទ្ធប្រឆាំងការរីករាលដាលជំងឺកូវីដ ១៩ នោះទេ។
ការធ្លាក់ចុះនៃ CDU អាចបង្ហាញពីការអង្រួនអនាគតនយោបាយប្រទេសអាល្លឺម៉ង់។ ការចាកចេញរបស់លោកស្រី Merkel ក្នុងនាមជាមេដឹកនាំគណបក្សបានបន្សល់ទុកនូវភាពមិនប្រាកដប្រជាក្នុងចំណោមថ្នាក់ដឹកនាំកំពូលនៃគណបក្ស ដោយអ្នកស្នងតំណែងរបស់លោកស្រីគឺលោកស្រី Annegret Kramp Karrenbauer ត្រូវបានដកចេញពីតំណែងកាលពីដើមឆ្នាំនេះ ហើយត្រូវបានជំនួសដោយលោក Armin Laschet។
បេក្ខជនអធិការបតីគណបក្ស Social Democrats (SPD) លោក Olaf Scholz ដែលជារដ្ឋមន្ត្រីក្រសួងហិរញ្ញវត្ថុបច្ចុប្បន្នក្នុងគណៈរដ្ឋមន្ត្រីរបស់លោកស្រី Merkel បានលើកឡើងថា ការចាកចេញពីរដ្ឋាភិបាលសម្ព័ន្ធភាព CDU / SPD បច្ចុប្បន្នអាចធ្វើទៅបានបន្ទាប់ពីការបោះឆ្នោតជាតិ។ ទាក់ទងនឹងលទ្ធផលបោះឆ្នោតខាងលើលោកបានប្រាប់ទីភ្នាក់ងារព័ត៌មាន DPA ថា «នេះជាថ្ងៃល្អមួយ ពីព្រោះវាបង្ហាញថា យើងអាចទៅរួចក្នុងការបង្កើតរដ្ឋាភិបាលនៅប្រទេសអាល្លឺម៉ង់ ដោយមិនត្រូវការ CDU»។
គណបក្ស Greens ទទួលបានជោគជ័យនៅក្នុងរដ្ឋទាំង ២ ដែលឆ្លុះបញ្ចាំងពីប្រជាប្រិយភាពរបស់គណបក្សដែលកំពុងកើនឡើងជាលំដាប់។ ជ័យជម្នះនោះអាចជួយឱ្យគណបក្សនេះលេចចេញជាកម្លាំងខ្លាំងបំផុតនៅក្នុងការបោះឆ្នោតជាតិខែកញ្ញា ដែលបង្កើនការរំពឹងទុកថា អាល្លឺម៉ង់មានអធិការបតីគណបក្ស Greens ដំបូងរបស់ខ្លួន។
ទាំងអស់នេះបានដាក់សម្ពាធទៅលើមេដឹកនាំថ្មីរបស់ CDU លោក Armin Laschet ដែលនៅតែអាចប្រឈមមុខនឹងការប្រកួតប្រជែងពីអភិបាលរដ្ឋ Bavaria លោក Markus Soder ក្នុងការក្លាយជាបេក្ខជនអធិការបតីនៃប្លុកសម័ន្ធភាពអភិរក្សនិយម CDU/ CSU ក្នុងការបោះឆ្នោតខែកញ្ញា។ សមាជិកជាច្រើននៃ CDU នៅតែមិនប្រាកដថា លោក Laschet នឹងក្លាយជាបេក្ខជននៅក្នុងការប្រជែង ដើម្បីជំនួសលោកស្រី Merkel៕